Luka 5

₁Siku rin'wana Yesu a a yimile eribuweni ra tiva ra Genesareta, ntshungu wu ri karhi wu n'wi kamanyeta, wu navela ku yingisa Rito ra Xikwembu. ₂Kutani a vona mabyatso mambirhi lama kokeriweke eribuweni ra tiva; vaphasi a va humile ka wona, va hlantswa tinkoka ta vona. ₃A nghena eka byin'wana bya mabyatso lawa, lebyi a byi ri bya Simoni, kutani a kombela Simoni ku byi tshineta kulenyana ni ribuwu, kutani a dyondzisa ntshungu, a tshamile ebyatsweni.

₄Loko a hetile ku vulavula, a ku ka Simoni: “Tlutelani exidziveni, mi peta tinkoka ta n'wina kona, mi phasa.” ₅Kambe Simoni a hlamula a ku: “N'wini wanga, hi tirhile vusiku hinkwabyo, hi nga phasi nchumu; kambe hi ku vula ka wena, ndzi ta peta tinkoka.” ₆Va endlisa sweswo, kutani va phasa tinhlampfi leto tala ngopfu, tinkoka ta vona ti ko ti lava ku handzuka. ₇Kutani va koweta vatirhi-kulobye lava a va ri ebyatsweni byin'wana leswaku va ta, va ta va pfuna. Vona va ta, kutani va tata mabyatso mambirhi walawo, ma ko ma lava ku mbombomela. ₈Loko Simoni Petro a swi vona, a nkhinsama emilengeni ya Yesu, a ku ka yena: “Suka ka mina Hosi, hikuva ndzi mudyohi.” ₉Yena ni hinkwavo lava a va ri na yena, a va hlamele ngopfu hi ku tala ka tinhlampfi leti va ti phaseke; ₁₀a swi ri tano ni ka va Yakobo na Yohane, vana va Zebediya, lava a va tirha na Simoni. Kutani Yesu a ku ka Simoni: “U nga chavi, ku sukela sweswi u ta va la phasaka vanhu.” ₁₁Kuteloko va vuyiserile mabyatso eribuweni, va siya hinkwaswo va n'wi landza.

₁₂Kakuloko a ri emutini wun'wana, ku ta wanuna la taleke hi nhlokonho; kutani loko a vona Yesu, a tiwisela hansi hi mombo, a n'wi khongela, a ku: “Hosi, loko u swi rhandza, u nga ndzi basisa.” ₁₃Kutani Yesu a tshambuluta voko, a n'wi khumba a ku: “Ndza swi rhandza, hlantsweka u basa!” Hi nomu lo nhlokonho yi suka eka yena. ₁₄Kutani Yesu a n'wi lerisa a ku: “U nga tshuki u byela munhu swilo leswi, kambe famba, u ya tikomba eka muprista, u humesa swa ku basisiwa ka wena, hilaha Muxe a leriseke hakona; swi ta va vumbhoni eka vona.” ₁₅Kambe ku twakala ka Yesu ku ya ku hangalaka; mintshungu leyikulu yi ta ku ta n'wi yingisa, ni ku hanyisiwa hi yena. ₁₆Kambe a a pfa a suka, a ya khongela a ri yexe.

₁₇Siku rin'wana, Yesu a a ri eku dyondziseni. Vafarisi ni vadyondzisi va Nawu lava humeke emitini hinkwayo ya Galeliya, ni ya Yudiya, ni le Yerusalema, a va tshamile kwalaho, Yesu a ri karhi a hanyisa lava vabyaka, hikuva Xikwembu a xi n'wi nyikile matimba walawo. ₁₈Hiloko ku ta vavanuna lava rhwaleke munhu la khwanyaleke swirho, a etlele evuhlakeni; va ringeta ku n'wi nghenisa ndlwini ni ku n'wi veka emahlweni ka Yesu. ₁₉Loko va nga kumi lomu va nga ta n'wi nghenisa hi kona hikwalaho ka ntshungu, va khandziya ehenhla ka yindlu, va hahlula lwangu, va n'wi nembeletela hansi exikarhi ka vanhu a ri esangwini, a vekiwa emahlweni ka Yesu. ₂₀Loko Yesu a vona ku pfumela ka vona, a ku: “Nakulorhi, u rivaleriwile swidyoho swa wena!” ₂₁Kutani vatsari ni Vafarisi va sungula ku vilela hi timbilu, va ku: “Munhu loyi u sandza Xikwembu! A nga va mani ke? Xana i mani la nga rivalelaka munhu swidyoho, loko xi nga ri Xikwembu ntsena ke?” ₂₂Kambe loko Yesu a tivile ku vilela ka vona, a va hlamula a ku: “Mi vilela hikwalaho ka yini etimbilwini ta n'wina ke? ₂₃Ku olova yini ke? Ku vula leswaku: ‘U rivaleriwile swidyoho swa wena’, kumbe ku vula leswaku: ‘Pfuka u famba’ xana? ₂₄Sweswi mi ta tiva leswaku N'wana-wa-Munhu ú ni matimba emisaveni ku rivalela vanhu swidyoho.” Hiloko a ku ka loyi a khwanyaleke swirho: “Ndzi ri ka wena, pfuka u teka sangu ra wena u ya ekaya.” ₂₅Kan'we-kan'we o kàkàtsùkù, emahlweni ka vona, a teka sangu leri a a etlele eka rona, a tiyela kaya a ri karhi a dzunisa Xikwembu. ₂₆Kutani va hlamala hinkwavo, va dzunisa Xikwembu, va tala hi ku chava va ku: “Namuntlha hi vonile mihlolo.”

₂₇Endzhaku ka timhaka teto, Yesu a huma, kutani a vona muluvisi loyi a va ku i Levhi, a tshamile endlwini ya ndzuvo. A ku ka yena: “Ndzi landze.” ₂₈Hiloko yena a suka a yima, a tshika hinkwaswo a n'wi landza.

₂₉Kavaloko Levhi a endlela Yesu nkhuvo lowukulu emutini wa yena; kutani a ku ri ni ntshungu lowukulu wa valuvisi ni wa vanhu van'wana lava tshameke eswakudyeni na vona. ₃₀Vafarisi ni vatsari va ntlawa wa vona va n'unun'uta va ku ka vadyondzisiwa va yena: “Xana mi dyela yini ni valuvisi ni vadyohi, mi nwela yini na vona ke?” ₃₁Yesu a va hlamula a ku: “Lava tsakeke emirini a va lavi n'anga, kambe yi laviwa hi lava vabyaka. ₃₂A ndzi tanga ku ta vitana lava lulameke, kambe vadyohi, leswaku va hundzuka.”

₃₃Kutani va ku ka yena: “Vadyondzisiwa va Yohane va tala ku titsona swakudya, va endla ni swikhongelo; vadyondzisiwa va Vafarisi na vona va endlisa sweswo; kasi va wena lava, va dya va nwa!” ₃₄Yesu a ku ka vona: “Xana mi nga sindzisa tinxangwana ta muteki ku titsona swakudya, loko muteki a ha ri na tona ke? ₃₅Masiku ma ta lawa muteki a nga ta susiwa eka tona; hi kona ti nga ta titsona swakudya, emasikwini walawo!”

₃₆A engeta a va byela xifaniso a ku: “A ku na munhu loyi a handzulaka xitiva engubyini leyintshwa, a xi rhungelela eka leya khale, hikuva loko a endlisa sweswo, ú ta va a handzurile nguvu leyintshwa, kutani xitiva lexintshwa a xi nga yelani ni nguvu ya khale. ₃₇A ku na munhu la chelaka vhinyo leyintshwa eminkwameni ya khale ya madzovo; hikuva loko a endlisa sweswo, vhinyo leyintshwa yi ta handzula minkwama yi halaka, minkwama na yona yi ta va yi onhakile. ₃₈Kambe vhinyo leyintshwa yi cheriwa eminkwameni leyintshwa. ₃₉Naswona a ku na munhu la navelaka vhinyo leyintshwa loko a nwile leya khale, hikuva ú ta ku: ‘Ku nandziha leya khale.’ ”