Luka 3

₁Hi lembe ra khume na ntlhanu ra ku fuma ka Tiberiyo Khezari, Pontiyo Pilato a a fuma Yudiya; Heroda yena a a ri hosi ya Galeliya; Filipi makwavo a a ri hosi ya Ituriya ni ya tiko ra Trakonita; Lisaniya a a ri hosi ya Abilene; ₂Anasi na Kayafasi a va ri vaprista lavakulu; enkarhini wolowo, rito ra Xikwembu ri fika eka Yohane n'wana Zakariya, emananga. ₃Kutani a suka, a ya rhendzeleka na tiko hinkwaro leri nge kusuhi na Yordani, a ri karhi a huwelela, a byela vanhu ku hundzuka va khuvuriwa, leswaku Xikwembu xi va rivalela swidyoho swa vona.

₄Hi swona leswi nga tsariwa ebukwini ya muprofeta Esaya, loko a te:

₇Kutani Yohane a byela mintshungu leyi taka ku ta khuvuriwa hi yena, a ku: “Rixaka ra timhiri, i mani la nga mi tsundzuxa ku baleka vukari lebyi taka xana? ₈Vekani mihandzu leyi fambelanaka ni ku hundzuka ka n'wina! Mi nga anakanyi mi ku, mi na Abrahama, yena tata wa n'wina, hikuva ndzi ri ka n'wina: Xikwembu xi nga pfuxela Abrahama evana hi maribye lawa. ₉Ni sweswi xihloka xi vekiwile etimitswini ta mirhi; murhi wun'wana ni wun'wana lowu nga vekiki mihandzu leyinene, wu ta tsemiwa wu hoxiwa endzilweni.”

₁₀Kutani mintshungu yi n'wi vutisa yi ku: “Loko swi ri tano, hi ta endla yini ke?” ₁₁A hlamula a ku ka vona: “Loyi a nga ni swiambalo swimbirhi, a a avele la pfumalaka; ni loyi a nga ni swakudya, a a endlise sweswo na yena.”

₁₂Valuvisi na vona va ta eku khuvuriweni, va ku ka yena: “Mudyondzisi, hi ta endla yini xana?” ₁₃A ku ka vona: “Mi nga therisi vanhu ku tlula leswi mi lerisiweke swona.” ₁₄Masocha na wona ma n'wi vutisa ma ku: “Hina ke, hi ta endla yini?” A ku ka vona: “Mi nga phanghi swilo swa vanhu, mi nga va tekeli swona hi ku xisa, kambe mi kolwa hi hakelo ya n'wina.”

₁₅Vanhu a va tshama va langutele, kutani hinkwavo a va ehleketa etimbilwini ta vona leswaku kumbexana Yohane a nga va yena Mesiya. ₁₆Yohane a va hlamula hinkwavo, a ku: “Loko ndzi ri mina, ndzi mi khuvula hi mati, kambe wa ta un'wana loyi a ndzi tlulaka hi matimba, loyi swi nga ndzi faneriki ku ntshunxa ngoti ya tintanghu ta yena; yena ú ta mi khuvula hi Moya lowo Kwetsima ni ndzilo. ₁₇Rihlelo ri le vokweni ra yena; ú ta hlela swinene hinkwaswo leswi nge xivuyeni xa yena a heta: kutani mavele ú ta ma chela enguleni; kambe mungu wona, ú ta wu hisa endzilweni lowu nga timekiki.”

₁₈Kutani a tshama a va khongotela hi timhaka tin'wana leto tala, a ri karhi a twarisa Evhangeli exikarhi ka vanhu. ₁₉Kambe Hosi Heroda a a tekile Herodiya, nsati wa makwavo wa yena Filipi, a endla ni swin'wana leswo tala leswi biheke, kutani Yohane a a tala ku n'wi tshinya etimhakeni teto. ₂₀Kutani Heroda a engetela vubihi lebyi hi ku pfalela Yohane ekhotsweni.

₂₁Loko vanhu hinkwavo va khuvuriwa, ni loko Yesu na yena a khuvuriwile, matilo ma pfuleka a ri karhi a khongela; ₂₂Moya lowo Kwetsima wu xikela henhla ka yena, wu ri ni xivumbeko lexi fanaka ni xa tuva; kutani rito ri huma etilweni ri ku: “U N'wananga la rhandzekaka, loyi ndzi n'wi tsakelaka swinene.”

₂₃Yesu a a ri kusuhi ni malembe ya 30 loko a sungula ntirho wa yena; kutani, hi ku ehleketa ka vanhu, a a ri n'wana Yosefa, wa Heli, ₂₄wa Matati, wa Levhi, wa Melki, wa Yanayi, wa Yosefa, ₂₅wa Matatiya, wa Amosi, wa Nahume, wa Esli, wa Nagayi, ₂₆wa Mate, wa Matatiya, wa Semeyini, wa Yoseke, wa Yoda, ₂₇wa Yohana, wa Resa, wa Zerubabele, wa Salatiele, wa Neri, ₂₈wa Melki, wa Adi, wa Kosama, wa Elmadema, wa Ere, ₂₉wa Yoxuwa, wa Eliezere, wa Yorimi, wa Matati, wa Levhi, ₃₀wa Simiyoni, wa Yuda, wa Yosefa, wa Yonama, wa Eliyakimi, ₃₁wa Meleya, wa Mena, wa Matati, wa Natani, wa Davhida, ₃₂wa Yese, wa Obede, wa Bowazi, wa Sala, wa Nasoni, ₃₃wa Aminadaba, wa Admini, wa Arni, wa Esromo, wa Faresi, wa Yuda, ₃₄wa Yakobo, wa Isaka, wa Abrahama, wa Tera, wa Nakori, ₃₅wa Serugi, wa Rhewu, wa Pelege, wa Ebere, wa Sala, ₃₆wa Kayinama, wa Arifakisada, wa Seme, wa Nowa, wa Lameke, ₃₇wa Metuxela, wa Enoko, wa Yarete, wa Maleleyeli, wa Kayinama, ₃₈wa Enosi, wa Seta, wa Adamu, wa Xikwembu.