Luka 22

₁Nkhuvo wa Xinkwa lexo-ke-comela lowu vuriwaka Paseka, a wu ri kusuhi. ₂Kutani vaprista lavakulu ni vatsari a va lava ndlela yo dlaya Yesu, kambe a va chava ntshungu.

₃Hiloko Sathana a nghena eka Yudasi, loyi a va ku i Iskariyota, un'wana wa lava khume na vambirhi; ₄kutani Yudasi a ya eka vaprista lavakulu, ni ka tindhuna ta valanguteri, ku ya kanela na vona hilaha a nga ta va nyiketa Yesu hakona. ₅Vona va tsaka, va pfumela ku n'wi nyika mali. ₆Yudasi a nkhensa, kutani a lava nkarhi lowunene wo va nyiketa yena ha wona, ntshungu wu nga swi tivi.

₇Kuteloko ku fikile siku ra Xinkwa lexo-ke-comela, ri nga leri va tlhavaka swinyimpfana swa Paseka ha rona, ₈Yesu a rhuma va Petro na Yohane, a ku ka vona: “Yanani, mi ya hi lunghisela nkhuvo wa Paseka, hi ta kota ku wu dya.” ₉Vona va ku ka yena: “Hi kwihi laha u lavaka leswaku hi ya ku lunghisela kona xana?” ₁₀A ku ka vona: “Loko mi nghenile emutini, mi ta hlangana ni wanuna la rhwaleke nghotsa ya mati; n'wi landzeni endlwini leyi a nga ta nghena eka yona. ₁₁Kutani mi ta ku ka n'wini wa yindlu: ‘Mudyondzisi ú hi rhumile eka wena, ú ri, yi kwihi yindlu leyi a nga ta dyela eka yona Paseka, a ri ni vadyondzisiwa va yena, ke?’ ₁₂Yena ú ta mi komba yindlu leyikulu leyi nge henhla, leyi andlaleriweke; mi hi lunghisela kona.” ₁₃Hiloko va suka, va ya kuma swi ri hilaha a nga va byela hakona; kutani va lunghisa Paseka.

₁₄Loko nkarhi wu fikile, a ya eku dyeni swin'we ni vaapostola. ₁₅Kutani a ku ka vona: “Ndzi naverile ngopfu ku dya Paseka leyi na n'wina, ndzi nga si twisiwa ku vaviseka; ₁₆hikuva ndzi tiyisile ndzi ri ka n'wina, a ndzi nga ha yi dyi, yi kondza yi hetiseka eMfun'weni wa Xikwembu.”

₁₇Kavaloko a teka xinwelo, a nkhensa a ku: “Tekani, mi siyerisana. ₁₈Ndzi tiyisile ndzi ri ka n'wina, ku sukela sweswi a ndzi nga ha nwi swa mihandzu ya vhinya, ku kondza ku fika Mfumo wa Xikwembu.”

₁₉A va a teka xinkwa, kutani loko a nkhensile, a xi phema, a va nyika a ku: “Leswi i miri wa mina, [lowu nyiketiwaka hikwalaho ka n'wina; endlani leswi hi ku ndzi anakanya.” ₂₀Hi mukhuva wolowo, a teka xinwelo loko va lalerile, a ku: “Xinwelo lexi i ntwanano lowuntshwa engatini ya mina, leyi halatiwaka hikwalaho ka n'wina.] ₂₁Kambe vonani, loyi a ndzi xengaka ú le ku dyeni na mina sweswi. ₂₂Loko a ri N'wana-wa-Munhu, ú ta tifambela hilaha swi bohiweke hakona; kambe, ú ni khombo munhu loyi a n'wi xengaka.” ₂₃Kutani va sungula ku vutisana, va lava ku tiva leswaku a nga va mani exikarhi ka vona, loyi a nga ta swi endla.

₂₄Kutani ku humelela ku kanetana exikarhi ka vona ku ta tiva loyi a nga ta langutiwa a ri lonkulu ka vona. ₂₅Kambe Yesu a ku ka vona: “Tihosi ta matiko ta ma fuma, kutani vafumi va wona, va vuriwa ‘vahlayisi va tiko’. ₂₆Swi nga tshuki swi va tano eka n'wina; kambe lonkulu exikarhi ka n'wina, a a kotise lontsongo; kutani loyi a lerisaka a a kotise la tirhelaka van'wana. ₂₇Hikuva lonkulu i mani xana? Xana hi loyi a tshamaka eswakudyeni, kumbe hi loyi a tirhaka ku phamela van'wana xana? Ma swi tiva, hi loyi a tshamaka eswakudyeni. Kambe mina ndzi le xikarhi ka n'wina ndzi ri loyi a tirhelaka van'wana. ₂₈Hi n'wina lava mi tiyiseleke na mina emiringweni ya mina. ₂₉Hilaha Tata wa mina a ndzi nyikeke Mfumo hakona, na mina ndzi mi nyika wona; ₃₀eMfun'weni wa mina, mi ta dya ni ku nwa mi ri na mina, kutani mi ta tshama eswiluvelweni, mi avanyisa tinyimba ta Israele leta 12.”

₃₁Yesu a ku ka Petro: “Simoni, Simoni, yingisa: Sathana ú pfumeleriwile ku mi hlela hinkwenu kukota mavele, ₃₂kambe mina ndzi ku khongelerile, leswaku ku pfumela ka wena ku nga tshuki ku titivala. Kutani wena, loko u ta va u hundzukile, u ta tiyisa vamakwenu.” ₃₃Kutani yena a ku: “Hosi, ndzi tilunghisele ku famba na wena ekhotsweni ni le ku feni.” ₃₄Kambe a ku ka yena: “Petro, ndza ku byela leswaku namuntlha nkuku wu nga si ringa, u ta va u vurile kanharhu leswaku a wu ndzi tivi.”

₃₅Kutani a ku ka vona: “Enkarhini lowu ndzi mi rhumeke mi ri hava xinkwamana xa mali, ni nkwama wa timbuva, ni tintanghu, xana mi ve mi pfumala nchumu ke?” Va ku: “A hi pfumalanga nchumu.” ₃₆A ku ka vona: “Kambe sweswi, loyi a nga ni xinkwamana xa mali, a a xi teke, na wona nkwama a a wu teke, ni loyi a pfumalaka banga, a a xavise xiambalo xa yena, a tixavela rona, ₃₇hikuva ndza mi byela leswaku tsalwa leri nge: ‘Ú hlayiwile ni swidyohi’, ri fanele ku hetiseka eka mina. Kunene timhaka leti nga vuriwa ehenhla ka mina, ta karhi ta hetiseka.” ₃₈Kutani va ku: “Hosi, mabanga mambirhi hi lawa!” A ku ka vona: “Swi ringene!”

₃₉Kutani a suka a ya eNtshaveni ya Mitlhwari, hi ku tolovela ka yena; na vona vadyondzisiwa va n'wi landza. ₄₀Loko a fikile kona, a ku ka vona: “Khongelani leswaku mi nga ngheni emiringweni.”

₄₁Kutani a suka a ya kulenyana na vona, hi mpfhuka wo ringana ku hoxa ka ribye, kutani a nkhinsama hi matsolo, a khongela, a ku: ₄₂“Tatana, loko u swi rhandza, xinwelo lexi xi tshinete kule na mina! Ntsena ku nga endliwi ku rhandza ka mina, kambe a ku endliwe ku rhandza ka wena.” [ ₄₃Kutani ntsumi yo huma etilweni yi humelela eka yena, yi n'wi tiyisa. ₄₄Kakuloko a ri emaxangwini lamakulu, a khongela hi matimba ngopfu, nyuku wa yena wu ko wu xiririka, wu fana ni mathonsi ya ngati lama tshonelaka emisaveni.] ₄₅Loko a hetile ku khongela, a suka a yima, a ta eka vadyondzisiwa, a va kuma va etlele hikwalaho ka gome. ₄₆Kutani a ku ka vona: “Hikwalaho ka yini mi etlele xana? Pfukani, mi khongela, leswaku mi nga ngheni emiringweni.”

₄₇Loko a ha vulavula, ku humelela ntshungu wa vanhu; na yena loyi a va ku i Yudasi, un'wana wa lava khume na vambirhi, a a wu rhangele emahlweni; a tshinelela Yesu ku n'wi ntswontswa. ₄₈Kambe Yesu a ku ka yena: “Yudasi, xana u nyiketa N'wana-wa-Munhu hi ku n'wi ntswontswa xana?” ₄₉Lava a va ri na Yesu, loko va vona leswi lavaka ku humelela, va ku: “Hosi, xana hi fanela ku teka mabanga hi lwa ke?” ₅₀Kutani un'wana wa vona a ba nandza wa Muprista lonkulu, a n'wi tsema ndleve ya xinene. ₅₁Kambe Yesu a hlamula a ku: “Tshikani! Mi nga ha engeti!” Kutani a khumba ndleve ya nandza yoloye, a n'wi horisa.

₅₂Kutani Yesu a vulavula ni lava nga n'wi tela, va nga vaprista lavakulu ni tindhuna ta Tempele ni vakulukumba, a ku: “Leswi mi humeke, mi ri ni mabanga ni tinhonga, ndzo va xigevenga xana? ₅₃A ndzi ri na n'wina eTempeleni masiku hinkwawo; a mi ndzi khomanga. Kambe sweswi, hi wona nkarhi wa n'wina, hikuva ku fuma munyama.”

₅₄Kuteloko va n'wi khomile, va famba na yena, va n'wi yisa endlwini ya Muprista lonkulu. Kambe Petro a a landza hi le kule.

₅₅Loko va tshiverile ndzilo exivaveni, va orha, Petro na yena a tshama exikarhi ka vona. ₅₆Nandza un'wana wa wansati, loko a n'wi vona a tshamile a orha ndzilo, a n'wi langutisisa, a ku: “Loyi na yena, a a ri na munhu luya.” ₅₇Kambe Petro a kaneta, a ku: “Wansati ndziwena, a ndzi n'wi tivi mina munhu loyi!”

₅₈Endzhakunyana un'wana a n'wi vona, a ku: “Na wena, u wa vona.” Kambe Petro a ku: “Munhu ndziwena, a ndzi wa vona mina!”

₅₉Kuteloko ku hundzile awara yi ri yin'we, un'wana a tiyisa, a ku: “Hakunene, na yena loyi, a a ri na luya; swi tiyile hikuva i Mugaleliya.” ₆₀Kambe Petro a ku: “Munhu ndziwena, a ndzi tivi leswi u swi vulaka!” A ku a ha vulavula, nkuku wu ringa. ₆₁Kutani Hosi yi hundzuluka, yi languta Petro; kavaloko Petro a tsundzuka rito ra Hosi, loko yi te ka yena: “Nkuku wu nga si ringa, u ta va u ndzi landzurile kanharhu.” ₆₂Kutani Petro a humela handle, a ya rila hi xiviti.

₆₃Kutani vavanuna lava khomeke Yesu, va n'wi tseketsela, va n'wi ba. ₆₄Kuteloko va n'wi bohile mahlo, va n'wi vutisa va ku: “Vhumbha loyi a ku beke.” ₆₅Kutani va n'wi rhuketela hi swin'wana leswo tala.

₆₆Loko byi xile, vakulukumba va tiko, va nga vaprista lavakulu ni vatsari, va hlengeletana; kutani va yisa Yesu ehubyeni ya vona. ₆₇Va ku ka yena: “Loko u ri Mesiya, hi byele!” Yena a va hlamula a ku: “Hambi ndzi mi byela, a mi nga pfumeri, ₆₈ni loko ndzi mi vutisa, a mi nga hlamuri. ₆₉Ku sukela sweswi, N'wana-wa-Munhu ú ta tshama evokweni ra xinene ra Xikwembu xa matimba hinkwawo.”

₇₀Hinkwavo va n'wi hlamula va ku: “Xana hileswaku u N'wana wa Xikwembu ke?” A ku ka vona: “Ma vula leswaku ndzi yena.” ₇₁Kutani va ku: “Ha ha lavela yini vumbhoni xana? Na hina hi swi twile swi huma enon'wini wa yena.”