Luka 19

₁Kutani Yesu a nghena emutini wa Yeriko, a tsemakanya exikarhi ka wona. ₂Emutini lowu a ku ri ni munhu loyi a va ku i Zakiya; a a ri hosi ya valuvisi, a fuwe ngopfu. ₃A a navela ku vona Yesu leswaku i munhu wa njhani. Kambe a a siveriwa hi ntshungu, hikuva a a komile. ₄Kutani a tsutsumela emahlweni, a khandziya emurhini wa nkuwa, leswaku a ta vona Yesu, loko a ri karhi a hundza hi kwalaho. ₅Loko Yesu a fika kona, a languta henhla a n'wi vona, kutani a ku ka yena: “Zakiya, hatlisa u xika, hikuva ndzi fanela ku ya tshama emutini wa wena namuntlha.” ₆Zakiya a hatla a xika, a n'wi amukela hi ku tsaka. ₇Kambe loko vanhu va swi vona, va vilela hinkwavo va ku: “Ú nghenile eka wanuna wa mudyohi ku ya rhurheriwa kona.”

₈Hiloko Zakiya a suka a yima, a ku ka Hosi: “Vona Hosi, ndzi ta avanyisa rifuwo ra mina hi le xikarhi, ndzi nyika swisiwana; ni loko ndzi tekile xilo xa munhu hi ku n'wi xisa, ndzi ta n'wi tlherisela xona ka mune.” ₉Endzhaku ka sweswo, Yesu a ku: “Namuntlha ku ponisiwa ku nghenile emutini lowu, hileswi munhu loyi na yena a nga n'wana Abrahama, ₁₀hikuva N'wana-wa-Munhu ú tile ku ta lava ni ku ta ponisa lava lahlekeke.”

₁₁Kakuloko va ha yingisa timhaka teto, Yesu a engeta a va byela xifaniso, hikuva a a ri kusuhi na Yerusalema, kutani vona a va ehleketa leswaku Mfumo wa Xikwembu wu ta hatla wu humelela.

₁₂A ku: “Nkulukumba un'wana a tilunghisela ku ya etikweni ra le kule, a ya vekiwa ku va hosi, a ta tlhela a vuya. ₁₃Kutani a vitana malandza ya yena ya khume, a nyika un'wana ni un'wana epondho, a ku ka vona: ‘Bindzulani ha yona ndzi ko ndzi vuya.’ ₁₄Kambe varikwavo a va n'wi venga. Loko a fambile, va sala va rhuma tintsumi, ti ya vula ti ku: ‘Munhu loyi, a hi lavi ku fumiwa hi yena!’

₁₅“Siku nkulukumba a vuyaka, a vekiwe ku va hosi, a lerisa leswaku malandza lawa a nga ma nyika mali, ma vitaniwa, leswaku a ta tiva leswi un'wana ni un'wana a bindzuleke swona. ₁₆Ku fika lowo rhanga a ku: ‘Hosi, pondho ya wena yi bindzurile khume ra tipondho.’ ₁₇Hosi yi ku ka yena: ‘Hiswona, nandza lonene; leswi u tshembekeke emhakeni leyitsongo ngopfu, u ta fuma miti ya khume.’ ₁₈Lowa vumbirhi na yena, a ta a ku: ‘Pondho ya wena hosi, yi bindzule ntlhanu wa tipondho.’ ₁₉Hosi yi ku ka yena: ‘Wena ke, fuma miti ya ntlhanu.’ ₂₀Un'wana a ta, a ku: ‘Hosi, pondho ya wena hi leyi, ndzi yi phutsele hi duku; ₂₁a ndzi ku chava, hikuva u munhu wo nonon'hwa, u teka lexi u nga xi vekangiki, u tshovela lexi u nga xi byalangiki.’ ₂₂Hosi yi hlamula yi ku: ‘Wena nandza lowo biha, ndzi ta ku avanyisa hi ku vulavula ka wena. A wu swi tiva leswaku ndzi munhu wo nonon'hwa, ni leswaku ndzi teka lexi ndzi nga xi vekangiki, ni ku tshovela lexi ndzi nga xi byalangiki! ₂₃Hikwalaho ka yini u nga vekanga mali ya mina eka vabindzurisi xana? Eku vuyeni ka mina, a ndzi ta va ndzi yi tekile swin'we ni bindzu ra yona.’ ₂₄Kutani a ku ka lava a va ri kona kwalaho: ‘N'wi tekeleni pondho, mi yi nyika loyi a nga ni tipondho ta khume.’ [ ₂₅Va ku ka yena: ‘Kambe, Hosi, ú ni khume ra tipondho!’] ₂₆Yena a ku: ‘Ndza mi byela leswaku ku ta nyikiwa un'wana ni un'wana la nga ni xanchumu; kambe loyi a nga riki na nchumu, ú ta tekeriwa ni lexi a nga na xona. ₂₇Loko va ri valala va mina lava nga lavangiki leswaku ndzi va fuma, va tiseni kwala, mi va dlaya emahlweni ka mina.’ ”

₂₈Kuteloko a vulavurile timhaka teto, a hundzela emahlweni, a tlhandlukela eYerusalema.

₂₉Loko a tshinelela Betefage na Betaniya, kusuhi ni ntshava leyi vuriwaka ya Mitlhwari, a hlawula vambirhi exikarhi ka vadyondzisiwa va yena a ku ka vona: ₃₀“Yanani emutini lowu vonakaka lahaya; loko mi nghena ka wona, mi ta kuma ximbhongolwana lexi bohiweke, lexi nga si gadiwaka hi munhu; xi ntshunxeni, mi ta na xona haleno. Loko munhu a mi vutisa a ku: ₃₁‘Mi xi ntshunxela yini?’ mi ta ku: ‘Hosi ya xi lava.’ ”

₃₂Lava rhumiweke va famba, va ya kuma swi ri hilaha a nga va byela hakona. ₃₃Loko va ntshunxa ximbhongolwana, vini va xona va va vutisa, va ku: “Ximbhongolwana xexo mi xi ntshunxela yini ke?” ₃₄Vona va ku: “Hosi ya xi lava.” ₃₅Kutani va ta na xona eka Yesu; va kapeka tinguvu ta vona ehenhla ka xona, va gadisa Yesu. ₃₆Kakuloko a ri karhi a famba, va andlala tinguvu ta vona endleleni.

₃₇Kutani loko a ri kusuhi ni ku rhelela Ntshava ya Mitlhwari, ntshungu hinkwawo wa vadyondzisiwa wu sungula ku tsaka, wu dzunisa Xikwembu hi rito leri tlakukeke, hikwalaho ka mahlori hinkwawo lawa va ma voneke, va ku:

₃₉Kutani Vafarisi van'wana, lava a va ri entshungwini, va ku ka yena: “Mudyondzisi, miyeta vadyondzisiwa va wena.” ₄₀A va hlamula a ku: “Ndza mi byela leswaku, loko vona va miyela, maribye ma ta huwelela.”

₄₁Kuteloko a fikile kusuhi ni muti, a wu vona, a wu rilela, ₄₂a ku: “Yo! Loko ingi na wena a wu tivile namuntlha timhaka leti ti nga tisaka ku rhula, kambe u lo fihleriwa tona sweswi. ₄₃Hakunene nkarhi wa ta, lowu valala va wena va nga ta aka makhokholo, va ku rhendzela ha wona, va ku sivelela matlhelo hinkwawo; ₄₄va ta ku hirimuxela hansi, va herisa ni lava akeke ka wena; kutani valala va nga ka va nga tshiki ribye ehenhla ka ribye laha ka wena, hikuva a wu tivanga nkarhi lowu u endzeriweke ha wona.”

₄₅Kuteloko a nghenile eTempeleni, a hlongola hinkwavo lava xavisaka kona, a ku ka vona:

₄₇Yesu a a dyondzisa eTempeleni masiku hinkwawo. Kambe vaprista lavakulu ni vatsari swin'we ni vakulukumba va tiko, a va lava ku n'wi dlaya. ₄₈Ntsena a va nga tivi lexi va nga ta xi endla, hikuva vanhu a va n'wi yingisa, va tsakela ngopfu marito ya yena.