Levhitika 5

₁“Loko munhu a vitaniwa ehubyeni ku ya nyika vumbhoni bya mahaka leyi a yi voneke loko yi humelela kumbe leyi a yi tivaka, kambe a yi fihla, ú ni xidyoho, kutani ú fanele ku rhwala nandzu wa yena. ₂Kumbe munhu a nga tshuka a khumba xilo lexi nyameke xo fana ni ntsumbu wa xiharhi, kumbe wa xifuwo, kumbe wa xihadyana xin'wana; hambiloko a nga swi tivi, ú nyamisiwile kutani ú ni nandzu. ₃Kumbe munhu un'wana a nga tshuka a khumbile thyaka rihi na rihi ra vanhu leri nyamisaka; hambiloko a nga swi tivi leswaku ú khumbile swin'wana, siku a swi tivaka ú ta va ni nandzu. ₄Kumbe munhu a nga tshuka a tiboha hi ku hlambanya leswaku a ta endla swin'wana, swi nga va leswo biha kumbe leswinene, kutani a nga rhangi hi ku tiehleketa swinene; ku nga va ku hlambanya kwihi na kwihi loku vanhu va nga tibohaka ha kona va nga tiehleketanga. Hambiloko xidyoho xa yena a nga xi tivi, siku a byeriwaka xona, ú ta va ni nandzu. ₅Loko munhu a tivangerile wun'wana wa milandzu leyi, ú ta fanela ku pfumela leswaku ú dyohile, ₆kutani a humesela HOSI Xikwembu mhamba leyi nga ta susa xidyoho lexi; a nga humesa xifuwo lexitsongo xa xisati, xo fana ni nyimpfu kumbe mbuti. Kutani muprista ú ta n'wi basisa exidyohweni lexi a xi endleke.

₇“Munhu wa kona a nga tshuka a pfumala xifuwo lexitsongo xo susa ha xona xidyoho lexi a xi endleke. Loko swi ri tano, ú ta humesela HOSI Xikwembu matuva mambirhi kumbe mavondlo mambirhi ya matuva, rin'we ri va ra mhamba yo susa swidyoho, lerin'wana ri va ra magandzelo lama hisiwaka. ₈Ú ta ta ni matuva lawa eka muprista, kutani muprista ú ta rhanga a humesa lera mhamba yo susa swidyoho; ú ta ri soholota nhamu, kambe a nga tsemi nhloko ya rona. ₉Kutani ú ta teka ngatinyana ya tuva leri ra mhamba yo susa swidyoho, a xuva ha yona lomu matlhelo ka alitari; ngati leyin'wana hinkwayo, ú ta yi kamela ehansi ka alitari; leyi hi yona mhamba yo susa swidyoho. ₁₀Tuva lera vumbirhi, muprista ú ta humesa ha rona magandzelo lama hisiwaka, hi ku ya hi nawu wa kona. Hi ndlela leyi, muprista ú ta va a basisile munhu loyi, kutani ú ta rivaleriwa swidyoho leswi a swi endleke.

₁₁“Loko munhu loyi a pfumala matuva mambirhi kumbe mavondlo mambirhi ya matuva yo susa ha wona xidyoho lexi a xi endleke, a nga humesa xintewana xin'we xa mapa lamanene yi va mhamba yo susa swidyoho leswi a swi endleke; mapa lawa, ma nga tshuki ma cheriwa mafurha kumbe murhi wa risuna, hikuva i mhamba yo susa swidyoho. ₁₂Munhu wa kona ú fanele ku yisa mapa lawa eka muprista, kutani muprista ú ta nusa yo tata xandla, ma va yo suma ha wona, a ma hisa alitarini, swin'we ni magandzelo lama hiseriwaka HOSI Xikwembu; leyi i mhamba yo susa swidyoho. ₁₃Hi ndlela leyi, muprista ú ta basisa munhu loyi eka xidyoho xihi na xihi lexi a xi endleke, kutani ú ta rivaleriwa. Mapa lawa ya saleke, ma ta va ya muprista, ku fana ni loko ku humesiwa magandzelo ya swa le masin'wini.”

₁₄HOSI Xikwembu xi ku ka Muxe: ₁₅“Munhu a nga tshuka a dyoha, kambe ku nga ri ha vomu, a rivala ku humesela mina Hosi mihlengo leyo hlawuleka. Munhu wo tano, ú fanele ku humesa rin'wana ra makhuna ya ntlhambi wa yena leri nga solekiki, ra nxavo lowu vekiwaka hi ku ya hi ntiko wa lexi ku pimiwaka ha xona, lexi hlayisiwaka exivandleni lexo hlawuleka; ú ta ta ni khuna leri, ri va gandzelo ro riha nandzu wa yena. ₁₆Tlhandlakambirhi, ú fanele ku humesa mihlengo leyi a a rivele ku yi humesa, a tlhandlekela hi xiphemu xa ⅕ xa nxavo wa kona, a ya nyika muprista. Muprista ú ta n'wi basisa hi khuna ra gandzelo ro riha milandzu, kutani ú ta rivaleriwa nandzu wa yena.

₁₇“Munhu loyi a dyoheke, kambe ku nga ri ha vomu, a endla xin'wana xa swilo leswi ndzi leriseke leswaku swi nga tshuki swi endliwa, ú ni nandzu; kutani ú fanele ku wu rhwala; ₁₈a pambula rin'wana ra makhuna ya ntlhambi wa yena, leri nga solekiki, ra nxavo wo ringana ni wa xifuwo xa magandzelo yo riha milandzu, kutani a ri yisa eka muprista. Muprista ú ta basisa munhu loyi, kutani ú ta rivaleriwa xihoxo lexi a xi endleke ku nga ri ha vomu. ₁₉Munhu loyi ú ni nandzu emahlweni ka mina HOSI, kutani lawa hi wona magandzelo yo riha nandzu wa kona.”