Levhitika 3

₁“Loko munhu a humesa magandzelo ya xinakulobye hi xin'wana xa swifuwo swa yena leswikulu, ú fanele ku pambula lexi nga solekiki xa xinuna kumbe xa xisati, a ya na xona emahlweni ka HOSI Xikwembu. ₂Kutani ú ta tlhandleka voko enhlokweni ya xifuwo enyangweni ya Ntsonga lowo Hlawuleka, a xi tlhavela kwalaho. Vaprista, va nga vana va Aroni, va ta teka ngati ya xifuwo, va xuva ha yona alitari matlhelo hinkwawo. ₃Eka magandzelo lawa ya xinakulobye, leswi a nga ta swi humesa yi va mhamba leyi hiseriwaka HOSI Xikwembu, i mpambani, ni mafurha hinkwawo lama khomaneke ni swa le ndzeni, ₄ni tinso hi timbirhi ka tona, ni mafurha ya kona; tinso leti ti fanele ku tsemiwa swin'we ni tlhelo lero saseka ra xivindzi. ₅Kutani vana va Aroni va ta swi teka va swi hisa ehenhla ka alitari, swin'we ni magandzelo lama nga ta va ma ri endzilweni. Leyi i mhamba leyi hiseriwaka HOSI Xikwembu, leyi ku nun'hwela ka yona ku nga ta xi tsakisa.

₆“Loko munhu a humesela HOSI Xikwembu magandzelo ya xinakulobye hi xin'wana xa swifuwo swa yena leswitsongo, ú fanele ku pambula xa xinuna kumbe xa xisati, lexi nga solekiki a humesa xona. ₇Loko lexi a humesaka xona yi ri nyimpfu, ú fanele ku ya na yona emahlweni ka HOSI Xikwembu, ₈a fika a tlhandleka voko ra yena enhlokweni ya yona, a yi tlhava emahlweni ka Ntsonga lwo Hlawuleka, kutani vana va Aroni va ta teka ngati ya yona va xuva ha yona alitari matlhelo hinkwawo. ₉Eka magandzelo lawa ya xinakulobye, leswi munhu loyi a nga ta swi humesa swi va mhamba leyi hiseriwaka HOSI Xikwembu, hi leswi: Mafurha, ni ncila hinkwawo, wu tsemiwa hi le khondzweni, ni mpambani, ni mafurha hinkwawo lama khomaneke ni swa le ndzeni, ₁₀ni tinso hi timbirhi ka tona, ni mafurha ya kona; tinso leti ti fanele ku tsemiwa swin'we ni tlhelo lero saseka ra xivindzi. ₁₁Kutani muprista ú ta hisa swilo leswi ehenhla ka alitari, swi va swakudya leswi swi humeseriwaka HOSI Xikwembu.

₁₂“Loko munhu a humesa mbuti, ú fanele ku ya na yona emahlweni ka HOSI Xikwembu, ₁₃a fika a tlhandleka voko ra yena enhlokweni ya yona, a yi tlhava emahlweni ka Ntsonga lowo Hlawuleka, kutani vana va Aroni va ta teka ngati ya yona, va xuva ha yona alitari matlhelo hinkwawo. ₁₄Leswi a fanelaka ku swi humesa leswaku swi va mhamba leyi hiseriwaka HOSI Xikwembu, hi leswi: Mpambani, ni mafurha hinkwawo lama khomaneke ni swa le ndzeni, ₁₅ni tinso hi timbirhi ka tona, ni mafurha ya kona; tinso leti ti fanele ku tsemiwa swin'we ni tlhelo lero saseka ra xivindzi. ₁₆Kutani muprista ú ta swi hisa ehenhla ka alitari, swi va swakudya leswi hisiwaka, leswi ku nun'hwela ka swona ku tsakisaka. Mafurha hinkwawo i ya HOSI Xikwembu. ₁₇Hinkwako lomu mi nga ta va mi tshama kona, mi nga tshuki mi dya mafurha kumbe ngati. Nawu lowu, mi fanele ku wu landza, n'wina ni vatukulu va n'wina hilaha ku nga heriki.”