Levhitika 1

₁HOSI Xikwembu xi vitana Muxe, xi vula-vula na yena xi ri eka Ntsonga lowo Hlawuleka, xi n'wi byela ₂ku ya vulavula ni Vaisraele, a ku ka vona: “Loko un'wana wa n'wina a lava ka humesela HOSI Xikwembu magandzelo, ú fanele ku pambula xin'wana xa swifuwo swa yena leswikulu kumbe leswitsongo, a humesa xona.

₃“Loko munhu a humesa magandzelo lama hisiwaka hi xin'wana xa swifuwo swa yena leswikulu, ú fanele ku hlawula nkuzi leyi nga solekiki, a ya yima na yona enyangweni ya Ntsonga lowo Hlawuleka, leswaku a ta tsakeriwa hi HOSI Xikwembu. ₄Kutani ú ta tlhandleka voko enhlokweni ya xifuwo xa magandzelo lama hisiwaka, leswaku xi ta n'wi yimela, xi va xo basisa swidyoho swa yena. ₅Kutani ú ta tlhava nkuzi emahlweni ka HOSI Xikwembu. Vaprista, va nga vana va Aroni, va ta teka ngati va yi humesela HOSI Xikwembu hi ku xuva ha yona alitari matlhelo hinkwawo, enyangweni ya Ntsonga lowo Hlawuleka. ₆Munhu wa kona ú ta yevula nkuzi ya magandzelo lama hisiwaka, a tsemelela nyama ya yona. ₇Kutani vana va muprista Aroni va ta tlhandleka tihunyi alitarini, va tshivela ndzilo, ₈kutani va teka nyama leyi tsemeleriweke, ni nhloko, ni mafurha, va swi veketela ehenhla ka ndzilo lowu nga alitarini. ₉Loko swi ri swa le ndzeni ni manqina, swi fanele ku rhanga swi hlantswiwa. Kutani muprista ú ta hisa nyama hinkwayo alitarini. Lawa i magandzelo lama hisiwaka; hi yona mhamba leyi hiseriwaka HOSI Xikwembu, leyi ku nun'hwela ka yona ku nga ta xi tsakisa.

₁₀“Loko munhu a lava ku humesa magandzelo lama hisiwaka hi yin'wana ya tinyimpfu ta yena kumbe timbuti ta yena, ú fanele ku tlhava leyi nga solekiki ya xinuna. ₁₁Xifuwo xa kona a a xi tlhave emahlweni ka HOSI Xikwembu, hi tlhelo ra n'walungu ra alitari. Vaprista, va nga vana va Aroni, va ta teka ngati ya xifuwo, va xuva ha yona alitari matlhelo hinkwawo. ₁₂Loko a xi tsemelerile, muprista ú ta teka nyama ya kona, ni nhloko, ni mafurha, a swi veketela ehenhla ka ndzilo lowu nga alitarini. ₁₃Loko swi ri swa le ndzeni ni manqina, swona ú fanele ku rhanga a swi hlantswa. Kutani muprista ú ta teka nyama hinkwayo a yi hisa ehenhla ka alitari. Lawa i magandzelo lama hisiwaka; hi yona mhamba leyi hiseriwaka HOSI Xikwembu, leyi ku nun'hwela ka yona ku nga ta xi tsakisa.

₁₄“Loko munhu a lava ku humesela HOSI Xikwembu yin'wana ya tinyanyana, a endla ha yona magandzelo lama hisiwaka, ú fanele ku humesa matuva kumbe mavondlo ya matuva. ₁₅Muprista ú ta ya ni tuva ra kona alitarini, a fika a ri soholota nhamu, a khatlula nhloko a yi hisa, kutani a kamela ngati ya rona ematlhelo ya alitari. ₁₆N'winyi wa tuva ú ta teka chelele ra rona ni tinsiva, a swi cukumeta etaleni leri nga kusuhi ni alitari, hi tlhelo ra le vuxeni. ₁₇Kutani ú ta handzula tuva hi le xikarhi hi ku ri khoma hi timpiko, kambe a nga ri chaputi! Kutani muprista ú ta ri hisa endzilweni lowu nga henhla ka alitari. Lawa i magandzelo lama hisiwaka; hi yona mhamba leyi hiseriwaka HOSI Xikwembu, leyi ku nun'hwela ka yona ku nga ta xi tsakisa.