Ta ku herisiwa ka muti wa Ayi
1Kutani HOSI Xikwembu xi ku ka Yoxuwa: “U nga chavi nchumu, naswona u nga heli matimba; teka masocha hinkwawo u famba na wona mi tlhandlukela emutini wa Ayi. Vona, ndzi nyiketile hosi ya muti wa Ayi, ni vanhu va yona, ni muti wa yona ni tiko ra yona emavokweni ya wena. 2U fanele ku endla muti wa Ayi ni hosi ya wona leswi u swi endleke muti wa Yeriko ni hosi ya wona; kambe leswi mi nga ta phangha eka wona ni swifuwo leswi mi nga ta swi teka swi ta va swa n'wina. U fanele ku veka vanhu endzhaku ka muti lowu, va tumbelela vaaki va wona.”
3Kavaloko Yoxuwa ni masocha hinkwawo va tilulamisela ku tlhandlukela emutini wa Ayi; kutani Yoxuwa a hlawula tinhenha ta matimba ta 30 000, a ti rhuma nivusiku, 4a ti lerisa a ku: “Vonani, mi fanele ku ya tumbelela vaaki va muti wa Ayi endzhaku ka wona; mi nga tumbeli kule na wona, kambe mi tshama mi lunghekile minkarhi hinkwayo. 5Mina ni vanhu hinkwavo lava ndzi nga na vona hi ta kongoma muti wa Ayi. Kutani loko va huma va hi tela ku fana ni le ku sunguleni, hi ta suka hi titsutsumisa ha vomu. 6Kutani va ta huma va hi hlongorisa, ku kondza hi va humesa emutini, hikuva va ta ku: ‘Va hi tsutsuma ku fana ni le ku sunguleni.’ Hi ta suka hi va tsutsuma hi mukhuva wolowo, 7kambe n'wina mi ta huma laha mi nga ta va mi tumberile kona, mi teka muti wa Ayi, hikuva HOSI Xikwembu xa n'wina xi ta wu nyiketa emavokweni ya n'wina. 8Kutani loko mi tekile muti, mi ta wu hisa hi ndzilo, hilaha HOSI Xikwembu xi leriseke hakona; mi tsundzuka leswi ndzi mi leriseke swona!” 9Kutani Yoxuwa a va byela leswaku va famba; kutani va ya endhawini leyi a va fanele ku ya tumbela eka yona, exikarhi ka muti wa Betele ni wa Ayi, hi tlhelo ra vupeladyambu bya muti wa Ayi; kambe vusiku byebyo Yoxuwa a a sele ni vanhu lavan'wana emixaxeni.
10Yoxuwa a pfuka nimpundzu swinene a hlengeleta masocha, kutani va tlhandluka va kongoma emutini wa Ayi, yena ni vakulukumba va Israele va rhangile emahlweni. 11Masocha hinkwawo lawa a a ri na wona ma tlhandluka ma ya fika ekusuhi ni muti wa Ayi, ma gova kona hi tlhelo ra n'walungu. Exikarhi ka masocha ni muti wa Ayi a ku ri ni xinkobyana. 12Kutani Yoxuwa a teka vavanuna va kwalomu ka 5 000 a ya va tumbeta exikarhi ka muti wa Betele ni wa Ayi, hi tlhelo ra vupeladyambu. 13Kutani va dzima mixaxa ya mavuthu, nxaxa lowukulu wu va hi tlhelo ra n'walungu ra muti, kasi wa varindzi wu va hi tlhelo ra vupeladyambu bya muti. Kambe vusiku byebyo Yoxuwa yena a sale a a tshamile enkoveni. 14Kuteloko hosi ya muti wa Ayi ni vanhu va yona hinkwavo va vona leswi, va pfuka ka ha ri mpundzu va hatla va rhelela, va kongoma eka Nkova wa Yordani ku ya hlangana ni Vaisraele va lwa; kambe hosi leyi a yi nga swi tivi leswaku ku ni vanhu lava nga yi tumbelela endzhaku ka muti. 15Kutani Yoxuwa ni Vaisraele hinkwavo va endla wonge va va chava, va suka va tsutsuma va kongoma emananga. 16Kutani vanhu hinkwavo va muti wa Ayi va vitaniwa leswaku va ya hlongorisa Vaisraele. Loko va ri karhi va hlongorisa Yoxuwa, va yile va ya fika kule ni muti wa Ayi. 17Kutani muti wa Ayi wu sala wu nga ha ri na munhu; hinkwavo a va humile va hlongorisa Vaisraele, va sukela muti wu nga ri na varindzi.
18Kutani HOSI Xikwembu xi ku ka Yoxuwa: “Tlakusa tlhari leri nga vokweni ra wena u kombetela muti wa Ayi ha rona, hikuva muti lowu ndzi ta wu nyiketa emavokweni ya wena.” Kutani Yoxuwa a tlakusa tlhari leri a a ri khomile, a kombetela muti wa Ayi. 19Kuteloko Yoxuwa a tlakusa voko, masocha lawa a ma tumberile ma hatlisa ma huma lomu a ma ri kona, ma tsutsumela emutini wa Ayi, ma fika ma nghena ma wu teka, kutani ma hatla ma wu hisa hi ndzilo. 20Vavanuna va muti wa Ayi va te loko va languta endzhaku, vo vona musi wu ri karhi wu tuvika emutini; kutani va hela matimba va nga ha tivi lomu va nga ta tsutsumela kona, hikuva vavanuna va Israele lava a va tsutsumela emananga a va hundzukele lava a va va hlongorisa. 21Kuteloko Yoxuwa ni Vaisraele hinkwavo va vona leswaku masocha lawa a ma tumberile ma tekile muti, va vona ni musi wu ri karhi wu tuvika, va hundzuluka va hlasela vavanuna va Ayi. 22Vaisraele lavan'wana na vona va huma emutini wa Ayi va ta eku hlaseleni, kutani Vaisraele va rhendzela vanhu va Ayi, va va siya exikarhi, va va dlayetela hinkwavo ku nga baleki na un'we naswona ku nga sali na un'we wa mhamba. 23Kambe hosi ya muti wa Ayi yona va yi khoma va yi yisa eka Yoxuwa yi ri karhi yi hanya.
24Vaisraele va dlayeterile vaaki va muti wa Ayi lava a va va hlongorisa, va va herisa hi fumu hinkwavo emananga. Loko va hetile, Vaisraele hinkwavo va tlhelela emutini wa Ayi va ya fika va herisa vaaki va wona hi fumu. 25Hi siku rero vaaki va muti wa Ayi lava a va ri 12 000, vavanuna ni vavasati, va dlayiwile hinkwavo. 26Voko leri Yoxuwa a a tlakusile tlhari ha rona, a nga ri yisanga ehansi ku kondza ku herisiwa vaaki va muti wa Ayi hinkwavo. 27Vaisraele va lo teka ntsena swifuwo ni swilo leswi va swi phangheke emutini wa Ayi, va famba na swona hilaha HOSI Xikwembu xi leriseke Yoxuwa hakona. 28Kutani Yoxuwa a hisa muti wa Ayi a wu siya wu ri rhumbi; ni namuntlha muti lowu wa ha ri rhumbi. 29Hosi ya muti wa Ayi, Yoxuwa ú yi hayekile emurhini, a yi tshika kona dyambu ri kondza ri pela; kutani nimadyambu Yoxuwa a lerisa vanhu leswaku va ya hawula ntsumbu wa yona emurhini, va ya wu cukumeta enyangweni leyi nghenaka emutini wa Ayi, va tlhela va fumba maribye ehenhla ka wona ma endla nhulu leyikulu; nhulu leyi ya ha ri kona ni namuntlha.
Ta ku tsariwa ka nawu entshaveni ya Ebali
30Kutani Yoxuwa a akela HOSI Xikwembu xa Israele alitari entshaveni ya Ebali, 31ku landza leswi Muxe nandza wa HOSI Xikwembu a leriseke Vaisraele swona, hilaha swi tsariweke hakona eka Buku ya Nawu wa Muxe: “Alitari leyi akiweke hi maribye lama nga vatliwangiki, lama ku nga riki na munhu loyi a ma khumbeke hi mbatlo.” Kutani va humesela HOSI Xikwembu magandzelo lama hisiwaka ni ya xinakulobye ehenhla ka yona. 32Loko va ri kwale, Yoxuwa a tsala nawu ehenhla ka maribye, Vaisraele va ri karhi va swi vona, wu nga nawu lowu a wu tsariwile hi Muxe. 33Kutani vanhu va rixaka ra Israele ni lava luveleke exikarhi ka vona, swin'we ni vakulukumba, ni varhangeri ni vaavanyisi, va yima ematlhelo ka Areka emahlweni ka vaprista va ka Levhi lava rhwaleke Areka ya Ntwanano wa HOSI Xikwembu. Hafu ya vona a yi yimile yi languta ntshava ya Garizimi, kasi hafu leyin'wana a yi yimile yi languta ntshava ya Ebali, hilaha Muxe nandza wa HOSI Xikwembu a leriseke hakona eku sunguleni, leswaku Vaisraele va fanele ku katekisiwa. 34Kutani endzhaku ka sweswo, Yoxuwa a hlaya marito hinkwawo ya ku katekisa ni ya ndzhukano hilaha ma tsariweke hakona eka Buku ya Nawu. 35Yoxuwa a nga tlulanga hambi ri ri rito ni rin'we ra lawa Muxe a ma leriseke. Ú hlayerile ntshungu hinkwawo wa Vaisraele. Vavasati, ni vana, ni vanhu lava luveleke exikarhi ka Vaisraele, na vona a va ri kona.
