Yobo 27

₂“Ndzi hlambanya hi Xikwembu lexi hanyaka, lexi-nga-ni-matimba-hinkwawo,

xona xi alaka ku ndzi lwela, xi ndzi dyisaka ni mbitsi, ndzi ri:

₃Loko ndza ha hefemula,

ni loko Xikwembu xa ha hlayisa vutomi bya mina,

₄ndzi nga ka ndzi nga vuli leswo biha,

nomo wa mina wu nge kanganyisi munhu.

₅Ndzi nge pfuki ndzi vurile leswaku marito ya n'wina i ntiyiso,

ndzi ta tiyisa leswaku ndzi hava nandzu ndzi ko ndzi fa.

₆Ndzi khomile ku lulama ka mina, ndzi nge ku tshiki;

ndza swi tiva: A ndzi endlanga swa tingana ni siku ni rin'we.

₇“Nala wa mina a a biwe kukota lavo homboloka,

la lwaka na mina a a love kukota vadyohi.

₈Siku Xikwembu xi tsemaka vutomi bya lava va xi sandzaka, xi va lovisa,

va ha ta tshemba yini, xana?

₉Loko va wela hi khombo, hambi va huwelela,

xi nga ka xi nga va yingisi,

₁₀hikuva a hi vona va tsakelaka Xikwembu-xa-matimba-hinkwawo,

a hi vona va xi khongelaka masiku hinkwawo.

₁₁“Mina ndza ha ta mi dyondzisa matirhele ya Xikwembu,

makungu ya Lowa-matimba-hinkwawo a ndzi nga mi fihleli.

₁₂N'wina hinkwenu, leswi humeleleke mi swi vonile,

hikwalaho ka yini mi tikanganyisa hi swilo swa hava, xana?”

₁₃“Lavo homboloka va averiwa leswi hi Xikwembu,

hi yona ndzhaka leyi vaxanisi va yi kumaka eka Lowa-matimba-hinkwawo:

₁₄Hambiloko va veleka vana lavo tala, va ta tekeriwa vona hi matlhari,

vatukulu va vona va nge dyi va xurha.

₁₅Masalela ya vona ma ta dlawa hi ntungu,

a va nga riliwi hi vasati va vona.

₁₆Hambiloko va hlengeleta mali yo ringana maribye hi ku tala,

va tata miti ya vona hi swiambalo onge i misava yinene,

₁₇swi ta ambariwa hi lavo lulama,

mali yona yi ta phakeriwa lava nga riki na nandzu.

₁₈Tindlu ta lavo homboloka i xisaka xa tuva,

ti fana ni dladla ra murindzi emasin'wini.

₁₉Van'wankumi va ya eku etleleni va ha fumile,

kambe loko va pfuka, swi nyamalarile!

₂₀Makhombo ma va khubumeta kukota ndhambi,

nivusiku va biwa hi xidzedze.

₂₁Moya wa le vuxeni wu va tlakula va nga ha vonaki,

wu va hahisa va suka etindhawini ta vona.

₂₂Xihuhuri xi va ba xi nga tsetseleli,

va balekela ntamu wa xona va tsutsuma;

₂₃siku va fambaka, vanhu va phokotela mavoko hi ku tsaka,

va ba minkulungwana emitini ya vona.”