Yobo 18

₂“We Yobo, u ta tshika rini ku phyaphyarha xana?

Tianakanye, hi ta kota ku vulavula na wena.

₃Hikwalaho ka yini u hi fanisa ni swifuwo ke?

Hi ku vona ka wena, hi lo dadavala ke?

₄Hi ku hlundzuka ka wena loku, u tivangela ku vaviseka.

Xana misava yi fanele ku onhiwa,

kumbe maribye ma fanele ku yimburiwa ku tsakisa wena ke?

₅“Hakunene, lowo homboloka ú tekeriwa ku vonakala,

ndzilo wa timeka exitikweni xa yena.

₆Entsongeni wa yena ku ni xinyami,

rivoni ra yena a ra ha pfurhi.

₇Magoza ya yena ya xinuna ma hungutiwa,

makungu ya yena ma n'wi phija a wa.

₈Milenge ya yena yi n'wi yisa eritavaleni,

a hojomela ekheleni,

₉ntlhamu wu n'wi phasa nenge,

a khomiwa hi rigoda.

₁₀Lomu a hundzaka hi kona, ku vambiwe ngoti,

ú rhiyeriwe xirimbana endleleni.

₁₁Makhombo layo chavisa ma n'wi sale ndzhaku,

ma n'wi tela hi matlhelo hinkwawo.

₁₂Ndlala yi n'wi heta matimba,

ú le kusuhi ni ku wela hi ntungu,

₁₃wu borisa nhlonge ya miri wa yena,

a dlawa hi vuvabyi bya kona.

₁₄Va n'wi susa emutini wa yena, lowu a a tshamisekile eka wona,

a nyiketiwa eka mufumi wa xivandla xa vafi.

₁₅Etindlwini ta yena, ku tshama vanhu vambe,

muti wa yena wu herisiwa hi xivavula.

₁₆Ú fana ni murhi wo oma timitsu,

lowu matluka ya wona ma vunaka.

₁₇Etikweni a nga ha tivi hi munhu,

vito ra yena ri nyamalala evanhwini.

₁₈Ú susiwa eku vonakaleni, a hoxiwa exinyamini,

va n'wi hlongola a suka emisaveni.

₁₉Exikarhi ka va ka vona, a nga na mudyandzhaka,

laha a a tshama kona, a ku sali munhu.

₂₀Evuxeni ni le vupeladyambu va chava loko va n'wi vona,

timhaka ta yena ta va rhurhumerisa.

₂₁Hi kona ku hela ka muti wa lowo homboloka,

ndhawu ya loyi a nga tiviki Xikwembu yi herisa sweswo!”