Yohane 18

₁Loko Yesu a vurile marito lawa, a huma ni vadyondzisiwa va yena, a pelela entsungeni wa xinambyana xa Kedroni. A ku ri ni ntanga kwalaho, kutani a ya nghena kona ni vadyondzisiwa va yena. ₂Yudasi muxengi na yena a a tiva ndhawu leyi, hikuva Yesu a a tala ku hlengeletana ni vadyondzisiwa va yena kona. ₃Yudasi a teka ntlawa wa masocha, ni malandza lama rhumiweke hi vaprista lavakulu ni Vafarisi, va ta ni timboni, ni swisana, ni matlhari.

₄Yesu, hi ku tiva hinkwaswo leswi swi nga ta n'wi humelela, a huma a ya ka vona, a ku: “Mi lava mani xana?” ₅Va n'wi hlamula, va ku: “Yesu wa Nazareta.” Yesu a ku ka vona: “Hi mina loyi!” Yudasi muxengi, na yena a a yimile na vona kwalaho. ₆Loko Yesu a te ka vona: “Hi mina loyi!” va tlhetlha hi xindzhakwa-ndzhakwana, va wa. ₇Kutani a va vutisa kambe a ku: “Mi lava mani xana?” Va ku: “Yesu wa Nazareta.” ₈Yesu a hlamula a ku: “Ndzi mi byerile ndzi ku: ‘Hi mina loyi.’ Loko kunene mi lava mina, tshikani lava, va tifambela.” ₉(A swi ri leswaku rito leri a nga ri vula ri hetiseka, loko a te: “A ndzi tshikanga na un'we wa lava u ndzi nyikeke vona, a lova.”)

₁₀Simoni Petro loyi a a ri ni banga, a ri hlomula, a tsema hlonga ra Muprista lonkulu, a ri phatlula ndleve ya xinene. Vito ra hlonga leri a va ku i Malko. ₁₁Hiloko Yesu a ku ka Petro: “Tlherisela banga ra wena enkotlotweni wa rona; xana a ndzi nga nwi exinwelweni lexi Tatana a ndzi nyikeke xona xana?”

₁₂Ntlawa wa masocha ni ndhuna leyikulu ya wona ni malandza ya Vayuda, va khoma Yesu, va n'wi boha.

₁₃Kutani va rhanga hi ku n'wi yisa eka Anasi. N'wana wa xisati wa Anasi a a tekiwile hi Kayafasi, Muprista lonkulu wa lembe rero. ₁₄Hi yena Kayafasi loyi a nga tshama a tsundzuxa Vayuda leswaku a swi ta antswa loko munhu un'we a fela vanhu hinkwavo.

₁₅Simoni Petro ni mudyondzisiwa un'wana va landza Yesu; mudyondzisiwa wa kona a a tiviwa hi Muprista lonkulu, kutani a nghena ehubyeni ya yindlu ya Muprista lonkulu na Yesu. ₁₆Kambe Petro a a yimile handle enyangweni. Hiloko mudyondzisiwa loyi un'wana la tiviwaka hi Muprista lonkulu, a huma a ya vulavula ni nandza wa xisati loyi a a ri mulanguteri wa nyangwa, kutani a nghenisa Petro. ₁₇Kutani nandza loyi wa xisati a ku ka Petro: “Xana a wu mudyondzisiwa wa munhu loyi ke?” A ku: “A ndzi yena.” ₁₈Mahlonga ni malandza a ma tshiverile ndzilo wa makala, hikuva a ku ri ni xirhami; kutani a va ri karhi va tinyawusa; na yena Petro a a yimile na vona, a tinyawusa.

₁₉Anasi Muprista lonkulu a vutisa Yesu hi ta vadyondzisiwa va yena ni ta ku dyondzisa ka yena. ₂₀Yesu a n'wi hlamula, a ku: “Ndzi vulavurile erivaleni emahlweni ka vanhu hinkwavo. Ndzi dyondzisile minkarhi hinkwayo emasinagogeni ni le Tempeleni, laha Vayuda hinkwavo va hlengeletanaka kona, a ndzi vulanga nchumu exihundleni. ₂₁Hikwalaho ka yini u vutisa mina? Vutisa lava va tweke leswi ndzi nga va byela swona; vona va swi tiva leswi ndzi swi vuleke.” ₂₂Loko Yesu a vurile sweswo, un'wana wa malandza, loyi a a yimile kwalaho, a ba Yesu hi mpama, a ku: “Xana hi rona hlamulele ra wena eka Muprista lonkulu xana?” ₂₃Yesu a n'wi hlamula, a ku: “Loko ndzi vulavurile hi ku hoxa, komba ku hoxa koloku, kambe loko ndzi vulavurile hi nawu wa kona, u ndzi bela yini xana?” ₂₄Kutani Anasi a n'wi rhumela a bohiwile eka Kayafasi, Muprista lonkulu loyi un'wana.

₂₅Simoni Petro a a yimile a ri karhi a tinyawusa. Va ku ka yena: “Xana na wena a wu un'wana wa vadyondzisiwa va yena ke?” Yena a kaneta, a ku: “A ndzi yena!” ₂₆Un'wana wa mahlonga ya Muprista lonkulu, xaka ra loyi Petro a n'wi tsemeke ndleve, a ku: “Xana a ndzi ku vonanga wena entangeni u ri na yena ke?” ₂₇Petro a engeta a kaneta; hi nomu lo, nkuku wu ringa.

₂₈Kutani va suka na Yesu eka Kayafasi, va n'wi yisa endlwini ya vuhosi. A wa ha ri mpundzu swinene; vona hi voxe a va nghenanga ndlwini ya vuhosi, ku endlela leswaku va nga tinyamisi, va ta kota ku dya nkhuvo wa Paseka. ₂₉Hikokwalaho Pilato a huma, a ya ka vona, kutani a ku: “Xana mi hehla munhu loyi hi nandzu wihi ke?” ₃₀Va hlamula va ku ka yena: “Loko munhu loyi a nga dyohanga, a hi nga ta n'wi nyiketa eka wena.” ₃₁Pilato a ku ka vona: “N'wi tekeni n'wina, mi ya n'wi avanyisa hi nawu wa ka n'wina.” Vayuda va ku ka yena: “Nawu a wu hi pfumeleli ku dlaya munhu.” ₃₂(Leswi a ku ri ku hetisa rito leri Yesu a tshamaka a ri vula loko a fanisa rifu leri a nga ta fanela ku fa ha rona.)

₃₃Pilato a tlhela a nghena endlwini ya vuhosi, a vitana Yesu, a ku ka yena: “Xana hi wena hosi ya Vayuda ke?” ₃₄Yesu a hlamula, a ku: “Xana leswi u swi vulaka, swi huma eka wena, kumbe u lo byeriwa hi van'wana ke?” ₃₅Pilato a hlamula a ku: “Xana ndzi Muyuda mina ke? Vanhu va ka n'wina ni vaprista lavakulu hi vona va ku nyiketeke ka mina. U endle yini xana?” ₃₆Yesu a hlamula, a ku: “Mfumo wa mina a hi wa misava leyi; loko a wu ri wa misava leyi, malandza ya mina a ma ta lwa leswaku ndzi nga nyiketiwi eka Vayuda; kambe hilaha swi nga hakona, mfumo wa mina a hi wa laha hansi.” ₃₇Pilato a ku ka yena: “Hikokwalaho, u hosi, a hi swona ke?” Yesu a hlamula, a ku: “Ku vula wena leswaku ndzi hosi. Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso. Un'wana ni un'wana la nga wa ntiyiso, ú yingisa rito ra mina.” ₃₈Pilato a ku ka yena: “Ntiyiso i ncini?”

Loko a vurisile sweswo, a huma kambe a ya eka Vayuda, a ku ka vona: “A ndzi voni nandzu ni wun'we eka yena. ₃₉Kambe mi ni ntolovelo wa leswaku ndzi mi ntshunxela munhu un'we hi nkarhi wa Paseka; xana mi lava leswaku ndzi mi ntshunxela hosi ya Vayuda ke?” ₄₀Va hlamula hi ku huwelela, va ku: “Ku nga ri munhu loyi, kambe Barabasi!” (Kasi Barabasi a a ri xigevenga.)