Yeremiya 38

₁Xefatiya n'wana Matani, na Gedaliya n'wana Paxahuru, na Yukala n'wana Xelemiya, na Paxahuru n'wana Malikiya, va twa Yeremiya loko a vulavula ni ntshungu hinkwawo, ₂a wu byela marito ya HOSI Xikwembu lama nge: “Lava nga ta sala emutini lowu va ta dlawa hi matlhari ni tindlala ni mintungu. Kambe lava humaka va ya tinyiketa eka Vakalediya va nge dlayiwi, va ta ponisa vutomi bya vona. ₃HOSI Xikwembu xi vula leswaku hakunene xi ta nyiketa muti lowu eka mavuthu ya hosi ya le Babilona, ma wu teka.” ₄Kutani vakulukumba va ya byela hosi Sedekiyasi va ku: “Wanuna loyi ú fanele ku dlawa, hikuva ku vulavula ka yena ku lolohisa masocha hinkwawo lama saleke emutini, ni vanhu van'wana hinkwavo. Munhu loyi ú va navelela leswo biha ematshan'wini ya leswo saseka.” ₅Hosi Sedekiyasi a ku: “Wanuna loyi ú le mavokweni ya n'wina. Mina hosi ndzi hava lexi ndzi nga xi endlaka ku mi sivela.” ₆Kutani va teka Yeremiya va n'wi hoxa ekheleni ra Malikiya n'wana hosi, va n'wi ehlisa kona hi tintambhu. Khele leri a ri ri exivaveni xa varindzi; a ri nga ri na mati, kambe a ri ri ni ndzhope, kutani Yeremiya a bodlhomela endzhopeni.

₇Muetiyopiya loyi va nge i Ebede-Meleke, un'wana wa vatirhi va le ntsindza, a twa leswaku Yeremiya ú hoxiwile ekheleni. Enkarhini wolowo hosi Sedekiyasi a a tshamile kusuhi ni Nyangwa-ya-Benjamini. ₈Kutani Ebede-Meleke a suka entsindza a ya vulavula na hosi a ku: ₉“We hosi n'wini wanga, vavanuna lava va endlile muprofeta Yeremiya emhaka leyo biha hi ku n'wi hoxa ekheleni; ú ta fela kona a dlawa hi ndlala, hikuva laha mutini a ka ha ri na swakudya.” ₁₀Hiloko hosi yi lerisa Ebede-Meleke lowa Muetiyopiya, yi ku: “Teka vavanuna vanharhu, u famba na vona, mi ya koka muprofeta Yeremiya a huma ekheleni, a nga si fa.” ₁₁Kutani Ebede-Meleke a hlawula vavanuna vanharhu, a ya na vona entsindza, a nghena endlwini yo hlayisela tinhundzu, a ya teka swiambalo swa khale leswi hlakaleke, a swi bohelela, kutani a swi xikisela Yeremiya hi ntambhu ekheleni; ₁₂kutani a lerisa muprofeta a ku: “Teka swiambalo leswi swa khale, u titsondzela hi swona swi ta hi le makheheleni, kutani u boha tintambhu ehenhla ka swona.” Yeremiya a endlisa sweswo, ₁₃kutani va n'wi humesa ekheleni hi ku n'wi koka hi tintambhu. Kutani Yeremiya a tlhela a tshama exivaveni xa varindzi.

₁₄Siku rin'wana, hosi Sedekiyasi a tlhela a rhuma vanhu ku ya vitana muprofeta Yeremiya, kutani a hlangana na yena kusuhi ni nyangwa ya vunharhu ya Tempele, a ku ka yena: “Ndzi lava ku tiva leswi HOSI Xikwembu xi ku byeleke swona. U nga ndzi fihleli mhaka ya kona!” ₁₅Yeremiya a n'wi hlamula a ku: “Loko ndzi ku byela swona, u ta ndzi dlaya hakunene! Ni loko ndzi ringeta ku ku komba tindlela, a wu nga ndzi twi!” ₁₆Hiloko hosi Sedekiyasi a hlambanyela Yeremiya va ri vambirhi exihundleni, a ku: “Ndzi tiyisa emahlweni ka HOSI Xikwembu lexi hanyaka, muendli wa hina, ndzi ri, ndzi nga ka ndzi nga ku dlayi, naswona a ndzi nga ku nyiketi eka vavanuna lava ringetaka ku ku dlaya.”

₁₇Kutani Yeremiya a ku ka Sedekiyasi: “HOSI Xikwembu xa matimba hinkwawo, xona Xikwembu xa Israele, xi vula leswaku loko u huma eYerusalema u ya tinyiketa eka tindhuna ta hosi ya le Babilona, u ta ponisa vutomi bya wena, na wona muti lowu a wu nga hisiwi; u ta pona wena ni ndyangu wa wena hinkwawo. ₁₈Kambe loko u ala ku ya tinyiketa eka tindhuna ta hosi ya le Babilona, muti wa Yerusalema wu ta wela emavokweni ya Vakalediya; va ta wu hisa, kutani na wena a wu nga phonyoki emavokweni ya vona.” ₁₉Hosi Sedekiyasi a hlamula a ku ka Yeremiya: “Lava ndzi va chavaka, hi vona va ka Yuda lava tinyiketeke eka Vakalediya, hikuva loko ndzo tshuka ndzi werile emavokweni ya vona, va ta ndzi xanisa.” ₂₀Yeremiya a ku: “Vanhu volavo, u nga ka u nga nyiketiwi emavokweni ya vona. Ndzi kombela leswaku u amukela leswi ndzi ku byelaka swona swi ri leswi humaka eka HOSI Xikwembu, kutani u ta kateka, u ponisa ni vutomi bya wena. ₂₁Kambe loko u ala ku ya tinyiketa eka Vakalediya, ku ta humelela leswi Hosi Xikwembu xi ndzi kombeke swona hi xivono: ₂₂Vavasati hinkwavo lava va ha saleke emutini wa wena we hosi ya Yuda, va ta humesiwa ka wona va yisiwa eka tindhuna ta hosi ya le Babilona; kutani va ta ku hlekula va ku:

₂₃Yeremiya a engeta a ku ka Sedekiyasi: “Vasati va wena ni vana va wena va xinuna na vona va ta humesiwa emutini va yisiwa eka Vakalediya. Loko u ri wena, u nga ka u nga poni emavokweni ya vona: Hosi ya le Babilona yi ta ku khoma, kutani muti wa Yerusalema wu ta hisiwa.”

₂₄Kutani Sedekiyasi a ku ka Yeremiya: “U nga byeli munhu leswi hi swi vulavuleke laha, hikuva va nga ku dlaya! ₂₅Varhangeri va muti va nga tshuka va twa leswaku ndzi vulavurile na wena, kutani va ku tela, va lava ku tiva leswi hi swi kaneleke mina na wena; va ta ku tshembisa leswaku a va nga ku dlayi, loko u va byela hinkwaswo u nga va fihleli nchumu. ₂₆Wena u fanele ku va hlamula leswaku u lo tisa xirilo ntsena laha ka mina, u kombela leswaku ndzi nga ku tlheriseli emutini wa Yonatani, hikuva sweswo a swi ta ku dlayisa.”

₂₇Hakunene vakulukumba hinkwavo va ya va ya vutisa Yeremiya, kutani yena a va hlamula hilaha hosi Sedekiyasi a n'wi leriseke hakona. Kutani va tsandzekisa sweswo ku yisa mhaka emahlweni, hikuva a ku ri hava munhu na un'we loyi a tweke ku vulavula ka Sedekiyasi na Yeremiya. ₂₈Kutani Yeremiya a tshama exivaveni xa varindzi, ku kondza loko muti wa Yerusalema wu tekiwa hi valala.