Yeremiya 37

₁Kutani Nebukadnetsara hosi ya le Babilona a veka Sedekiyasi n'wana Yosiyasi ku va hosi ya tiko ra Yuda ematshan'wini ya Yoyakini n'wana Yoyakimi. ₂Kambe Sedekiyasi ni malandza ya yena ni vanhu va tiko ra yena, va ala ku yingisa marito ya HOSI Xikwembu lama humeke enon'weni wa muprofeta Yeremiya.

₃Hosi Sedekiyasi a rhuma Yehukali n'wana Xelemiya, na Sofoniya n'wana Maaseya, va ya eka muprofeta Yeremiya va fika va ku: “Hi khongelele eka HOSI Xikwembu xa hina!” ₄Enkarhini lowu, Yeremiya a a kota ku famba-famba exikarhi ka vanhu, hikuva a a nga si khomiwa a hoxiwa ekhotsweni. ₅Naswona Vakalediya lava a va rhendzerile muti wa Yerusalema, a va sukile va famba, hikuva a va twile leswaku mavuthu ya Faro hosi ya le Egipta ma le ndleleni, ma ta.

₆Kutani HOSI Xikwembu xi vulavula ni muprofeta Yeremiya xi ku: ₇“Hlamula hosi ya Yuda, ni vanhu lava yi va rhumeke ku vutisa ku rhandza ka mina, u va byela leswaku mina HOSI Xikwembu xa Israele ndzi ni rito eka vona leri nge: ‘Yingisani! Mavuthu ya hosi Faro lawa a ma ta ku ta mi pfuna, sweswi ma le ku mukeni ma tlhelela le Egipta etikweni ra wona. ₈Kutani Vakalediya va ta vuya ku ta hlasela muti lowu; va ta wu teka va wu hisa. ₉Mina HOSI ndzi ri, mi nga tshuki mi tixisa hi ku vula leswaku Vakalediya va fambele makumu, hikuva ku vuya, va ta vuya! ₁₀Hambiloko mi nga hlula mavuthu hinkwawo ya Vakalediya lava lwaka na n'wina, ku sala ntsena lava tlhaviweke enyimpini va etlele emintsongeni ya vona, siku rin'wana va ta pfuka, va ta va ta hisa muti lowu.’ ”

₁₁Siku rin'wana, loko mavuthu ya Vakalediya ma ha fambile, ma tshikile ku rhendzela Yerusalema hi ku chava mavuthu ya Faro, ₁₂Yeremiya a ringeta ku huma emutini, a ya etikweni ra ka Benjamini ku ya lulamisa ni va ka vona timhaka ta ndzhaka ya yena. ₁₃Loko a ri karhi a huma hi Nyangwa-ya-Benjamini, a hlangana ni mufambisi wa varindzi, loyi a va ku i Yiriya n'wana Xelemiya wa Hananiya. Yiriya a yimisa Yeremiya, a ku ka yena: “Xana a wu le ndleleni ya ku ya tinyiketa eka Vakalediya xana?” ₁₄Yeremiya a hlamula a ku: “E-e, a hi swona, a ndzi le ndleleni yo ya tinyiketa eka Vakalediya!” Kambe Yiriya a ala ku n'wi yingisa, kutani a n'wi khoma a n'wi yisa eka vakulukumba va muti. ₁₅Vakulukumba lava va hlundzukela Yeremiya, va n'wi ba, kutani va n'wi yisa emutini wa Yonatani lowa matsalani, va n'wi pfalela kona, hikuva a ku ri ni khotso emutini wolowo, ₁₆kutani va n'wi hoxa ekheleni leri enteke swinene, va n'wi tshika kona masiku layo tala.

₁₇Kambe siku rin'wana, hosi Sedekiyasi a rhuma vanhu va ya teka Yeremiya, va vuya na yena entsindza; kutani Sedekiyasi a vitanela muprofeta endlwini ya yena, a vulavula na yena exihundleni, a n'wi vutisa a ku: “Xana u na wona mahungu lama humaka eka HOSI Xikwembu xana?” Yeremiya a hlamula a ku: “Ina, ma kona. Mahungu ya kona hileswaku wena u ta nyiketiwa eka hosi ya le Babilona!” ₁₈Yeremiya a engeta a ku ka hosi Sedekiyasi: “Xana ndzi ku dyohele yini, wena ni malandza ya wena ni vanhu va tiko leri, leswi mi ndzi hoxeke ekhotsweni, xana? ₁₉Namuntlha va kwihi vaprofeta lava va mi tshembiseke leswaku hosi ya le Babilona yi nga ka yi nga mi hlaseli kumbe ku hlasela tiko leri, xana? ₂₀We hosi n'wini wanga, ndza ku kombela, yingisa xirilo xa mina, u nga ndzi tlheriseli emutini wa matsalani Yonatani, hikuva sweswo ku nga va ku ndzi dlaya!” ₂₁Hiloko Sedekiyasi a lerisa leswaku Yeremiya a pfaleriwa exivaveni xa varindzi, ni leswaku a nyikiwa siku rin'wana ni rin'wana xinkwa xo huma eka lava va xi swekaka. Swi ve tano swakudya swi kondza swi hela, Yeremiya a ha tshamile exivaveni xa varindzi.