Esaya 53

₁Xana i mani loyi a kholweke leswi hi byeriweke swona xana?

Xana ú kona loyi a voneke matimba ya HOSI Xikwembu emhakeni leyi, xana?

₂Nandza wa HOSI Xikwembu ú kurile emahlweni ka xona tanihi ximilana,

a kota rimitsu ra murhi wa le misaveni leyi omeke;

xivumbeko xa yena a xi nga hi tsakisi, a xi nga hi koki mahlo,

naswona a hi nga n'wi naveli, hikuva a a nga sasekanga.

₃Vanhu a va n'wi langutela hansi, va nga n'wi amukeli.

A a ri munhu wa mahlomulo, loyi a kombiwaka maxangu;

vanhu a va nga lavi na ku n'wi vona,

kutani hina a hi n'wi sola, hi nga ri na mhaka na yena.

₄Hambileswi a a rhwele maxangu ya hina, ni ku titekela mahlomulo ya hina,

hina a hi ku, Xikwembu xa n'wi ba, xi n'wi twisa ku vava, xa n'wi khawurisa.

₅Kasi a a boxiwa timbanga hikwalaho ka milandzu ya hina,

a xanisiwa hikwalaho ka swidyoho swa hina.

Ku biwa ka yena ku hi tisele ku rhula,

hi hanyisiwile hi mafelangati ya yena.

₆Hinkwerhu a hi fana ni tinyimpfu leti lahlekeke,

un'wana ni un'wana a a tifambela hi ndlela ya yena;

hambiswiritano, HOSI Xikwembu xi tekile swidyoho swa hina hinkwerhu,

xi swi rhwexa munhu loyi.

₇A a xanisiwa, a twisiwa ku vava,

kambe a nga pfuli nomo;

a a fana ni xinyimpfana lexi yisiwaka eku tlhaviweni,

kumbe nyimpfu leyi nga riliki loko va yi tsemeta voya.

₈Ú khomiwile hi tihanyi, a avanyisiwa, a susiwa misaveni,

vanhu va nga ri na mhaka na yena,

kasi a a biwa, a susiwa emisaveni ya lava hanyaka,

hikwalaho ka swidyoho swa vanhu va ka hina.

₉Kutani va n'wi lahle exikarhi ka vadyohi,

a celeriwa kun'we ni lavo homboloka,

hambileswi yena a a nga endlanga nchumu xo biha,

naswona a nga kanganyisanga munhu.

₁₀A ku ri ku rhandza ka HOSI Xikwembu leswaku a twisiwa ku vava,

a kombiwa maxangu.

Leswi a tinyiketeke ku va mhamba yo riha swidyoho,

ú ta vona vatukulu va yena, a hanya malembe layo tala;

hi yena la nga ta yisa mahlweni ntirho wa HOSI Xikwembu.

₁₁Ú ta vona mihandzu ya maxangu ya yena layo chavisa,

kutani a tsaka.

“Nandza wa mina ú tiva ku rhandza ka mina;

leswi a nga riki na nandzu,

ú ta ntshunxa lavo tala emilandzwini ya vona

hikuva ú biwile ematshan'wini ya vona.

₁₂Hikokwalaho, ndzi ta n'wi nyika ndhawu exikarhi ka lavo chaviseka,

a avelana leswi phanghiweke ni vanhu va matimba,

hikuva ú tinyiketile ku fela van'wana,

a hlayiwa exikarhi ka vadyohi.

Ú tirhwexile milandzu ya lavo tala,

a khongela Xikwembu leswaku xi tsetselela vadyohi.”