Esaya 40

“Khongotelani vanhu va mina, va khongoteleni!

₂Lava humaka eYerusalema, va tiyiseni nhlana,

mi va tivisa

leswaku ku xaniseka ka vona evukhumbini ku ringene,

ni leswaku va rivaleriwile milandzu ya vona,

hikuva mina HOSI Xikwembu ndzi va bile ku ringana,

hikwalaho ka swidyoho swa vona hinkwaswo.”

₃Ku twala rito ra munhu la huwelelaka, a ku:

“Boxelani HOSI endlela emananga,

khulelani gondzo enhoveni, mi khulelela Xikwembu xa n'wina.

₄Minkova hinkwayo a yi seleteriwe,

tintshava ni swintshabyana swi hirimuxiwa hinkwaswo,

switsunga ni tindhawu leti nga fambekiki

a swi hundzuke rivala,

₅kutani ku dzuneka ka HOSI ku ta tikomba,

vanhu hinkwavo va ta ku vona.

Loyi a vulaka sweswo i HOSI Xikwembu hi xiviri.”

₆Ndzi twa rito leri nge: “Huwelela!”

Kutani ndzi ku: “Ndzi ta huwelela ndzi ku yini?” Rito ri ri:

“Va byele leswaku vanhu hinkwavo va fana ni byanyi,

va kota swiluva swa nhova: A va tiyanga.

₇Byanyi bya oma, ni swiluva swa vuna,

loko HOSI yi hungisa moya ehenhla ka swona;

hakunene vanhu a va tiyanga, va fana ni byanyi.

₈Byanyi bya oma, ni swiluva swa vuna,

kambe rito ra Xikwembu xa hina ri ta va ni matimba hilaha ku nga heriki!”

₉Khandziya entshaveni leyo leha,

u tivisa mahungu lamanene, we Siyoni.

We Yerusalema, tlakusa rito u huwelela hi matimba,

u byela van'wana mahungu lamanene.

U nga chavi, huwelela swinene,

u byela miti ya tiko ra Yuda, u ku:

“Vonani, Xikwembu xa n'wina hi lexi!”

₁₀Vonani, HOSI N'wini wa hinkwaswo wa ta hi matimba ya yena,

ú tela ku ta fuma hi yexe;

langutani, ú ta ni hakelo ya yena,

va nga vanhu lava a va kutsuleke; ú va rhangise emahlweni.

₁₁Ú fana ni murisi loyi a byiselaka ntlhambi wa yena emadyelweni;

ú ta hlengeleta swinyimpfana, a swi tlakula,

vamana wa swona, ú ta va byisa khwatsi.

₁₂Xana ú kona munhu loyi a pimeke mati ya lwandle hi xandla xa yena,

kumbe la beke ndzilekana wa matilo hi voko ra yena, xana?

Xana ú kona loyi a cheleke misava hinkwayo exirhundzwini,

kumbe loyi a pimeke tintshava ni swintshabyana exikalwini xana?

₁₃Moya wa HOSI Xikwembu, wu kombiwe hi mani ndlela,

xana HOSI Xikwembu xi ni mutsundzuxi loyi a xi leteleke, xana?

₁₄Xana HOSI Xikwembu xi tshama xi ya eka munhu

leswaku a xi dyondzisa vutlhari ni ku endla leswo lulama,

a xi dyondzisa vutivi

ni ndlela yo kota ku twisisa timhaka, xana?

₁₅Eka HOSI Xikwembu, matiko ma fana ni thonsi ra mati leri humaka ekhuwanini,

xi ma teka wonge mo va ritshuri leri weleke exikalwini;

swihlala swona, xi swi vona swi fana ni ritshuri leri hahaka.

₁₆Swiharhi hinkwaswo swa ntshava ya Lebanoni, swi nge ringani ku humesela HOSI Xikwembu emagandzelo,

ni tihunyi ta yona hinkwato ti nge ringani ku tshivela ndzilo wa kona.

₁₇Matiko hinkwawo a hi nchumu emahlweni ka HOSI Xikwembu,

eka xona, a ma vuli nchumu,

a ma pfuni nchumu!

₁₈Xana ú kona munhu loyi mi nga n'wi ringanisaka ni Xikwembu,

kumbe swi kona leswi mi nga swi fanisaka na xona, xana?

₁₉Xana xi nga fanisiwa ni swikwembu leswi vumbiweke hi munhu,

kutani un'wana a swi nameketa nsuku,

a swi endlela ni tinketani ta silivhere, xana?

₂₀Loyi a pfumalaka swa le mandleni,

ú hlawula mhandze ya murhi lowu nga boriki,

kutani a lava mutirhi la tivaka ku vatla swinene,

la nga ta yimisa xifaniso, xi nga tsekatseki.

₂₁Xana a mi tivi nchumu, a mi twanga nchumu ke?

Xana a mi byeriwanga nchumu ku sukela khale xana?

Xana a mi twisisanga leswaku misava yi sungurise ku yini xana?

₂₂Mutumbuluxi wa yona hi loyi a tshameke etilweni;

eka yena, vaaki va misava va fana ni switsotso.

Ú andlarile matilo kukota nceka,

a ma vamba ku fana ni ntsonga wo tshama eka wona.

₂₃Varhangeri va matiko, wa va tsongahata, va nga ha vi nchumu,

tihosi, ú ti hundzula swilo leswi nga ha pfuniki nchumu.

₂₄Va fana ni swimilana leswa ha ku byariwaka,

leswi ni timitsu ta kona ti nga si khomaka emisaveni;

loko mutumbuluxi a hungisa moya, swimilana swa kona swa vuna,

kutani xihuhuri xi swi rhwala tanihi mavivi.

₂₅Muhlawuleki wa vutisa, ú ri:

“Xana ú kona loyi mi nga ndzi ringanisaka na yena,

loyi ndzi fanaka na yena, xana?”

₂₆Pfulani mahlo mi languta ehenhla:

Xana i mani loyi a tumbuluxeke leswi mi swi vonaka xana?

Swi tumbuluxiwile hi loyi a swi hlengeletaka tanihi mavuthu,

ú tiva xin'wana ni xin'wana hi vito ra xona;

ú ni ntamu ni matimba layo hlamarisa,

kutani a ku na xin'we xa swona lexi nga tshukaka xi lahlekile.

₂₇N'wina va ka Yakobo, xana mi vilelela yini;

ndzi vula n'wina Vaisraele, xana mi vula yini loko mi ku:

“HOSI Xikwembu a xa ha lavi ku tshinela kusuhi na hina,

Xikwembu xa hina a xa ha lavi ku hi sirhelela.”

₂₈Xana a mi tivi nchumu, a mi twanga nchumu ke?

HOSI Xikwembu, xona Xikwembu lexi nga kona hilaha ku nga heriki,

lexi tumbuluxeke misava hinkwayo,

a xi karhali, a xi heli ntamu,

makungu ya xona, a ma tivi hi munhu.

₂₉Lava tsaneke, xi va nyika matimba,

xi engetelela ntamu eka lava nga tiyangiki.

₃₀Lavantshwa va nga hela ntamu, va karhala,

majaha ma nga heleriwa hi matimba, ma wela hansi,

₃₁kambe lava tshembaka HOSI Xikwembu, va ta engeteleriwa matimba,

va ta haha kukota magama,

va ta tsutsuma va nga karhali,

va ta famba va nga heleli hi ntamu.