Esaya 2

₂Eminkarhini leyi taka, xintshabyana lexi yindlu ya HOSI yi akiweke eka xona,

xi ta tlakuka xi hundza swintshabyana hinkwaswo;

xi ta leha xi ya henhla xi tlula ni tintshava,

tinxaka hinkwato ti ta khitikana ti ya eka xona.

₃Vanhu lavo tala va ta rhambana va ku:

“Tanani hi ya khandziya ntshava ya HOSI,

hi kongoma endlwini ya Xikwembu xa Yakobo;

xi ta hi dyondzisa leswi xi lavaka swona,

kutani hi ta famba endleleni ya xona!”

Emutini wa Siyoni, hi kona ku nga ta huma Nawu,

Rito ra HOSI ri ta huma eYerusalema.

₄HOSI Xikwembu xi ta avanyisa timhaka ta matiko,

hi xona xi nga ta tsema milandzu ya vanhu lavo tala;

kutani va ta fula matlhari ya vona va endla swikomu,

va endla ni mikwana yo khutulela ha yona;

tiko rin'wana ri nga ka ri nga ha pfuki rin'wana,

ni vanhu a va nga ha dyondzisiwi ku lwa nyimpi.

₅N'wina va ka Yakobo,

tanani hi famba eku vonakaleni ka HOSI!

₆We HOSI, vanhu va wena, vona va ka Yakobo,

u va tshikile,

hikuva va tekelele mikhuva ya vanhu va le vuxeni,

va ni vangoma lavo tala ku fana ni Vafilista,

va twanana ni vanhu va tinxaka timbe.

₇Tiko ra vona ri lo mphà, hi silivhere ni nsuku,

munhu a nge ri heti rifumo ra vona,

tihanci ti tele etikweni ra vona,

tigolonyi ta vona ta nyimpi i ntsandza vahlayi.

₈Tiko ra vona ri tele hi swifaniso swa swikwembu,

va nkhinsamela swilo leswi va nga lo swi endla hi mavoko ya vona.

₉Vanhu lava hinkwavo va ta tsongahatiwa,

va khomisiwa tingana;

va nga ka va nga rivaleriwi!

₁₀Nghenani emabakweni ya maribye,

ticeleleni emisaveni,

mi tumbela vukari bya HOSI Xikwembu,

ni ku kwetsima ka xona loku chavisaka.

₁₁Esikwini ra kona,

vanhu va manyunyu va ta tsongahatiwa,

lava tidzunisaka va ta nyumisiwa,

HOSI Xikwembu hi xona ntsena xi nga ta dzunisiwa.

₁₂HOSI ya matimba hinkwawo yi na rona siku

leri yi nga ta ba lava titshembaka ni ku tidzunisa,

yi tsongahata ni lava tikurisaka.

₁₃HOSI yi ta wisa ni mirhi hinkwayo ya kedari ya le Lebanoni leyi leheke yi ya ehenhla swinene;

yi ta wisa ni minkuhlu hinkwayo ya Baxani,

₁₄yi hirimuxa tintshava hinkwato leto leha,

ni swintshabyana hinkwaswo leswi tlakukeke,

₁₅yi mbundzumuxa swihondzo hinkwaswo leswo leha,

ni makhumbi ya makhokholo hinkwawo,

₁₆yi mbombomerisa tingalava hinkwato letikulu,

ni mabyatso hinkwawo layo saseka.

₁₇Esikwini rero, vanhu va manyunyu va ta nyumisiwa,

lava tidzunisaka va ta tsongahatiwa;

HOSI Xikwembu hi xona ntsena xi nga ta dzunisiwa.

₁₈Swifaniso swa swikwembu swi ta nyamalala hinkwaswo.

₁₉Vanhu va ta nghena emabakweni ya maribye,

ni le makheleni emisaveni,

va tumbela vukari bya HOSI Xikwembu,

ni ku kwetsima ka xona lokukulu,

loko xi humelela xi ta chavisa vanhu emisaveni.

₂₀Esikwini ra kona, swifaniso swa swikwembu swa silivhere ni swa nsuku,

leswi vanhu va swi endleleke ku swi gandzela,

va ta swi cukumeta

swi ya wela eka timfukuzani ni vamangadyana.

₂₁Vanhu vona va ta nghena emabakweni ya maribye,

ni le makocokocweni ya tintshava,

va tumbela vukari bya HOSI Xikwembu,

ni ku kwetsima ka xona lokukulu,

loko xi humelela xi ta chavisa vanhu emisaveni.

₂₂Tshikani ku tshemba munhu,

hikuva i xivumbiwa lexi faka,

a nga pfuni nchumu!