Genesa 40

₁Kuteloko ku hundzile masikunyana, mucheri wa vhinyo ya hosi ya Egipta swin'we ni muphameri wa xinkwa xa yona, va dyohela n'wini loyi wa vona. ₂Kutani hosi Faro a hlundzukela vatirhi lavambirhi, ku nga ndhuna ya vacheri va vhinyo ni ndhuna ya vaphameri va xinkwa. ₃Hiloko hosi Faro a va nyiketa eka ndhuna ya varindzi, leswaku a va rindza emutini wa yena, laha a ku ri ni khotso leri Yosefa a a pfaleriwile eka rona. ₄Kutani ndhuna ya varindzi yi lerisa Yosefa ku va tirhela, a va nandza wa vona. Kutani va tshamile masikunyana va ri karhi va rindziwa.

₅Kutani siku rin'wana nivusiku, mucheri wa vhinyo ya hosi ya Egipta, ni muphameri wa xinkwa xa yona, va lorha milorho havumbirhi bya vona, va ri kwale khotsweni; norho wun'wana ni wun'wana a wu ri ni nhlamuselo ya wona. ₆Kuteloko Yosefa a ta eka vona nimpundzu, a swi vona leswaku a va tsakanga emoyeni. ₇Kutani Yosefa a vutisa malandza lawa ya hosi Faro, lawa a ma rindziwa kwala mutini wa n'wini wa yena, a ku: “Hikwalaho ka yini tinghohe ta n'wina ti nga tsakanga, xana?” ₈Vona va ku ka yena: “Hi lorhile milorho, kutani a ku na munhu loyi a nga yi hlamuselaka.” Kutani Yosefa a ku ka vona: “Xana a hi Xikwembu lexi hlamuselaka milorho xana? Ndzi kombela leswaku mi ndzi byela milorho ya kona.”

₉Hiloko ndhuna ya vacheri va vhinyo yi byela Yosefa norho wa yona, yi ku: “Enorhweni wa mina, ndzi vonile murhi wa vhinya; ₁₀emurhini lowu wa vhinya, a ku ri ni marhavi manharhu. Wu lo na hluka, wo baleka swiluva, wu tswala swichocho swa mihandzu leyi vupfeke. ₁₁Evokweni a ndzi khomile xinwelo xa hosi Faro, kutani ndzi teka mihandzu ya vhinya ndzi kamela exinwelweni lexi, ndzi nyika hosi Faro.” ₁₂Hiloko Yosefa a ku ka yena: “Nhlamuselo ya norho wa wena hi leyi: Marhavi lawa manharhu ma vula masiku manharhu. ₁₃Loko ku nga si hundza masiku manharhu, hosi Faro ú ta ku humesa ekhotsweni, a ku tlherisela entirhweni wa wena, kutani u ta hamba u nyika hosi Faro xinwelo xa yena, ku fana ni khale loko wa ha ri mucheri wa vhinyo ya yena. ₁₄Kambe ndzi kombela leswaku u nga ndzi rivali loko se swi ku fambela kahle. U fanele ku ndzi pfuna, u ndzi vulavulela na hosi Faro, leswaku na mina ndzi ta huma laha khotsweni. ₁₅Etikweni ra Vaheveru, a ndzi sukanga hi ku swi lava, kambe ndzi lo yiviwa kunene; kasi na kona kwala, ndzi lo pfaleleriwa xilo lexi ndzi nga xi endlangiki.”

₁₆Loko ndhuna ya vaphameri va xinkwa yi vona leswaku nhlamuselo ya kona hi leyinene, yi ku ka Yosefa: “Na mina ndzi lorhile: A ndzi rhwele swirhundzu swinharhu swa swimbhundzwa enhlokweni. ₁₇Exirhundzwini lexi a xi ri ehenhla, a ku ri ni swimbhundzwa swa tinxaka-xaka leswi a swi swekeriwe hosi Faro, kambe tinyanyana a ti ri karhi ti swi dya ndza ha swi rhwele.” ₁₈Hiloko Yosefa a ku: “Nhlamuselo ya kona hi leyi: Swirhundzu leswinharhu swi vula masiku manharhu. ₁₉Loko ku nga si hundza masiku manharhu, hosi Faro ú ta ku humesa ekhotsweni, a ya ku tsema nhloko, a ku hayeka emurhini, kutani tinyanyana ti ta dya nyama ya wena.”

₂₀Hi siku ra vunharhu, ri nga siku leri hosi Faro a a tsundzuka ku velekiwa ka yena, a endlela malandza ya yena hinkwawo enkhuvo lowukulu. Kutani a humesa ndhuna ya vacheri va vhinyo ni ndhuna ya vaphameri va xinkwa ekhotsweni, a va tisa emahlweni ka malandza laman'wana. ₂₁Kutani hosi Faro a tlherisela ndhuna ya vacheri entirhweni wa yona wo chela vhinyo, leswaku yi hamba yi n'wi nyika xinwelo. ₂₂Kambe ndhuna ya vaphameri yona yi hayekiwa emurhini, hilaha Yosefa a va hlamuseleke hakona. ₂₃Hambiswiritano, ndhuna ya vacheri a yi n'wi tsundzukanga Yosefa, yi n'wi rivarile.