Vagalatiya 2

₁Endzhaku ka malembe ya 14, ndzi tlhele ndzi tlhandlukele eYerusalema ndzi ri na Barnaba, kutani ndzi teka na Tito. ₂Ndzi tlhandlukele kona hi ku hlawuteriwa hi Xikwembu. Ndzi vonanile ni vafambisi va kona hi tlhelo, kutani ndzi va anekela Evhangeli leyi ndzi yi twariseke exikarhi ka vamatiko. A ndzi nga lavi leswaku leswi ndzi swi tirheke, ni leswi ndzi swi tirhaka sweswi, swi hundzuka swa hava. ₃Na Tito loyi a ndzi ri na yena, hambileswi a nga Mugriki, a nga sindzisiwanga ku yimba. ₄Mhaka yi pfuxiwile hikwalaho ka vanhu van'wana lava tiendlaka vakriste, va nga lava ngheneke exikarhi ka hina hi ku kanganyisa, va lava ku vona ku ntshunxeka loku hi nga na kona eka Kriste Yesu; a va lava ku hi endla mahlonga; ₅a hi pfumelanga na siku na rin'we ku tiveka ehansi ka vona, kambe hi lavile leswaku ntiyiso wa Evhangeli wu hlayiseriwa n'wina swinene.

₆Kambe lava a va vonaka onge hi vona vafambisi (hambi a va ri vona, hambi a va nga ri vona, eka mina a hi mhaka, Xikwembu a xi yi hi nghohe), ndzi ri: Vafambisi va kona a va engetelelanga nchumu eka mina. ₇Ematshan'wini ya sweswo, va swi vonile leswaku ndzi rhwexiwile ntirho wo dyondzisa Evhangeli eka lava nga yimbangiki, tanihi Petro eka lava yimbeke. ₈Hikuva Xikwembu lexi nyikeke Petro matimba ya ku va muapostola eka lava yimbeke, na mina xi ndzi nyikile matimba ya ku va muapostola eka vamatiko. ₉Hikokwalaho, Yakobo, na Petro, na Yohane, lava langutiwaka va ri vona vafambisi va kereke, va wu vonile nkateko lowu Xikwembu xi ndzi nyikeke wona, kutani va hi khome hi xandla, mina na Barnaba, ku fungha ku tirhisana ka vona na hina: Hina hi ta ya eka vamatiko, vona va ya eka lava yimbeke. ₁₀Ntsena va hi tsundzuxile ku anakanya swisiwana, kutani hi swo leswi na mina a ndzi hisekela ku endla swona.

₁₁Kambe loko Petro a tile le Antiyoka, ndzi n'wi kongomile, ndzi n'wi tshinya hikuva a a hoxile. ₁₂Hikuva loko ku nga si fika van'wana lava rhumiweke hi Yakobo, a a dya ni vamatiko; kambe loko varhumiwa lava va fika, a suka, a ya tshamela etlhelo, hi ku chava ku voniwa hi ntlawa wa lava yimbeke. ₁₃Vayuda van'wana lava a va ri kona, na vona va tluleriwile hi vukanganyisi bya Petro, Barnaba a kondza a kokiwa na yena hi ku kanganyisa koloku. ₁₄Kambe loko ndzi vonile leswaku leswi a va swi endla a swi nga fambelani ni ntiyiso wa Evhangeli, ndzi byerile Petro emahlweni ka vona hinkwavo, ndzi ku: “U Muyuda wena hi ku velekiwa, kambe u hanya hi mukhuva wa vamatiko, ku nga ri wa Vayuda; hikwalaho ka yini u sindzisa vamatiko ku hanya hi mukhuva wa Vayuda ke?”

₁₅Hina hi Vayuda hi ku velekiwa, a hi vamatiko va nga “vadyohi”. ₁₆Hambiswiritano, hi tiva leswaku munhu a nga endliwi la lulameke emahlweni ka Xikwembu hi ku hlayisa Nawu, kambe ku ri ntsena hi ku pfumela eka Yesu Kriste; kutani hina hi pfumerile eka Kriste Yesu, leswaku hi endliwa lava lulameke hi ku pfumela eka yena, ku nga ri hi ku hlayisa Nawu; hikuva ku tsariwile va ku: “A ku na munhu na un'we la nga ta endliwa la lulameke hi ku hlayisa Nawu.”

₁₇Kambe loko, hi ku ringeta ka hina ku endliwa lava lulameke eka Kriste, hi kumiwa hi ri “vadyohi” na hina, xana swi vula leswaku Kriste ú seketela ku dyoha ke? Niswitsanana! ₁₈Loko ndzi tlhela ndzi pfuxa mikhuva leyi a ndzi yi hlanhlile, hi kona ndzi nga ta tikomba ndzi ri muhoxi hakunene. ₁₉Loko a ri mina, Nawu wu ndzi dlele. Hi tlhelo ra Nawu mina a ndzi file, leswaku ndzi ta hanyela Xikwembu. Kriste ú vambiwile kutani ndzi vambiwile na yena; ₂₀hikokwalaho, a nga ha ri mina la hanyaka, kambe i Kriste la hanyaka eka mina. Sweswi, loko ndzi hanya emirini, ndzi hanya hi ku pfumela, ku nga ku pfumela eka N'wana wa Xikwembu loyi a ndzi rhandzeke, a va a tinyiketa hikwalaho ka mina. ₂₁A ndzi nyenyi tintswalo ta Xikwembu, hikuva loko vanhu va nga endliwa lava lulameke hi mhaka ya ku hlayisa Nawu, swi vula leswaku ku fa ka Kriste a ku pfunanga nchumu.