Vagalatiya 1

₁Mina Pawulo ndzi nga muapostola, ku nga ri hi ku hlawuriwa hi vanhu kumbe ku rhumiwa hi munhu, kambe hi ku rhumiwa hi Yesu Kriste ni Xikwembu Tatana la n'wi pfuxeke exikarhi ka vafi, ₂ndzi tsala ndzi ri ni vamakwerhu hinkwavo lava nga na mina haleno, hi tsalela tikereke ta Galatiya, hi ri:

₃Tintswalo ni ku rhula a swi ve na n'wina, swi huma eka Xikwembu Tata wa hina, ni ka Hosi Yesu Kriste, ₄yena loyi a tinyiketeke hikwalaho ka swidyoho swa hina, leswaku a ta hi kutsula eka nguva leyo biha ya masiku lawa. Ú endle sweswo hi ku yingisa ku rhandza ka Xikwembu Tata wa hina; ₅eka xona a ku ve ku dzuneka hilaha ku nga heriki! Amen.

₆Ma ndzi hlamarisa: Hi nkarhinyana wu nga ri wungani, mi fularhele loyi a mi vitaneke hi tintswalo ta Kriste, kutani mi tsutsumela eka Evhangeli yin'wana. ₇Kasi Evhangeli yin'wana ku hava. Ndzi vula leswi hikuva ku na van'wana lava va mi pfilunganyisaka tinhloko, lava ringetaka ku soholota Evhangeli ya Kriste.

₈Kambe hambiloko hina kumbe ntsumi yo huma etilweni, hi nga tshuka hi mi dyondzisa Evhangeli yin'wana ehandle ka leyi hi tshamaka hi mi dyondzisa yona, mudyondzisi wo tano a a rhukaniwe! ₉Tanihi leswi hi tshamaka hi mi byela, nisweswi ndzi engeta kambe ndzi ku: Loko un'wana a mi dyondzisa Evhangeli yin'wana ehandle ka leyi mi yi amukeleke, a a rhukaniwe!

₁₀Xana sweswo swi komba leswaku ndzi navela ku nkhensiwa hi vanhu kumbe hi Xikwembu ke? Xana ndzi vonaka ndzi ri la ringetaka ku tsakisa vanhu ke? Loko onge ndza ha ringeta ku endla sweswo, a ndzi nga ta va nandza wa Kriste.

₁₁Ndza mi tsundzuxa, vamakwerhu, leswaku Evhangeli leyi ndzi mi dyondziseke yona, a yi humanga eka vanhu. ₁₂A ndzi yi kumanga ka munhu ni un'we, ku hava na un'we loyi a ndzi dyondziseke yona. Yesu Kriste hi xiviri xa yena, hi yena loyi a nga yi hlavutela eka mina.

₁₃Mi twile leswi a ndzi hanyisa swona khale, loko ndza ha hanya Xiyuda. Mi tiva hilaha ndzi nga xanisa ni ku herisa kereke ya Xikwembu hakona, ndzi nga tsetseleri munhu. ₁₄Hi ku hanya Xiyuda, a ndzi tlula lavo tala va tintangha ta mina exikarhi ka va ka hina, ndzi ri karhi ndzi hisekela ngopfu mikhuva ya vatata wa hina.

₁₅Kambe Xikwembu lexi xi ndzi hlawuleke ndzi nga si velekiwa, xi ndzi vitanile hi tintswalo ta xona; ₁₆xi swi tsakerile ku hlavutela N'wana wa xona eka mina, leswaku ndzi ta n'wi twarisa exikarhi ka vamatiko. Enkarhini wolowo, a ndzi vutisanga munhu, ₁₇naswona, a ndzi tlhandlukelanga eYerusalema eka lava va nga ndzi rhangela ku va vaapostola, kambe ndzi yile xikan'we le Arabiya, endzhaku ndzi vuyela eDamaska.

₁₈Kutani, endzhaku ka malembe manharhu, hi kona ndzi tlhandlukeleke eYerusalema ku ya vonana na Petro, kutani ndzi xwe na yena masiku ya 15. ₁₉Kambe a ndzi vonananga na un'we wa vaapostola lavan'wana, ehandle ka Yakobo makwavo wa Hosi. ₂₀Timhaka leti ndzi mi tsalelaka tona ti tiyile, ndzi vula sweswo emahlweni ka Xikwembu, a ndzi hembi.

₂₁Endzhaku ka swona ndzi yile ematlhelweni ya Siriya na Kilikiya. ₂₂Kambe enkarhini wolowo, tikereke ta Kriste leti nge Yudiya, a ti nga si ndzi vona hi mahlo; ₂₃ntsena a ti twile van'wana loko va ku: “Munhu loyi khale a a hi xanisa ni ku ringeta ku herisa ta ku pfumela, sweswi ú dyondzisa tona.” ₂₄Kutani a ti dzunisa Xikwembu hikwalaho ka mina.