Ezekiele 19

Mana wa n'wina a a ri nghala ya xisati,

a hlamarisa exikarhi ka tinghala tin'wana,

loko a etlela ni swinghalana swa yena,

a rhendzeriwa ha swona a swi kurisa.

₃Ú hlawurile xin'wana exikarhi ka swona,

xi kula xi va nghala

leyi nga dyondza ku handzulela leswi yi swi khomeke,

yi dlaya ni vanhu.

₄Vanhu va matiko va twile timhaka ta yona,

kutani yi wele ekheleni leri va ri celeke;

va yi boxe nhompfu va hulela muhalo,

va famba na yona etikweni ra Egipta.

₅Mana wa kona ú yi languterile nkarhi wo leha,

a kondza a lahlekeriwa hi ku tshemba,

kutani a hlawula xin'wana xinghalana,

a xi kurisa xi va nghala.

₆Loko yi kurile,

yi sungula ku rhendzeleka ni tinghala tin'wana,

yi dyondza ku handzulela leswi yi swi khomeke,

yi dlaya ni vanhu;

₇yi hirimuxa makhokholo ya valala,

yi herisa ni miti ya vona,

kutani vamatiko hinkwavo va rhurhumela

loko va yi twa yi bonga.

₈Vamatiko lava va humile ematlhelweni hinkwawo,

va yi tela va yi rhendzela,

va tlharamule ritavala va yi khubumeta,

yi wela ekheleni leri va ri celeke;

₉va yi boxa nhompfu va hulela muhalo, va yi boha,

va famba na yona eka hosi ya le Babilona,

va fika va yi nghenisa ekhotsweni,

leswaku ku bonga ka yona ku nga ha twiwi

emagangeni ya Vaisraele.

₁₀Mana wa n'wina a a fana ni murhi wa vhinya

lowu byariweke kusuhi ni nambu,

wu hluka swinene wu veka ni mihandzu,

hikuva a wu kuma mati yo tala.

₁₁Marhavi ya wona a ma lehile no tiya,

tihosi ti vatleriwa tinhonga ha wona;

a ma kula ma ya henhla,

ma ya dliva ni mapapa;

a ma lehile ma tlhuma swinene,

ma vonaka ni le kule.

₁₂Kambe vanhu va tihanyi va simurile murhi lowu,

va wu cukumeta ehansi,

wu omisiwa hi moya wa le vuxeni,

mihandzu ya wona yi dzudzeka,

na wona nsinya wa kona lowukulu wu oma,

wu hisiwa hi ndzilo.

₁₃Sweswi wu simekiwile emananga,

etikweni leri omeke ra makwandzasi.

₁₄Nsinya wa kona wu tshwile,

ku tshwa marhavi ni mihandzu,

ku nga ha sali ni rhavi ni rin'we

ro vatla nhonga ya hosi ha rona!