Risimu ra Muxe
1Kutani Muxe ni Vaisraele va dzunisa HOSI Xikwembu hi risimu leri nge:
“Ndzi ta yimbelela ndzi dzunisa HOSI,
hikuva yi hlurile hi ndlela yo hlamarisa;
hanci ni mugadi wa yona,
yi swi hoxile elwandle.
2HOSI i matimba yanga ni risimu ranga,
ndzi ponisiwile hi yona;
lexi hi xona Xikwembu xa mina, ndzi ta xi vonga,
Xikwembu xa tata wa mina, ndzi ta xi twarisa.
3HOSI i nhenha hakunene,
vito ra yona i HOSI Xikwembu.
4“Makalichi ya Faro ni mavuthu ya yena,
HOSI yi swi hoxile elwandle.
Vafambisi lavo tiya va muvuthu ya Faro
va dyiwile hi Lwandle-ro-Tshwuka.
5Va khubumetiwile hi magandlati ya lwandle,
va ndzondzomerile eswidziveni tanihi ribye.
6“Matimba ya voko ra wena ra xinene,
we HOSI, ma hlamarisa;
voko ra wena ra xinene,
we HOSI, ri fayeterile valala.
7Eku dzunekeni ka wena lokukulu,
u wisile lava va ku pfukeleke;
u rhumerile vukari bya wena,
byi va herisa ku fana ni byanyi bya mavivi.
8“Loko u hefemutekile hi ku kariha,
mati ma hlengeletanile,
maboboma ma yima ma endla makhumbi,
magandlati exikarhi ka lwandle ma tiya.
9Nala a a ku:
‘Ndzi ta va hlongorisa, ndzi va kuma,
ndzi phakela leswi phanghiweke,
ndzi korwisa ku navela ka mina hi swona.
Ndzi ta hlomula banga ra mina,
ndzi va hangalasa hi voko ra mina.’
10Kambe wena, u hungisile moya wa wena,
kutani lwandle ri va khubumeta;
va ndzondzomerile ku fana ni ntsopfu,
exikarhi ka maboboma lama chavisaka.
11“We HOSI, i mani loyi a fanaka na wena
exikarhi ka swikwembu, xana?
Wena la nga ni matimba lama kwetsimaka,
wena wa mintirho leyo chavisa,
wena u endlaka swihlamariso, ku hava la fanaka na wena!
12U tlakusile voko ra wena ra xinene,
kutani misava yi mitile valala.
13“Hi rirhandzu ra wena lero tshembeka,
u rhangerile vanhu lava u va kutsuleke;
u va hleterile hi matimba ya wena,
va kondza va fika evutshan'wini bya wena lebyo hlawuleka.
14Vanhu va matiko va swi twile,
kutani va rhurhumela hi ku chava,
Vafilista va tela hi rhumbu.
15Varhangeri va le Edomu va tshukisiwile,
vafambisi va le Mowabu va biwile hi ripfalo,
vaaki hinkwavo va Kanana va herile matimba.
16Va weriwile hi ku chava ni gome,
hikwalaho ka matimba ya voko ra wena, va yimile va nga ha tshukatshuki,
ku kondza loko vanhu va wena va hundza, we HOSI,
ina, vanhu va wena lava u nga tikumela vona va ko va hundza.
17Wena u ta va nghenisa etikweni,
u va simeka entshaveni leyi nga ya wena,
exivandleni lexi u tiendleleke xona
leswaku u ta tshama eka xona, we HOSI,
xi nga xivandla xo hlawuleka,
lexi wena N'wini wanga u xi tumbuluxeke hi mavoko ya wena.
18HOSI Xikwembu xi ta fuma
hilaha ku nga heriki.”
Meriyamu a yimbelela risimu
19Kuteloko tihanci ta Faro ti nghenile elwandle, ni makalichi ya yena ni vagadi va tihanci ta yena, HOSI Xikwembu xi vuyisa mati ma va khubumeta; kambe Vaisraele vona va famba exikarhi ka lwandle laha ku omeke.
20Muprofeta Meriyamu, loyi a a ri makwavo wa Aroni, a teka xingomana; vavasati hinkwavo va huma va n'wi landza, va ri karhi va khankha, va khomile swingomana swa vona.
21Kutani Meriyamu a va yimbelelela risimu, a ku:
“Yimbelelani mi dzunisa HOSI,
hikuva yi hlurile hi ndlela yo hlamarisa;
hanci ni mugadi wa yona,
yi swi hoxile elwandle.”
Ta mati layo dzunga ya le Mara
22Kutani Muxe a suka na Vaisraele eLwandle-ro-Tshwuka, va kongoma emananga ya Xuru. Va famba emananga lawa masiku manharhu, va nga kumi mati. 23Kutani va ya fika endhawini leyi va nge i Mara, kambe va tsandzeka ku nwa mati ya kona, hikuva a ma dzunga ngopfu; hi swona leswi endleke leswaku ndhawu leyi yi thyiwa vito ra “Mara”, (hileswaku “ku dzunga”). 24Hiloko vanhu va dzumadzumela Muxe va ku: “Hi ta nwa yini xana?”
25Muxe a huwelela eka HOSI Xikwembu, kutani xi n'wi komba ximudyana; Muxe a xi hoxa ematini, kutani mati ya kona ma nweka.
Laha Mara, hi kona HOSI Xikwembu xi vekeleke Vaisraele swiletelo ni milawu; naswona, hi kona laha xi va kambeleke kona. 26Kutani xi ku ka vona: “Loko mi tinyiketa ku yingisa leswi mina HOSI Xikwembu xa n'wina ndzi mi byelaka swona, mi endla leswi swi ndzi tsakisaka, mi landza milawu ya mina ni ku hlayisa swileriso swa mina hinkwaswo, ndzi nga ka ndzi nga mi vangeli ni ntungu ni wun'we wo fana ni leyi ndzi yi vangeleke Vaegipta, hikuva hi mina HOSI Xikwembu, mutshunguri wa n'wina.”
27Kutani va famba va ya fika le Elimi, laha a ku ri ni swihlovo swa 12 ni mirhi ya 70 ya mincindzu; va fika va dzima mintsonga, kusuhi ni mati.
