Duteronoma 23

₁“Munhu loyi a tsheniweke kumbe loyi a tsemiweke hala mahlweni, a nga fanelanga ku nghena exikarhi ka vanhu lava hlengeletaneke emahlweni ka HOSI Xikwembu. ₂Munhu loyi a velekiweke evuhungukini, yena ni vatukulu va yena ku ya fika eka rixaka ra vukhume, a va fanelanga ku nghena exikarhi ka lava hlengeletaneke emahlweni ka HOSI Xikwembu.

₃“Vaamoni ni Vamowabu a va fanelanga ku nghena laha vanhu va HOSI Xikwembu va hlengeletaneke kona, hambi va ri vatukulu va vona ku ya fika erixakeni ra vukhume a va nga pfumeleriwi. A va nga pfuki va nghenile ni siku ni rin'we, ₄hikuva loko mi ta mi huma hi le Egipta, a va tanga va ta mi hlanganisa endleleni va mi tisela swakudya ni mati, kambe va mi xavele Balaama n'wana Beyori loyi a a tshama ePetoro le Mesopotamiya, leswaku a ta a ta mi rhuketela. ₅Hambiswiritano HOSI Xikwembu xa n'wina a xi n'wi yingisanga Balaama; ndzhukano wa kona xi wu hundzurile nkateko eka n'wina, hikuva a xi mi rhandza. ₆Mi nga tshuki mi pfuna Vaamoni ni Vamowabu, kumbe ku va endlela leswi nga ta va fumisa.

₇“Mi nga tshuki mi nyenya Vaedomu, hikuva i vamakwenu; hambi va ri Vaegipta, mi nga va nyenyi, hikuva a mi luverile etikweni ra vona. ₈Vatukulu-xinguwe va Vaedomu ni Vaegipta vona va nga nghena exikarhi ka vanhu lava hlengeletaneke emahlweni ka HOSI Xikwembu.

₉“Loko mi huma nyimpi mi ya tshama emixaxeni, mi fanele ku va kule ni leswo biha hinkwaswo. ₁₀Loko exikarhi ka n'wina ku tshuka ku va ni munhu loyi a nyamisiweke hi swin'wana leswi humeleleke nivusiku, munhu yoloye ú fanele ku huma emixaxeni, a ya tshama ehandle, ₁₁dyambu ri kondza ri pela. Loko ri perile, ú ta hlamba, kutani hi kona a nga ta vuya emixaxeni.

₁₂“Mi fanele ku va ni ndhawu yo humela kona, ehandle ka mixaxa, ₁₃naswona exikarhi ka swingolongondzwana swa n'wina, mi va ni mbhanyi, kutani loko mi ya eku tipfuneni, mi ta famba na wona, mi ya cela khele ha wona, kutani loko mi tipfunile, mi tlhela mi seletela. ₁₄Mixaxa ya n'wina yi fanele ku tshama yi hlawulekile, hikuva HOSI Xikwembu xi famba na n'wina loko mi huma nyimpi, leswaku xi ta mi lwela, xi nyiketa valala va n'wina emavokweni ya n'wina; hikokwalaho xi nga tshuki xi vona swo khomisa tingana exikarhi ka n'wina, hikuva xi nga ta mi fularhela.

₁₅“Loko nandza a balekela n'wini wa yena a tsutsumela eka n'wina, mi nga n'wi tlheriseli eka n'wini wa yena. ₁₆N'wi tshikeni a tshama exikarhi ka n'wina, endhawini leyi a nga ta tihlawulela yona hi ku rhandza. Munhu loyi, mi nga tshuki mi n'wi xanisa.

₁₇“Exikarhi ka Vaisraele, ku nga tshuki ku va ni vavasati kumbe vavanuna lava endlaka vunghwavava bya le swivandleni swa vukhongeri bya hava. ₁₈Naswona mali leyi kumiwaka hi ndlela leyi, mi nga tshuki mi yi yisa endlwini ya HOSI Xikwembu xa n'wina, naswona mi nga hetisi ku hlambanya ka n'wina ha yona, hikuva vunghwavava bya le swivandleni swa vukhongeri bya hava i manyala eka HOSI Xikwembu.

₁₉“Loko mi lomba Muisraele mali, kumbe swakudya, kumbe swilo swin'wana, mi nga tshuki mi lava ntswalo wa swona. ₂₀Eka munhu wa le handle, mi nga wu lava ntswalo, kambe ku nga ri eka Muisraele; loko mi endla sweswo, HOSI Xikwembu xi ta mi katekisa emintirhweni ya n'wina hinkwayo, loko mi ta va mi nghenile etikweni leri xi nga ta mi nyika rona ri va ra n'wina.

₂₁“Loko mi tiboha hi ku hlambanya ku humesela HOSI Xikwembu xanchumu, mi nga tsandzeki ku humesa xilo xa kona, hikuva loko swi nga vi tano, HOSI Xikwembu xi ta xi lava, kutani mi tikuma mi ri enandzwini. ₂₂Loko mi chava ku tiboha hi ku hlambanya, a mi nga vi na nandzu, ₂₃kambe loko mi tibohile hi n'wexe mi nga sindzisiwanga hi munhu, mi nga tshuki mi tsandzeka ku humesela HOSI Xikwembu leswi mi xi tshembiseke swona.

₂₄“Loko mi tshuka mi hundza hi le nsin'wini ya vhinya ya munhu-kuloni, mi nga kha mihandzu mi dya mi xurha, kambe mi nga tshuki mi kha yin'wana mi hoxa exirhundzwini. ₂₅Naswona loko mi hundza hi le nsin'wini ya koroni ya munhu-kuloni, mi nga tshova min'woko hi voko, mi nga tshuki mi tsema tinhlanga ta kona hi rihwevo.