Duteronoma 18

₁“Vaprista, va nga vanhu va nyimba hinkwayo ya ka Levhi, a va nga vi na nsimu kumbe ndzhaka etikweni ra Israele, vona va ta dya swa magandzelo lama nga ta hiseriwa HOSI Xikwembu, ni swin'wana leswi vanhu va nga ta xi humesela swona. ₂A va nga vi na ndzhaka exikarhi ka vamakwavo; HOSI Xikwembu hi yona ndzhaka ya vona, hilaha xi va tshembiseke hakona. ₃Leswi vaprista va faneleke ku swi kuma eka vanhu lava humesaka magandzelo hi homu kumbe hi nyimpfu, hi leswi: Va ta nyikiwa xiphanga, ni tihlaya timbirhi, ni nyimba. ₄Mi ta va nyika ni ntshovelo wo sungula wa mavele, ni wa vhinya, ni mafurha yo sungula, ni voya byo sungula bya tinyimpfu ta n'wina. ₅Valevhi ni vana va vona va hlawuriwile hi HOSI Xikwembu xa n'wina, leswaku va hamba va xi tirhela exikarhi ka tinyimba ta ka n'wina hinkwato, va va vaprista va xona hilaha ku nga heriki.

₆“Un'wana wa Valevhi a nga tshuka a suka emutini wihi ni wihi lowu a tshamaka eka wona etikweni ra Israele, kutani a ya endhawini leyi HOSI Xikwembu xi yi hlawuleke. Sweswo a nga swi endla, loko a swi tsakela; ₇kutani a nga ha va muprista, a tirhela HOSI Xikwembu xa yena ku fana ni Valevhi lavan'wana lava va xi tirhelaka endhawini leyi. ₈Mulevhi wo tano ú ta kuma swakudya swo ringana ni swa lavan'wana, ehandle ka leswi a nga swi kumaka hi ku xavisa tinhundzu leti a siyeriweke tona hi vatata wa yena.

₉“Loko mi ta va mi fikile etikweni leri HOSI Xikwembu xa n'wina xi mi nyikaka rona, vonani leswaku mi nga tshuki mi tekelela mikhuva ya manyala leyi vanhu va matiko lawaya va yi endlaka. ₁₀Exikarhi ka n'wina, ku nga tshuki ku va ni loyi a humesaka magandzelo hi ku hisa n'wana wa yena wa xinuna kumbe wa xisati; naswona ku nga tshuki ku va na loyi a tirhisaka swa vungoma, ni loyi a vhumbhaka kumbe ku hlahluva, kumbe ku va nyamusoro, ₁₁kumbe loyi a endlaka migilo-gilo, kumbe xingomantanda, kumbe loyi a nga ni swikwembu, kumbe loyi a vutisaka timhaka eka swona. ₁₂Un'wana ni un'wana loyi a endlaka swilo swo tano, HOSI Xikwembu xa n'wi nyenya; hi swona swi endlaka leswaku xi hlongola vamatiko lava endlaka manyala layo tano va suka emahlweni ka n'wina. ₁₃Mi nga tshuki mi va ni leswi solekaka emahlweni ka HOSI Xikwembu xa n'wina: ₁₄Vanhu va tinxaka leti mi nga kusuhi ni ku ti tekela tiko, va hlahluva ni ku vhumbha, kambe n'wina, HOSI Xikwembu xa n'wina xa mi alela ku endla sweswo.

₁₅“HOSI Xikwembu xa n'wina xi ta mi rhumela muprofeta loyi a fanaka na mina, loyi xi nga ta n'wi hlawula exikarhi ka va ka n'wina; n'wi yingiseni, ₁₆hikuva siku leri a mi hlengeletanile entshaveni ya Horebe, mi komberile sweswo eka HOSI Xikwembu xa n'wina, mi ku: ‘A ha ha swi lavi ku twa rito ra HOSI Xikwembu xa hina kumbe ku languta ndzilo lowukulu lowu, hikuva hi nga fa.’ ₁₇Kutani HOSI Xikwembu xi ndzi byerile xi ku: ‘Hinkwaswo leswi va swi vulaka, swi lulamile. ₁₈Ndzi ta va rhumela muprofeta loyi a fanaka na wena, loyi a nga ta huma eka va ka vona. Ndzi ta n'wi byela leswi a faneleke ku vulavula swona, kutani yena ú ta va tivisa hinkwaswo leswi ndzi nga ta n'wi lerisa swona. ₁₉Un'wana ni un'wana loyi a nga ta ala ku yingisa marito ya muprofeta loyi ndzi nga ta n'wi rhuma, ndzi nge n'wi tshiki ntsena. ₂₀Kambe muprofeta loyi a vulavulaka hi vito ra mina, ndzi nga n'wi rhumanga, kumbe loyi a vulavulalaka swikwembu swa hava, ú ta dlayiwa.’ ₂₁Kutani mi nga tshuka mi tivutisa mi ku: ‘Xana hi ta swi tivisa ku yini leswaku marito lawa yo tano a ma humi eka HOSI Xikwembu, xana?’ ₂₂Muprofeta loyi a vulaka leswaku ú rhume hi HOSI Xikwembu, kambe leswi a swi vulaka swi nga humeleli, ú vulavula leswi nga humiki eka xona. Muprofeta wo tano ú ta va a tivulavulela swo huma enhlokweni ya yena; mi nga n'wi chavi!