Mintirho 3

₁Siku rin'wana, Petro na Yohane a va tlhandlukela eTempeleni nindzhenga, hi nkarhi wa xikhongelo. ₂Kona eTempeleni, enyangweni leyi vuriwaka “Leyo Saseka”, a ku ri ni munhu la velekiweke a ri xigono; a va hamba va n'wi rhwala, va n'wi veka kona masiku hinkwawo, leswaku a ta kombela swihanano eka lava nghenaka eTempeleni. ₃Loko munhu loyi a vona Petro na Yohane va ri kusuhi ni ku nghena eTempeleni, a kombela swihanano eka vona. ₄Kambe Petro na Yohane va n'wi honokela, kutani Petro a ku: “Hi langute.” ₅Munhu loyi a va languta swinene, a ehleketa leswaku va ta n'wi nyika xanchumu. ₆Kambe Petro a ku ka yena: “Silivhere ndzi hava, ni nsuku a ndzi na wona, kambe lexi ndzi nga na xona, ndzi ta ku nyika xona: Hi vito ra Yesu Kriste wa Nazareta, ndzi ri: Famba!” ₇Kutani a n'wi khoma hi voko ra xinene, a n'wi yimisa; hi nomu lo minkondzo ya yena ni mahlakala ya yena swi va swi tiya. ₈Kutani o kàkàtsùkù, a yima a famba; a nghena eTempeleni swin'we na vona, a ri karhi a famba-famba, a tlula-tlula, a dzunisa Xikwembu, ₉kutani vanhu hinkwavo va n'wi vona a ri karhi a famba, a dzunisa Xikwembu. ₁₀Loko va vona leswaku hi yena loyi a a tshamela ku kombela swihanano eTempeleni, enyangweni leyi vuriwaka “Leyo Saseka”, va khomiwa hi ku chava, va hlamarisiwa swinene hi leswi humeleleke eka yena.

₁₁Leswi munhu loyi a a namarhela Petro na Yohane, vanhu hinkwavo va hlamala, va ta ka vona hi ku tsutsuma, erikupakupeni leri a va ku i ra Solomoni.

₁₂Loko Petro a swi vona, a ku ka vona: “Vavanuna va Israele, hikwalaho ka yini mi hlamala mhaka leyi, mi hi tlhava hi mahlo hi mukhuva lowu xana, wonge hi loko ku ri hina hi nga endla leswaku munhu loyi a famba, hi matimba ya hina kumbe hi vukhongeri bya hina? ₁₃Xikwembu xa Abrahama ni xa Isaka ni xa Yakobo, Xikwembu xa vatata wa hina, xi dzunisile nandza wa xona Yesu, loyi mi n'wi nyiketeke, mi tlhela mi n'wi landzula emahlweni ka Pilato; kambe Pilato yena a a vurile leswaku a ntshunxiwa. ₁₄Yesu a a ri la hlawulekeke, la lulameke; kambe n'wina mi n'wi landzurile, mi kombela ku ntshunxeriwa mudlayi, ₁₅kutani mi dlaya munyiki wa vutomi; kambe Xikwembu xi n'wi pfuxile eku feni; hina hi timbhoni ta swona. ₁₆Hikokwalaho, leswi tiyiseke munhu loyi mi n'wi tivaka ni ku n'wi vona, i vito ra Yesu ni ku pfumela eka vito leri; kutani ku pfumela loku, ku hanyisile munhu loyi hakunene, hi matimba ya Yesu, hilaha mi swi vonaka hakona n'wina hinkwenu.

₁₇“Kutani ke varikwerhu, ndza swi tiva leswaku n'wina ni tihosi ta n'wina, mi endlile swilo sweswo hi ku pfumala vutivi, ₁₈kambe hi mukhuva wolowo, Xikwembu xi endlile leswaku ku hetiseka leswi xi nga swi tivisa khale hi milomo ya vaprofeta hinkwavo: Hileswaku Mesiya wa xona a a ta twisiwa ku vaviseka.

₁₉“Loko swi ri tano, hundzukani, mi tlhelela eka Xikwembu, leswaku swidyoho swa n'wina swi rivaleriwa, ₂₀ni leswaku minkarhi yo phyuphya leyi humaka eHosini yi sungula, ni leswaku Hosi yi mi rhumela Yesu, yena loyi a nga vekiwa ku va Mesiya wa n'wina; ₂₁ú fanele ku tshama etilweni, ku ko ku fika minkarhi ya ku pfuxetiwa ka swilo hinkwaswo, leyi Xikwembu xi nga yi vula ni khale, hi milomo ya vaprofeta va xona lavo hlawuleka. ₂₂Hakunene Muxe ú vurile, a ku: ‘Hosi Xikwembu xa n'wina xi ta mi humesela muprofeta la fanaka na mina, a huma exikarhi ka va ka n'wina; mi ta n'wi yingisa eka hinkwaswo leswi a nga ta mi byela swona. ₂₃Kutani un'wana ni un'wana loyi a nga yingisiki muprofeta yoloyi, ú ta susiwa etikweni.’ ₂₄Naswona, vaprofeta hinkwavo lava nga vulavula ku sukela eka Samiele ni ka lava teke endzhaku ka yena, na vona va tivisile ta masiku lawa. ₂₅Hi n'wina valandzeri va vaprofeta, hi n'wina va ntwanano lowu Xikwembu xi nga wu endla ni vatata wa n'wina, loko xi te eka Abrahama: ‘Hi vatukulu va wena, ndzi ta katekisa tinxaka hinkwato ta misava.’ ₂₆Loko Xikwembu xi rhumerile nandza wa xona, xi n'wi humesile hi le ka n'wina eku sunguleni leswaku a mi katekisa hi ku hundzuluxa un'wana ni un'wana wa n'wina emikhuveni ya yena leyo biha.”