III Yohane 1

₁Mina nkulukumba ndzi tsalela wena Gayo nakulorhi, wena ndzi ku rhandzaka hi mbilu hinkwayo, ₂ndzi ri karhi ndzi khongela leswaku swilo swa wena hinkwaswo swi famba swinene, ni leswaku u va la tsakeke swinene emirini; ndza swi tiva leswaku swa moya wa wena swona swi lulamile swinene. ₃Hakunene ndzi tlangerile ngopfu loko vamakwerhu van'wana va fikile, kutani va vurile hilaha u hanyaka entiyisweni hakona; hakunene ku hanya entiyisweni i ntolovelo wa wena. ₄Loko ndzi twa leswaku vana va mina va hanya entiyisweni, eka mina ku hava ku tsaka kun'wana loku tlulaka koloko.

₅Nakulorhi, i mhaka leyi kombaka ku tshembeka ka wena, loko u pfuna vamakwerhu hi tindlela tin'wana ni tin'wana, ngopfu-ngopfu lava nga vaendzi. ₆Vaendzi lava va vekile vumbhoni bya rirhandzu ra wena emahlweni ka vanhu va kereke. U ta va u endla swinene, loko u va longela swa riendzo ra vona, hilaha swi fanelaka hakona entirhweni wa Xikwembu. ₇Hikuva va humile emakaya hikwalaho ka vito ra xona, kutani a va nkhensanga ku amukela nchumu eka vamatiko. ₈Hikokwalaho, swa hi fanela ku seketela vanhu vo fana na vona, leswaku hi ta va lava tirhisanaka na vona entiyisweni.

₉Ndzi tsalele kereke timhaka tin'wana; kambe Diyotrefo loyi a tiendlaka murhangeri, a nga nkhensi vufambisi bya hina. ₁₀Hikokwalaho, loko ndzi ta, ndzi ta paluxa leswi a swi endlaka, hikuva wa hi sandza hi marito layo biha. Ehandle ka swona sweswo, ú ala ni ku amukela vamakwerhu, a engeta a sivela lava navelaka ku va amukela, a va hlongola ni le kerekeni.

₁₁Nakulorhi, u nga tekeleli mikhuva leyo biha, kambe tekelela leyinene. Loyi a endlaka leswinene i wa Xikwembu; loyi a endlaka leswo biha a nga vonanga Xikwembu.

₁₂Demetriyo ú ni vito lerinene exikarhi ka vanhu hinkwavo; kunene sweswo i ntiyiso hi xiviri xa wona; na hina hi tiyisa sweswo; kutani wa swi tiva leswaku vumbhoni bya hina byi tiyile.

₁₃Ndzi ni leswo tala leswi ndzi nga ku tsalelaka swona, kambe swa antswa ndzi nga ku tivisi swona hi papila. ₁₄Ndzi tshemba leswaku ndzi ta hatla ndzi ku vona, kutani hi ta vulavula hi ri karhi hi vonana hi mahlo.

₁₅Ku rhula a ku ve na wena. Vanakuloni hinkwavo va ku rungula. Rungula vanakulorhi hinkwavo; a hi siyanga munhu.