II Samiele 9

₁Siku rin'wana, Davhida a ku: “Xana ú kona munhu wa rixaka ra Sawulo loyi a ha hanyaka xana? Ndzi lava ku n'wi komba tintswalo, hikwalaho ka Yonatani.” ₂A ku ri ni nandza un'wana endyangwini wa Sawulo; vito ra yena a va ku i Siba; kutani va ya n'wi tivisa leswaku wa laveka entsinda. Loko a fika, Hosi Davhida a ku ka yena: “Hi wena Siba xana?” Yena a hlamula a ku: “Ina, hi mina; ndzi nandza wa wena hosi.” ₃Kutani hosi yi ku ka yena: “Xana a ku salanga na un'we wa ndyangu wa ka Sawulo, loyi ndzi nga n'wi kombaka tintswalo leti Xikwembu xi ti lavaka, xana?” Siba a hlamula hosi a ku: “Ú kona, i Mefiboxete n'wana Yonatani, kambe ú lamarile milenge.” ₄Hosi yi ku ka yena: “Ú kwihi xana?” Siba a hlamula a ku: “Ú tshama na Makiri n'wana Amiele, emutini wa Lo-Debara.” ₅Kutani hosi Davhida a rhuma vanhu va ya eka Makiri n'wana Amiele, emutini wa Lo-Debara, va ya teka Mefiboxete va vuya na yena. ₆Loko Mefiboxete n'wana Yonatani wa Sawulo a fika emahlweni ka Davhida, a korhama mombo wa yena wu ko wu khumba ehansi, kutani a nkhinsamela Davhida. Kutani Davhida a ku: “Xewani Mefiboxete!” Yena a hlamula a ku: “Ina, hosi! Ndzi nandza wa wena!” ₇Kutani Davhida a ku ka yena: “U nga chavi, hikuva ndzi lava ku ku komba tintswalo hikwalaho ka tata wa wena Yonatani: Ndzi ta ku tlherisela masimu hinkwawo ya kokwa wa wena Sawulo; tlhandlakambirhi, u ta dya na mina laha ntsindza masiku hinkwawo.” ₈Mefiboxete a tlhela a nkhinsama, a ku: “Xana ndzo va yini, leswi u tikarhatelaka mbyana leyi feke yo fana na mina, xana?”

₉Kutani hosi yi vitana Siba nandza wa Sawulo, yi ku: “Hinkwaswo leswi a swi ri swa n'wini wa wena Sawulo, ni swa maxaka ya yena hinkwawo, ndzi swi nyika Mefiboxete ntukulu wa yena. ₁₀Kutani wena Siba, ni vana va wena, ni malandza ya wena, mi ta n'wi rimela masimu. Leswi u nga ta swi tshovela, u ta swi yisa eka ndyangu wa n'wini wa wena Sawulo, leswaku va ta dya swona. Loko a ri Mefiboxete, yena ú ta dya na mina laha ntsindza masiku hinkwawo.” Siba loyi a a ri ni vana va 15 ni malandza ya 20. ₁₁Siba a hlamula a ku: “Mina nandza wa wena, ndzi ta endla hinkwaswo leswi wena hosi n'wini wanga u ndzi lerisaka swona.” Ku sukela kwalaho, Mefiboxete a a hamba a ya dya ni hosi entsindza, a langutiwa tanihi loko a ri un'wana wa vana va hosi.

₁₂Mefiboxete a a ri ni n'wana wa mufana, vito ra yena a va ku i Mika. Hinkwavo lava a va tshama emutini wa Siba va va malandza ya Mefiboxete. ₁₃Mefiboxete a a tshama eYerusalema, a dya na hosi entsindza masiku hinkwawo. A a lamarile milenge hinkwayo.