Ta Davhida na Siba
1Loko Davhida a hundzilenyana nhlohlorhi ya ntshava, a hlanganisiwa hi Siba nandza wa Mefiboxete. Siba a a ri ni timbhongolo timbirhi leti rhwaleke swinkwa swa 200, ni dzana ra swichocho swa mihandzu ya vhinya, ni swimbhundzwa swa dzana swa makuwa, ni vhinyo enkwameni wa dzovo. 2Hosi Davhida a vutisa Siba a ku: “Xana u ya na swona kwihi swilo leswi xana?” Siba a hlamula a ku: “Timbhongolo leti, vandyangu wa wena va ta gada we hosi; swinkwa ni mihandzu malandza ya wena ma ta dya; vhinyo yona yi ta nwiwa hi lava va nga ta karhala emananga.” 3Kutani Davhida a ku: “Xana Mefiboxete, ntukulu wa n'wini wa wena Sawulo, ú kwihi xana?” Siba a hlamula hosi a ku: “Ú tshama eYerusalema, hikuva ú ri: ‘Namuntlha Vaisraele va ta ndzi tlherisela vuhosi bya kokwana!’ ” 4Hiloko hosi Davhida a ku ka Siba: “Yingisa! Hinkwaswo leswi a swi ri swa Mefiboxete, sweswi i swa wena.” Siba a ku: “Inkomu! Ku dya k'engeta! U nga ndzi cukumeti, we hosi n'wini wanga.”
Ta Davhida na Ximeyi
5Loko hosi Davhida a fika eBahurimi, ku huma wanuna wa ndyangu wa va ka Sawulo loyi a va ku i Ximeyi n'wana Gera; a ta a ri karhi a rhuketela, 6a hoxetela hosi Davhida ni malandza ya yena hinkwawo hi maribye; kambe masocha hinkwawo ni tinhenha hinkwato a va sirhelela Davhida ematlhelweni hinkwawo. 7Ximeyi a a rhuketela a ku: “Suka u famba, wena mudlayi, mubihi ndziwena! 8HOSI Xikwembu xa ku ba hikwalaho ka va ka Sawulo hinkwavo lava u va dlayeke, u va tekela ni vuhosi. Kambe sweswi HOSI Xikwembu xi nyikile n'wana wa wena Abixalomu evuhosi lebyi. Leswi swi ku humelelaka i mhangu ku tilavela, hikuva u mudlayi wena!”
9Kutani Abixayi n'wana Seruya a ku ka Davhida: “Xana u yi tshikela yini mbyana leyi yo fa, yi ku rhuketela, wena hosi n'wini wanga, xana? Ndzi pfumelele ndzi tsemakanya, ndzi ya n'wi tsema nhloko.” 10Kambe Davhida a hlamula a ku: “Xana n'wina vana va Seruya, mi nghenelelela yini etimhakeni ta mina, xana? Loko ku ri leswaku ú ndzi rhuketele hi ku rhumiwa hi HOSI Xikwembu, xana ú kona loyi a nga n'wi vutisaka leswaku ú swi endlela yini, xana?” 11Kutani Davhida a byela Abixayi ni malandza ya yena hinkwawo, a ku: “Vonani, hambi a ri n'wana wa mina wa xiviri ú lava ku ndzi dlaya! Xana swi mi hlamarisela yini swa munhu loyi wa ka Benjamini, xana? N'wi tshikeni a rhuketela, loko a rhumiwile hi HOSI Xikwembu. 12Kumbexana HOSI Xikwembu xi ta vona ku xaniseka ka mina, xi ndzi nyika leswo saseka, ematshan'weni ya nhlambha leyi.” 13Kutani Davhida ni masocha ya yena va famba hi gondzo; Ximeyi yena a a keketlela hi le tlhelo ka xintshabyana, a lulama ni gondzo, a famba a ri karhi a rhuketela, a hoxetela Davhida hi maribye, a n'wi bela ritshuri. 14Hosi Davhida ni vanhu hinkwavo lava a a ri na vona va fika enambyeni wa Yordani va karhele swinene, kutani Davhida a wisa kona.
Ta Abixalomu loko a fika eYerusalema
15Enkarhini wolowo, Abixalomu ni vuthu hinkwaro ra vavanuna va Israele va fika eYerusalema; Ahitofele a a ri na vona. 16Loko Huxayi lowa Muariki, nakulobye wa Davhida, a ya eka Abixalomu, a fika a huwelela, a ku: “Hanya hi masiku, we hosi! Hanya hi masiku!” 17Kutani Abixalomu a ku ka Huxayi: “Xana loku hi kona ku tshembeka ka wena eka nakuloni Davhida, xana? Hikwalaho ka yini u nga fambanga ni nakuloni loyi wa wena, xana?” 18Huxayi a hlamula a ku: “A hi swona! Mina ndzi munhu wa loyi a hlawuriweke hi HOSI Xikwembu, naswona a hlawuriweke hi vanhu lava, ni vaaki hinkwavo va Israele; ndzi namarhela yena. 19Tlhandlakambirhi, xana ndzi nga va nandza wa mani, loko ku nga ri wa wena n'wana Davhida! Ndzi ta ku tirhela tanihilaha ndzi tirheleke tata wa wena hakona.”
20Kutani Abixalomu a vutisa Ahitofele, a ku: “Xana u nga hi tsundzuxa leswaku hi endla yini?” 21Ahitofele a hlamula a ku: “Yana u ya etlela ni vasati va tata wa wena lavatsongo, lava a va siyeke leswaku va hlayisa tindlu ta le ntsindza; hi kona Vaisraele hinkwavo va nga ta tiva leswaku u tivangele rivengo lerikulu eka tata wa wena. Kutani vanhu hinkwavo lava va ku seketelaka va ta tiya.” 22Hiloko va akela Abixalomu ntsonga elwangwini, a ya etlela ni vasati va tata wa yena lavatsongo kona, Vaisraele hinkwavo va ri karhi va swi vona. 23Eminkarhini yoleyo, switsundzuxo swa Ahitofele a swo tekiwa onge hi loko ku vutisiwile timhaka eka Xikwembu. Hambi a ri Davhida kumbe Abixalomu, a va tshemba ngopfu switsundzuxo swa Ahitofele.
