II Tihosi 17

₁Hi lembe ra vu-12 ra ku fuma ka Akazi hosi ya Yuda, Hoxeya n'wana Ela a sungula ku fuma tiko ra Israele, a fuma malembe ya 9 a ri eSamariya. ₂Hoxeya a endla leswo biha emahlweni ka HOSI Xikwembu, kambe a nga fananga ni vakokwa wa yena tihosi ta Israele hi ku homboloka. ₃Siku rin'wana, Xalimanezere hosi ya le Asiriya a hloma matlhari, a ya lwa na Hoxeya, kambe Hoxeya a tinyiketa, kutani a n'wi luva. ₄Kambe hosi ya le Asiriya yi kuma leswaku Hoxeya wa yi xenga: Hoxeya a a rhumile vanhu eka So hosi ya le Egipta, kutani a tshika ku humesa ndzuvo wa lembe eka hosi ya le Asiriya, lowu a a hamba a humesa malembe hinkwawo. Kavaloko Xalimanezere a khoma Hoxeya, a n'wi pfalela ekhotsweni.

₅Endzhaku ka sweswo, hosi ya le Asiriya yi hlasela tiko hinkwaro ra Israele, yi kondza yi fika emutini wa Samariya, yi wu rhendzela ku ringana malembe manharhu. ₆Hi lembe ra vu-9 ra ku fuma ka Hoxeya hosi ya Israele, hosi ya Asiriya yi teka muti wa Samariya, kutani yi yisa Vaisraele eAsiriya va ri mahlonga; yi va veka emutini wa Hala, ni le ribuweni ra nambu wa Habori le Gozana, ni le mutini ya Vameda.

₇Leswi swi humelerile hikuva Vaisraele a va dyoherile HOSI Xikwembu xa vona. Hambileswi Xikwembu a xi va humesile etikweni ra Egipta leswaku va nga ha fumiwi hi Faro hosi ya Egipta, vona va yile emahlweni va gandzela swikwembu swimbe; ₈va hanyile hi mikhuva ya vamatiko lava hlongoriweke hi HOSI Xikwembu loko Vaisraele va nghena etikweni; naswona, va hanyile hi mikhuva leyi tihosi ta Israele ti nga tisungulela yona. ₉Vaisraele va endlile exihundleni swilo leswi nga lavekiki, leswi arisiwaka hi HOSI Xikwembu xa vona. Va tilulamiserile ndhawu ya magandzelo eswitsungeni leswo hlawuleka, emitini hinkwayo ya vona, ku sukela eswimitanini swa varindzi, ku ya fika emitini leyikulu ya makhokholo; ₁₀naswona va yimisile maribye ya vona ya vukhongeri bya hava, ni timhandze ta Axera xikwembukazi, exintshabyanini xin'wana ni xin'wana ni le ndzhutini wa murhi wun'wana ni wun'wana lowu tlhumeke. ₁₁Va hisele mirhi ya risuna kona, eswitsungeni leswo hlawuleka hinkwaswo, tanihi vamatiko lava susiweke hi HOSI Xikwembu loko Vaisraele va nghena etikweni; naswona va endlile swilo leswo biha, va kondza va hlundzukisa ngopfu HOSI Xikwembu; ₁₂va tirherile swifaniso swa swikwembu swa hava, leswi HOSI Xikwembu a xi va lerisile leswaku va nga tshuki va swi tirhela.

₁₃Kasi HOSI Xikwembu a xi tsundzuxile vanhu va Israele ni va Yuda, hi nomo wa vaprofeta ni wa varhumiwa va xona hinkwavo, xi ku: “Fularhelani mahanyelo ya n'wina layo biha, mi hlayisa swileriso swa mina ni milawu ya mina, hi ku landza Nawu lowu ndzi wu leriseke vakokwa wa n'wina, lowu ndzi mi rhumeleke wona hi nomo wa vaprofeta malandza ya mina.” ₁₄Hambiswiritano, a va yingisanga, va tiomisa tinhloko ku fana ni vakokwa wa vona lava nga pfumelangiki eka HOSI Xikwembu xa vona. ₁₅Va tshikile milawu ya xona, ni ntwanano lowu a xi wu endlile ni vakokwa wa vona, ni switsundzuxo swa xona loko xi va laya. Va gandzerile swikwembu swa hava, kutani na vona va hundzukile vanhu va hava; naswona, va hanyile tanihi vamatiko lava akelaneke na vona; kasi HOSI Xikwembu a xi va lerisile leswaku va nga tshuki va landza mikhuva ya vamatiko. ₁₆Va tshikile swileriso hinkwaswo swa HOSI Xikwembu xa vona, kutani va n'okisa koporo, va tivumbela swifaniso swa marhole mambirhi. Naswona va vatlile mhandze ya Axera xikwembukazi, va nkhinsamela dyambu ni tinyeleti va tirhela na Baali. ₁₇Va hisile vana va vona va xinuna ni va xisati, va gandzela ha vona; va yile eka vangoma, va ya hlahluva, va tinyiketa ku endla leswi biheke emahlweni ka HOSI Xikwembu, va kondza va xi hlundzukisa. ₁₈Hikokwalaho, HOSI Xikwembu, xi va hlundzukerile ngopfu, kutani xi va yisa kule na xona, ku nga sali na un'we wa vona, ehandle ka nyimba ya Yuda ntsena.

₁₉Vanhu va Yuda na vona a va hlayisanga milawu ya HOSI Xikwembu xa vona, kambe va hanyile hi mikhuva leyi Vaisraele va nga tisungulela yona. ₂₀Kutani HOSI Xikwembu xi tshikile rixaka hinkwaro ra Vaisraele, xi va tsongahata hi ku va nyiketa emavokweni ya vaonhi, xi kondza xi va cukumeta kule na xona.

₂₁Loko HOSI Xikwembu xi hambanisile Vaisraele va le Samariya ni rixaka ra Davhida eYerusalema, vona va vekile Yerobuwamu n'wana Nebati leswaku a va hosi ya vona, kutani Yerobuwamu a va hambukisela kule ni HOSI Xikwembu, a va kucetela ku endla swidyoho leswikulu. ₂₂Vanhu va Israele va hanyile eswidyohweni leswi Yerobuwamu a swi endleke, va nga swi fularheli; ₂₃kutani swi fikile laha HOSI Xikwembu xi yisaka Vaisraele kule na xona, hilaha xi vuleke hakona hi milomo ya vaprofeta hinkwavo, malandza ya xona. Vaisraele va susiwile etikweni ra vona, va yisiwa eAsiriya va ri mahlonga; va ha ri kwale ni namuntlha.

₂₄Hosi ya le Asiriya yi tisa vanhu vo huma hi le Babilona, ni le Kuta, ni le Avha, ni le Hamata, ni le Safari-Vhayimi, yi va veka emitini ya tiko ra Samariya, etindhawini ta vanhu va Israele. Kutani vanhu lava va teka tiko ra Samariya, va tshama emitini ya rona. ₂₅Loko va sungula ku tshama, a va gandzelanga HOSI Xikwembu. Hikokwalaho, HOSI Xikwembu xi va rhumela tinghala, leti ti dlayeke van'wana va vona. ₂₆Kutani hosi ya le Asiriya yi kuma mahungu lawa ya nge: “Vanhu lava u va rhurhiseke ni ku va veka emitini ya tiko ra Samariya, a va tivi ndlela yo khongela Xikwembu xa tiko ra kona; hikokwalaho xi va rhumeleke tinghala, leti ti va hetaka, hikuva a va tivi hilaha Xikwembu xa tiko ra kona xi fanelaka ku khongeriwa hakona.” ₂₇Hosi ya le Asiriya yi hlamula yi ku: “Va rhumeleni un'wana wa vaprista lava mi vuyeke na vona haleno. A a ye a ya tshama na vona le Samariya, a va dyondzisa makhongelele ya Xikwembu xa tiko ra kona.” ₂₈Kutani un'wana wa vaprista va le Samariya, loyi na yena a a yisiwile evukhumbini le Asiriya a vuya a ta tshama eBetele, kutani a dyondzisa vanhu hilaha va fanelaka ku khongela HOSI Xikwembu hakona.

₂₉Kambe vamatiko lava hinkwavo va yile emahlweni na ku tiendlela swifaniso swa swikwembu swa ka vona, va swi veka etindlwini ta le switsungeni leswo hlawuleka, leti Vasamariya a va ti akile. Vanhu lava hinkwavo va endlile sweswo emitini leyi a va tshama eka yona. ₃₀Vanhu lava humeke hi le Babilona va fika va vatla swifaniso swa Sukoti-Benoti, va le Kuta va vatla swa Nergala, ni va le Hamata va vatla swa Axima. ₃₁Va le Avha va vatla swifaniso swa Nibahazi na Tartaka; va le Sefari-Vhayimi va hisa vana va vona, va gandzerisa sweswo swikwembu swa vona swa Adrameleke na Anameleke. ₃₂Kambe vanhu lava, hi tlhelo rin'wana a va khongela HOSI Xikwembu, kutani va tihlawulela van'wana exikarhi ka vona ku va vaprista va switsunga leswo hlawuleka, ni ku humesela vanhu magandzelo etindlwini ta le switsungeni. ₃₃Hi mukhuva wolowo, a va khongela HOSI Xikwembu, swin'we ni ku tirhela swikwembu swa ka vona, ku fana ni vaaki va matiko lava va humeke eka wona.

₃₄Va ha hanyisa sweswo ku fikela ni namuntlha, hi ku landza mikhuva ya vona ya khale. A va khongeli HOSI Xikwembu, a va hanyi hi milawu ni swiletelo leswi va nga nyikiwa swona; a va yingisi Nawu ni swileriso leswi HOSI Xikwembu xi nyikeke vatukulu va Yakobo, loyi xi n'wi thyeke vito ra Israele. ₃₅Kasi HOSI Xikwembu a xi endlile ntwanano na vona, xi va lerisa xi ku: “Mi nga tshuki mi khongela swikwembu swimbe, kumbe ku swi nkhinsamela, kumbe ku swi tirhela, kumbe ku swi humesela magandzelo; ₃₆kambe mi ta gandzela mina HOSI Xikwembu ntsena, mina ndzi mi humeseke etikweni ra Egipta, hi ntamu lowukulu ni mintirho ya matimba. Hi mina loyi mi nga ta ndzi nkhinsamela, ni ku ndzi humesela magandzelo. ₃₇Loko yi ri milawu, ni swiletelo, ni Nawu, ni swileriso, leswi ndzi nga mi nyika swona hi matsalwa, mi ta swi hlayisa leswaku mi hanya ha swona masiku hinkwawo; mi nga tshuki mi khongela swikwembu swimbe. ₃₈Naswona mi nga tshuki mi rivala ntwanano lowu ndzi wu endleke na n'wina. Mi nga tshuki mi khongela swikwembu swimbe, ₃₉kambe mi ta khongela mina ntsena HOSI Xikwembu xa n'wina, hikuva hi mina loyi a nga ta mi ntshunxa emavokweni ya valala va n'wina.” ₄₀Hambiswiritano, vanhu lava a va yingisanga, kambe va yile emahlweni va hanya hi mikhuva ya vona ya khale.

₄₁Kutani vamatiko lava va khongerile HOSI Xikwembu swin'we ni ku tirhela swikwembu swa vona swa hava. Hambi va ri vana va vona ni vatukulu va vona, va endlise sweswo; ku fikela ni namuntlha, va ha endlisa sweswi vakokwa wa vona a va endla swona.