II Tikronika 14

₁Abiya a tietlelela, a lahliwa ni vakokwa wa yena emutini wa Davhida, kutani Asa n'wana wa yena a sala a fuma. Eminkarhini ya ku fuma ka Asa, tiko ra Yuda ri tshamile malembe ya khume ri ri ni ku rhula.

₂Asa a hanya hi mukhuva lowunene, a endla leswi tsakisaka HOSI, Xikwembu xa yena. ₃A susa tialitari ta swikwembu swa vamatiko, a herisa ni mintirho ya le switsungeni leswo hlawuleka, a fayetela maribye ya kona ya vugandzeri, a tsema ni timhandze ta Axera, xikwembukazi. ₄A lerisa va ka Yuda ku namarhela HOSI, Xikwembu xa vatata wa vona, va hlayisa Nawu wa xona ni swileriso swa xona. ₅Emitini hinkwayo ya tiko ra Yuda, Asa a herisa mintirho ya le switsungeni leswo hlawuleka, a susa ni tialitari ta kona, to hisela mirhi ya risuna eka tona. Kutani vanhu va yena va va ni ku rhula ehansi ka mfumo wa yena. ₆Ku rhula loku, Asa ú nyikiwile hi HOSI Xikwembu, a nga ha karhatiwi hi tinyimpi, a kuma nkarhi wa ku aka miti ya makhokholo etikweni ra Yuda leri a ri ri ni ku rhula. ₇Asa a vulavula ni vanhu va yena, a ku: “A hi pfuxeni miti leyi, hi yi biyelela hi swihondzo ni rirhangu ni timbanti leti gogiwaka. Tiko ra ha ri ra hina, hikuva hi yingisile HOSI, Xikwembu xa hina. Ina, hi xi yingisile, kutani xi hi nyikile ku rhula matlhelo hinkwawo.” Hiloko va sungula mintirho ya ku aka, va kateka va yi heta.

₈Asa a a ri ni mavuthu ya va ka Yuda, masocha ya kona ma ringana 300 000, ma hlomile switlhangu ni matlhari; naswona a a ri ni mavuthu ya masocha ya ka Benjamini; masocha ya kona a ma ringana 280 000, ma tamerile switlhangu ma khome ni vurha. Masocha lawa hinkwawo a ma ri tinhenha to tiya. ₉Muetiyopiya loyi va nge i Zera a huma nyimpi, a kongoma tiko ra Yuda ku ri hlasela, a ri ni masocha ya 1 000 000, ni makalichi ya nyimpi ya 300, a fika kusuhi ni muti wa Marexa. ₁₀Hosi Asa na yena a huma nyimpi ku ya lwa na Zera, kutani mavuthu hinkwawo ma xaxametiwa enkoveni wa Sefata kusuhi na Marexa. ₁₁Kutani Asa a khongela HOSI Xikwembu xa yena, a ku: “We HOSI, hi wena ntsena u kotaka ku lwela lava tsaneke, u va ponisa eka lava va va tlulaka hi matimba. Hi pfune u va na hina, we HOSI, Xikwembu xa hina, hikuva hi tshemba wena ntsena; loko hi ya hlangana ni ntshungu lowu wa valala, hi lava ku twarisa vito ra wena. We HOSI, u Xikwembu xa hina, u nga pfumeli leswaku loyi a nga munhu ntsena a ku tlula hi matimba!” ₁₂Hiloko HOSI Xikwembu xi hlula Vaetiyopiya, xi va tsutsumisa, Asa ni vanhu va Yuda va langutile kunene. ₁₃Kutani Asa ni masocha ya yena va hlongorisa Vaetiyopiya ku ya fika eGerara, va va dlayetela, ku nga sali na un'we wa vona, va hluriwa hi HOSI Xikwembu ni mavuthu ya xona. Kutani vavanuna va ka Yuda va rhwala swilo leswo tala leswi va swi phangheke. ₁₄Va ka Yuda va ya hlasela ni miti hinkwayo leyi a yi ri kusuhi na Gerara, va phangha swilo swo tala eka yona, hikuva vaaki va yona a va tsutsumile hi ku chava HOSI Xikwembu; nhundzu ya kona a yi tele ngopfu. ₁₅Va ka Yuda va hlasela ni lava goveke emadyelweni ya swifuwo, va khoma tinyimpfu ni tikamela leto tala va famba na tona. Kutani va tlhelela eYerusalema.