II Tikronika 12

₁Loko Rhobuwamu a hetile ku tiyisa vuhosi bya yena, ni loko a titwa a tshamisekile, a tshika ku namarhela nawu wa HOSI Xikwembu, kutani Vaisraele hinkwavo na vona va wu tshika. ₂Kutani hi lembe ra vuntlhanu ra ku fuma ka yena, mhaka leyi ya ku fularhela HOSI Xikwembu yi vangela Rhobuwamu ekhombo: Xixaka hosi ya le Egipta a huma nyimpi ku ta a ta hlasela muti wa Yerusalema; ₃a ta ni makalichi ya nyimpi yo ringana 1 200, ni vagadi va tihanci ta 26 000, ni masocha layo tala lama humeke na yena etikweni ra Egipta, va nga vanhu va le Libiya, ni va le Suka, ni va le Etiyopiya. ₄Xixaka ni vanhu lava va yena va hlasela miti ya makhokholo ya tiko ra Yuda, kutani va fika kusuhi na Yerusalema.

₅Kavaloko muprofeta Xemaya a ta eka Rhobuwamu, a n'wi kuma a ri ni tindhuna hinkwato ta tiko ra Yuda, hikuva a ti tsutsumele eYerusalema hi ku chava Xixaka; kutani muprofeta a ku ka vona: “HOSI Xikwembu xi ri, mi xi tshikile, hikokwalaho na xona xi ta mi tshika.” ₆Loko tindhuna ta Vaisraele ni hosi Rhobuwamu va twa sweswo, va tisola, va ku: “HOSI Xikwembu xi endla leswi lulameke.” ₇Kutani loko HOSI Xikwembu xi vona ku tisola ka vona, xi byela muprofeta Xemaya xi ku: “Leswi va tisoleke, a ndzi nga va herisi; ku nga ri khale, ndzi ta va lamulela. A ndzi nga ha va hlundzukeli, ndzi ta va kutsula emavokweni ya Xixaka. ₈Hambiswiritano va ta va hansi ka yena va n'wi tirhela, va kondza va twisisa leswaku ku tirhela mina kumbe ku tirhela lava fumaka matiko ya laha misaveni, swi hambene kule!”

₉Kutani Xixaka hosi ya le Egipta a hlasela muti wa Yerusalema, a phangha swilo swa nkoka swa le Tempeleni ni xuma xa le ntsindza, a famba na swona hinkwaswo. Exikarhi ka leswi phanghiweke, a ku ri ni switlhangu swa nsuku leswi vumbiweke hi hosi Solomoni. ₁₀Kutani Rhobuwamu a vumba switlhangu leswintshwa swa koporo ku siva leswi phanghiweke, a swi veka emavokweni ya tindhuna ta varindzi va le nyangweni ya ntsindza. ₁₁Minkarhi hinkwayo loko hosi yi ya gandzela endlwini ya HOSI Xikwembu, varindzi va nyangwa a va huma na yona va tamele switlhangu leswi, kutani endzhaku ka ntirho a va swi tlherisela endlwini ya varindzi.

₁₂Loko HOSI Xikwembu xi vona ku titsongahata ka Rhobuwamu, xi tshika ku n'wi hlundzukela, xi tshika ni makungu ya xona ya ku n'wi herisela makumu. Eminkarhini yoleyo, matshamelo ya timhaka etikweni ra Yuda a ma tsakisa.

₁₃Hosi Rhobuwamu a kuma ku tshamiseka eYerusalema, a fuma a ri kona. A a ri ni malembe ya 41 loko a nyikiwa vuhosi, a fuma malembe ya 17 a ri eYerusalema, wu nga muti lowu HOSI Xikwembu xi wu hlawuleke exikarhi ka miti hinkwayo ya tinyimba ta Israele, leswaku wu va muti lowu xi gandzeriwaka eka wona. Vito ra mana wa Rhobuwamu a a ri Naamani, munhu wa tiko ra Vaamoni. ₁₄Rhobuwamu ú endlile leswo biha, hikuva a nga navelanga hi mbilu ya yena hinkwayo ku tiva ku rhandza ka HOSI Xikwembu.

₁₅Mintirho ya Rhobuwamu evutomini bya yena hinkwabyo ni mavito ya va ka vona hinkwavo, swi tsariwile ebukwini ya “Matimu ya Muprofeta Xemaya” ni le bukwini ya “Matimu ya Ido Mavonakule”. Minkarhi hinkwayo, Rhobuwamu na Yerobuwamu a vo tshamela ku hlaselana. ₁₆Rhobuwamu a tietlelela, a lahliwa emasirheni ya vakokwa wa yena emutini wa Davhida. Kutani Abiya n'wana Rhobuwamu a sala a fuma.