II Tikronika 11

₁Loko Rhobuwamu a fika eYerusalema, a vitana vavanuna va ka Yuda ni va ka Benjamini, a humesa nyimpi ya tinhenha ta 180 000. Rhobuwamu a a lava ku ya lwa ni Vaisraele va le n'walungwini, leswaku a ta va vuyisela ehansi ka mfumo wa yena. ₂Kambe rito ra HOSI Xikwembu ri fika eka Xemaya munhu wa Xikwembu, ri ku: ₃“Byela Rhobuwamu n'wana Solomoni hosi ya Yuda, u byela ni Vaisraele hinkwavo lava nga tikweni ra Yuda ni ra Benjamini, ₄leswaku mina HOSI ndzi ni rito eka vona leri nge: ‘Mi nga tshuki mi hloma matlhari mi ya lwa ni varikwenu. Hangalakani, un'wana ni un'wana wa n'wina a timukela, hikuva mhaka leyi yi humelerile hi ku rhandza ka mina.’ ” Kutani va yingisa marito lawa ya HOSI Xikwembu, va tlhelela emakaya, va nga humanga ku ya lwa na Yerobuwamu.

₅Rhobuwamu a a tshama eYerusalema; kutani a pfuxa rirhangu ra miti ya tiko ra Yuda. ₆Miti ya kona hi leyi: Betlehema, na Etamu, na Tekowa, ₇na Beta-Suru, na Soko, na Adulama, ₈na Gati, na Marexa, na Zifi, ₉na Adorayimi, na Lakixi, na Azeka, ₁₀na Sora, na Ayaloni, na Hebroni. Hi yona miti leyi rirhangu ra yona ri pfuxiweke, etikweni ra Yuda ni ra Benjamini. ₁₁Rhobuwamu a aka ni makhokholo emitini ya kona, a yi veka ehansi ka tindhuna ta yena; a hlengeleta swakudya ni mafurha ni vhinyo, a swi hlayisela emitini yoleyo, ₁₂a veka eka yona switlhangu ni matlhari, a yi tiyisa swinene. Hi ndlela leyi, Rhobuwamu a tiyisa vuhosi bya yena ehenhla ka va ka Yuda ni va ka Benjamini.

₁₃Vaprista ni Valevhi lava a va hangalakile etindhawini ta vona to hambana-hambana etikweni ra Israele, va hlawula ku ya tshama na Rhobuwamu eYerusalema. ₁₄Hikokwalaho Valevhi va tshika madyelo ya swifuwo swa vona ni masimu ya vona, va rhurhela etikweni ra Yuda ni le Yerusalema, hikuva Yerobuwamu ni vanhu va yena a va va sivela ku tirha mintirho ya vona ya vuprista va tirhela HOSI Xikwembu. ₁₅Yerobuwamu a a tihlawulele vaprista va yena, a va veka eswitsungeni leswo hlawuleka, laha a ku gandzeriwa swikwembu swa swiphongho ni swifaniso swa marhole leswi endliweke hi yena Yerobuwamu. ₁₆Hikokwalaho, etinyimbeni hinkwato ta Vaisraele, a ku ri ni vanhu lava a va navela ku gandzela HOSI Xikwembu xa Israele, kutani va landza Valevhi le Yerusalema, va ya humesela kona magandzelo ya HOSI Xikwembu xa vatata wa vona; ₁₇hi ndlela leyi, va tiyisa mfumo wa Yuda, va seketela na Rhobuwamu n'wana Solomoni. Swi vile tano malembe manharhu, va ri karhi va famba emintileni ya Davhida na Solomoni.

₁₈Rhobuwamu a teka nsati; vito ra yena a a ri Mahalata; vatswari va Mahalata a va ri Yerimoto n'wana Davhida, na Abihayili N'wa-Eliyabu, wa ka Yese. ₁₉Mahalata nkata Rhobuwamu a veleka vana vanharhu va xinuna, va nga lava: Yewuxi, na Xemariya, na Zahama. ₂₀Rhobuwamu a teka nsati un'wana, vito ra yena a a ri Maaka n'wana Abixalomu. Kutani Maaka a veleka Abiya, na Atayi, na Ziza, na Xelomiti. ₂₁Rhobuwamu a a ri ni vasati lavakulu vo ringana 18, ni vasati lavatsongo va 60. Vana va yena va xinuna a va ri 28, va xisati a va ri 60. Exikarhi ka vasati va yena hinkwavo, Rhobuwamu a a rhandza ngopfu Maaka, N'wa-Abixalomu. ₂₂Hikokwalaho a hlawula Abiya n'wana Maaka ku va murhangeri exikarhi ka vamakwavo, hikuva Rhobuwamu a a ri ni makungu ya ku n'wi nyika vuhosi. ₂₃Rhobuwamu a tikomba a tlharihile hi ku hangalasa vana va yena va xinuna ematlhelweni hinkwawo ya tiko ra Yuda ni tiko ra Benjamini, a va veka ha un'we-un'we emitini hinkwayo ya makhokholo, a va lavela swakudya leswo tala, a va tekisa ni vasati lavo tala.