I Timotiya 2

₁Loko swi ri tano, xo sungula, ndzi navela hi matimba leswaku ku kombela, ni ku khongela, ni ku khongelela, ni ku nkhensa, swi endleriwa vanhu hinkwavo, ₂swi endleriwa ni tihosi, ni hinkwavo lava nge switshan'wini swa le henhla, leswaku hi kota ku hanya vutomi bya ku rhula ni ku tsaka, lebyi nga bya vukhongeri ni lebyi chavisekaka hi matlhelo hinkwawo. ₃Leswi i swinene, swa amukeleka emahlweni ka Xikwembu muponisi wa hina, ₄lexi navelaka leswaku vanhu hinkwavo va ponisiwa, va fika laha va kotaka ku tiva leswi swi nga ntiyiso. ₅Hikuva ku ni Xikwembu xin'we, naswona ku ni Muyimeri un'we loyi a hlanganisaka Xikwembu ni vanhu, yena Kriste Yesu munhu wa xiviri, ₆loyi a tinyiketeke ku va mukutsuri wa vanhu hinkwavo; hi byona vumbhoni bya makungu ya Xikwembu, lebyi nga humelela hi nkarhi lowu fanekelaka. ₇Kutani, hi swona leswi nga endla leswaku ndzi vekiwa ku va mutwarisi wa Rito ni muapostola (ndzi vula leswi tiyeke, a ndzi hembi), ndzi dyondzisa vamatiko ta ku pfumela ni ta ntiyiso.

₈Hikokwalaho, ndzi navela leswaku, etindhawini hinkwato, vavanuna va khongela va tlakusile mavoko lama tengeke, ku ri hava ku kariha kumbe madzolonga. ₉Hi mukhuva wolowo na vona vavasati a va ambale leswi fanekelaka, va hlova va pima, va nga ambali swo vonikela kumbe ku tibombisa hi misisi leyi horhiweke, kumbe hi vuhlalu bya nkoka, kumbe hi tinguvu to durha ngopfu; ₁₀kambe a va tibombise hi mintirho leyinene, hilaha swi fanelaka vavasati lava tivulaka va vukhongeri. ₁₁Wansati a a dyondze a miyerile, a titsongahata hi matlhelo hinkwawo. ₁₂A ndzi pfumeleri wansati ku dyondzisa kumbe ku kulela vavanuna; ú fanele ku tshama a miyerile. ₁₃Hikuva ku rhangile Adamu a vumbiwa, ku landza Evha. ₁₄Naswona, a hi Adamu loyi a kanganyisiweke, kambe i wansati la kanganyisiweke, kutani a wela eku dyoheni. ₁₅Hambiswiritano, wansati ú ta ponisiwa hileswi a velekaka vana, loko a tiyisela eku pfumeleni ne rirhandzwini ne ku tengeni, a ri na ku tikhoma.