I Samiele 26

₁Vaaki va muti wa Zifi va ya eka Sawulo eGibeya, va ku ka yena: “Hi twa leswaku Davhida ú tumberile exintshabyaneni xa Hakila lexi nga evuxeni bya Yeximoni.” ₂Hiloko Sawulo a khoma ndlela, a famba ni vavanuna va 3 000 lava hlawuriweke exikarhi ka Vaisraele, a rhelela a ya lava Davhida emananga ya Zifi. ₃A fika a gova etlhelo ka ndlela, exintshabyaneni xa Hakila lexi nga evuxeni bya Yeximoni. Davhida yena a a ha ri kwale mananga. Loko a vona leswaku Sawulo ú tile emananga ku ta n'wi lava, ₄a rhumela tinhlori, ti ya kuma ntiyiso wa lomu Sawulo a fikeleke kona. ₅Kwalaho Davhida a famba, a ya fika lomu Sawulo a goveke kona, a xiyaxiya laha Sawulo na Abinere n'wana Nere, ndhunankulu ya mavuthu, va etleleke hi kona. Sawulo a a etlerile enxaxeni wa le xikarhi, mixaxa ya masocha ya yena yi n'wi rhendzerile.

₆Davhida a vulavula na Ahimeleke wa Muhiti, na Abixayi makwavo wa Yowabu n'wana Seruya; a va vutisa a ku: “Xana i mani eka n'wina vambirhi loyi a lavaka ku rhelela na mina, hi ya eka Sawulo enxaxeni, xana?” Abixayi a hlamula a ku: “Mina ndzi ta rhelela na wena.” ₇Vusiku byebyo, Davhida na Abixayi va ya laha masocha ya Sawulo a ma govile kona, va kuma Sawulo a etlele enxaxeni wa le xikarhi, vurhongo byi khomile, tlhari ra yena ri dzimiwile etinhlokweni ta yena; Abinere ni masocha a va etlele va n'wi rhendzerile. ₈Kutani Abixayi a ku ka Davhida: “Namuntlha, HOSI Xikwembu xi nyiketile nala wa wena emavokweni ya wena. Ndzi tshike ndzi n'wi tlhava kan'we hi tlhari, ndzi n'wi katsa na misava. Ndzi nge kali ndzi n'wi tlhava kambirhi!” ₉Kambe Davhida a hlamula a ku: “U nga tshuki u n'wi vavisa, hikuva munhu loyi a khumbaka muhlawuriwa wa HOSI Xikwembu, ú ta tivangela nandzu lowukulu emahlweni ka xona.” ₁₀Davhida a engeta a ku: “Ndza hlambanya emahlweni ka HOSI Xikwembu lexi hanyaka, ndzi ri: HOSI Xikwembu, hi xona xi nga ta lovisa Sawulo: Ku nga va loko siku ra yena ra ku fa ri ta va ri fikile, kumbe a ya fela enyimpini. ₁₁Ndzi ta va ni nandzu emahlweni ka HOSI Xikwembu, loko ndzi tshambuluta voko ra mina, ndzi tlhava muhlawuriwa wa xona. A hi teke tlhari leri nga etinhlokweni ta yena na gula ra mati, hi famba!”

₁₂Kwalaho Davhida a teka tlhari leri a ri ri etinhlokweni ta Sawulo ni gula ra mati, va suka va famba. A ku vanga na un'we enxaxeni loyi a swi voneke, hambi ku ri ku swi twa, kumbe ku pfuka, hikuva HOSI Xikwembu a xi va etlerisile hi vurhongo lebyikulu.

₁₃Kutani Davhida a tsemakanya nkova, a yima kulenyana enhlohlorhini ya xintshabyana; a ku ri ni mpfhuka swinene exikarhi ka yena ni mixaxa ya Sawulo. ₁₄Kutani Davhida a huwelela mavuthu na Abinere n'wana Nere, a ku: “Xana wa ndzi twa wena Abinere xana?” Abinere a vutisa a ku: “Hi wena mani u belaka hosi ehuwa, xana?” ₁₅Davhida a hlamula Abinere a ku: “Xana a wu nhenha wena ke? Xana ú kona munhu la ringanaka na wena etikweni ra Israele xana? Ku hava! Loko swi ri tano, hikwalaho ka yini u tsandzekile ku rindza hosi n'wini wa wena, xana? Sweswi ka ha ku ta munhu un'wana wa ka n'wina loyi a a lava ku herisa vutomi bya hosi n'wini wa wena. ₁₆Maendlele ya wena lawa a ma sasekanga. Ndza tiyisa emahlweni ka HOSI Xikwembu lexi hanyaka ndzi ri: Hinkwenu mi faneriwa hi ku fa, hikuva a mi hitekelanga ku rindza n'wini wa n'wina, muhlawuriwa wa HOSI Xikwembu. Xana wa ri vona tlhari ra hosi laha ri nga kona sweswi xana? Wa ri vona na gula ra mati leri a ri ri etinhlokweni ta yena, xana?”

₁₇Kavaloko Sawulo a tiva rito ra Davhida, kutani a vutisa a ku: “Xana a hi rito ra wena Davhida n'wananga, leri ndzi ri twaka xana?” Davhida a hlamula a ku: “Ina, i ra mina, wena hosi n'wini wanga.” ₁₈Davhida a engeta a ku: “Wena n'wini wanga, hikwalaho ka yini u ndzi hlongorisa xana, mina nandza wa wena? Ndzi onhe yini xana? Xana ndzi ni nandzu muni xana? ₁₉Hikokwalaho, wena hosi n'wini wanga, ndzi kombela leswaku u yingisa marito ya mina nandza wa wena: Loko ku ri leswaku i HOSI Xikwembu lexi ku susumeteke ku lwa na mina, hiswona, ndzi ta xi humesela gandzelo ra risuna ra ku tisola. Kambe loko u kuceteriwile hi vanhu, vona va tivangela khombo emahlweni ka HOSI Xikwembu, hikuva namuntlha va ndzi hlongorile, va ndzi sivela ku titwa ndzi ri un'wana wa vaaki va tiko ra HOSI Xikwembu, va ku ka mina: ‘Famba u ya tirhela swikwembu swimbe.’ ₂₀Hikokwalaho, u nga ndzi tshiki ndzi ya dlawa etikweni ra vanhu vambe, kule ni mombo wa HOSI Xikwembu! Wena hosi ya Vaisraele, u hlomile matlhari ku ta dlaya dzedze ro fana na mina! Wa ndzi hlota, wonge hi loko ndzi ri n'hwari ya le tintshaveni!”

₂₁Kavaloko Sawulo a ku: “Ndzi hoxile! Vuya, Davhida n'wananga! A ndzi nga ha ku endli swo biha, hikuva namuntlha u vonile vutomi bya mina byi ri bya risima. Leswi ndzi swi endleke i vuphukuphuku ntsena; ndzi endlile swo huma endleleni ngopfu!” ₂₂Davhida a hlamula a ku: “Tlhari ra wena, hi leri hosi! Un'wana wa malandza ya wena a a tsemakanye a ta ri teka. ₂₃HOSI Xikwembu xi hakela munhu un'wana ni un'wana la lulameke, la tshembekeke! Namuntlha, a xi ku nyiketile emavokweni ya mina, kambe a ndzi swi lavanga ku tshambuluta voko ra mina, ndzi ku vavisa, wena muhlawuriwa wa xona. ₂₄Naswona, leswi namuntlha ndzi voneke vutomi bya wena byi ri bya ntikelo, na byona bya mina a byi ve ni ntikelo emahlweni ka HOSI Xikwembu, xi ndzi kutsula emaxangwini ya mina hinkwawo.”

₂₅Kavaloko Sawulo a hlamula Davhida a ku: “Ndzi ku navelela minkateko, wena Davhida n'wananga. U ta endla leswikulu, u humelela swinene!” Kutani Davhida a khoma ndlela ya yena a tifambela. Sawulo yena a tlhelela ekaya ka yena.