Ta ku lova ka Samiele
1Samiele a lova, kutani Vaisraele hinkwavo va hlengeletana enkosini wa yena, va n'wi lahla emutini wa yena eRhama.
Ta Davhida na Abigayele
Endzhaku ka sweswo, Davhida a suka a rhelela a ya emananga ya Parani. 2Le Mawoni, a ku ri ni wanuna un'wana loyi a a fuwile swinene; a a ri ni tinyimpfu ta 3 000 ni timbuti ta 1 000, leti a a ti hlayisa kusuhi ni muti wa Karmele; hikokwalaho hi nkarhi lowu voya bya tinyimpfu ta yena byi tsemetiwaka ha wona, a a tshama kwale Karmele. 3Vito ra wanuna loyi a va ku i Nabala, nsati wa yena a va ku i Abigayele. Wansati loyi a a ri munhu wo hatla ku twisisa, naswona a a sasekile, kasi nuna wa kona a a ri munhu wo karhata, wa mintirho yo ka yi nga tivikani. Nabala a a ri wa rixaka ra Kalebe.
4Loko Davhida a ri emananga, a twa leswaku Nabala ú le ku tsemeteni ka voya bya tinyimpfu ta yena. 5Kutani Davhida a rhuma khume ra majaha, a va lerisa a ku: “Tlhandlukelani eKarmele, mi ya eka Nabala, mi n'wi byela leswaku ndza n'wi rungula. 6Mi ta n'wi xeweta mi ku: ‘A swi ve tano ni haxawu, ku rhula ku va na wena, ni ndyangu wa wena, ni hinkwaswo leswi u nga na swona! 7Ndzi twa leswaku u le ku tsemeteni ka voya bya tinyimpfu; kutani mhaka hi leyi: Hi tshama hi hlangana ni varisi va wena, kambe a hi va karhatanga, naswona a va kalanga va yiveriwa ni nchumu eka nkarhi hinkwawo lowu hi nga va na vona eKarmele. 8U nga vutisa malandza ya wena, ma ta ku byela mhaka leyi. Kutani ke, amukela majaha ya mina hi tintswalo, hikuva hi ta ka wena hi siku ra nkhuvo. Ndzi kombela leswaku u humesa leswi u swi kotaka, u nyika majaha lawa ya mina, ma nga malandza ya wena, u nyika na mina Davhida n'wana wa wena.’ ”
9Majaha ya Davhida ma ya fika eka Nabala, ma n'wi vikela marito hinkwawo lama humaka eka Davhida, va tlhela va yimela nhlamulo. 10Kutani Nabala a va hlamula a ku: “Davhida i mani xana? I mani n'wana Yese xana? Kambe masiku lawa, a hi ku tala ka mahlonga lama balekelaka vinyi va wona! 11Xana ndzi nga teka vuswa bya mina, ni mati ya mina, ni nyama ya swifuwo leswi ndzi swi tlhaveleke vatirhi va mina, ndzi nyika vanhu lava ndzi nga tiviki ni leswaku va huma kwihi xana? E-e!” 12Kwalaho majaha ya Davhida ma tlhela, ma ya fika ma n'wi rungulela hinkwaswo leswi vuriweke hi Nabala. 13Kutani Davhida a lerisa vavanuna va yena, a ku: “Un'wana ni un'wana a a khome fumu ra yena!” Kutani va endla tano hinkwavo. Davhida na yena a khoma ra yena, kutani vavanuna va kwalomu ka 400 va huma nyimpi na Davhida, van'wana va 200 va sala ni tinhundzu.
14Un'wana wa malandza ya Nabala a ya tivisa Abigayele nkata Nabala, a ku: “Xana u swi twile leswaku Davhida a a rhumile vanhu va ta hi le mananga va ta pfuxela n'wini wa hina, xana? Kambe yena ú va rhuketerile! 15Kasi vavanuna lava va hi kombile vunene lebyikulu: A hi karhatekanga ni switsongo, naswona, eka nkarhi hinkwawo lowu hi famba-fambeke enhoveni, a hi yiveriwanga nchumu, loko ha ha ri na vona. 16Eka nkarhi hinkwawo lowu hi tshameke na vona hi ri karhi hi risa tinyimpfu, vusiku ni nhlekanhi a va hi sirhelela ku fana ni rirhangu. 17Sweswi ke, tiva mhaka leyi, u vona leswaku u nga endla yini, hikuva khombo ri ta ri kongomile n'wini wa hina Nabala ni ndyangu hinkwawo wa yena, kambe munhu loyi ú bihile, a nga lavi ku tsundzuxiwa nchumu.”
18Kavaloko Abigayele a hatla a teka swinkwa swa 200, ni vhinyo eminkwameni mimbirhi ya madzovo, ni nyama ya tinyimpfu ta ntlhanu, ni swisakana swa ntlhanu swa tindzhoho leti oxiweke, ni dzana ra swichocho swa mihandzu ya vhinya, ni swimbhundzwa swa 200 swa makuwa lama omisiweke. A rhwexa timbhongolo, 19kutani a lerisa malandza ya yena ya majaha, a ku: “Rhangani emahlweni, mina ndzi ta mi landza.” Kambe Abigayele a a fihlela nuna wa yena Nabala etimhaka leti. 20Abigayele a gada mbhongolo a famba, kutani loko a ri karhi a rhelela a siviwile hi xintshabyana, o tshuka a hlangana na Davhida ni vavanuna va yena lava a va ta va n'wi kongomile.
21Davhida a a ta a ri karhi a ku: “Hakunene ndzi lo tikarhatela mahala, loko ndzi lwela swilo hinkwaswo swa muyisa loyi, laha mananga, ku nga yiviwi nchumu eka swona hinkwaswo! Kunene, ‘Masasani ú fela nhoveni!’ 22Hikokwalaho, mina Davhida, ndza tiboha hi ku hlambanya emahlweni ka HOSI Xikwembu, ndzi ri: Mundzuku nimixo, ndzi ta herisa vavanuna hinkwavo va ka Nabala, ku nga sali na un'we wa vona!”
23Loko Abigayele a vona Davhida, a hatla a xika embhongolweni, a wa hi mombo emahlweni ka Davhida, a korhamela ehansi 24emilengeni ya yena, a ku: “Nandzu lowu, wu hlayele mina ntsena, wena n'wini wanga. Ndzi kombela ku vulavula na wena, u yingisa marito lawa mina nandza wa wena ndzi nga ta ku byela wona. 25Wena n'wini wanga, u nga tshuki u karhateka hi mhaka ya wanuna loyi wo biha, ndzi vula Nabala, hikuva hilaha vito ra yena ri vulaka hakona, i phuphula hakunene! Vuphuphula, ú lo pyì hi byona! Loko ndzi ri mina nandza wa wena, a ndzi kalanga ndzi ma vona majaha lawa u ma rhumeke, wena n'wini wanga! 26Sweswi ke, n'wini wanga, ndza tiyisa hi ku hlambanya emahlweni ka HOSI Xikwembu lexi hanyaka ni le mahlweni ka wena, ndzi ri: Hi xona Xikwembu lexi ku siveleke ku tirihisela hi wexe ni ku halata ngati ya vanhu. Valala va wena ni lava ringetaka ku ku endla swo biha, a va fane na Nabala, wena n'wini wanga. 27Nyikonyana leyi mina nandza wa wena ndzi ku tiselaka yona, wena n'wini wanga, hi leyi, u ta phamela majaha lawa u famba-fambaka na wona hinkwako, we n'wini wanga. 28Ndzi kombela leswaku u ndzi rivalela nandzu lowu mina nandza wa wena ndzi wu endleke. Ndzi vula tano, hikuva HOSI Xikwembu xi ta ku nyika rixaka leri tiyeke hakunene, wena n'wini wanga, naswona tinyimpi leti u ti lwaka, wena n'wini wanga, i tinyimpi ta HOSI Xikwembu. Kutani u nga ka u nga humeleriwi hi leswo biha, masiku hinkwawo ya ku hanya ka wena. 29Loko vanhu va tshuka va ku pfukela, wena n'wini wanga, ni loko va ku hlongorisa va ringeta ku ku dlaya, vutomi bya wena byi ta katsiwa ni bya lava hanyaka, byi hlayisiwa hi HOSI Xikwembu xa wena. Kasi vutomi bya valala va wena, byi ta ndzulutiwa byi hoxiwa ekule, tanihi ribye ra xipelupelu. 30Loko HOSI Xikwembu xi ta va xi endlile hinkwaswo leswinene leswi xi swi vuleke ehenhla ka wena n'wini wanga, ni loko xi ta va xi ku vekile mufambisi wa Vaisraele, 31a wu nga khunguvanyeki wena n'wini wanga, naswona u nga ka u nga kanakani embilwini ya wena, hikuva u ta va u chavile ku halata ngati mahala ni ku tirihisela hi wexe, wena n'wini wanga. Kutani loko HOSI Xikwembu xi ta va xi ku endlele leswinene, wena n'wini wanga, u nga tshuki u ndzi rivala mina nandza wa wena.”
32Davhida a hlamula Abigayele a ku: “A ku nkhensiwe HOSI Xikwembu xa Israele, lexi xi ku rhumeke namuntlha ku ta ndzi hlanganisa. 33A xi nkhensiwe hikwalaho ka vuxiyaxiyi bya wena; na wena, ndza ku nkhensa, hikuva namuntlha u ndzi siverile ku halata ngati ni ku tirihisela hi ndzexe. 34Ndza tiyisa hakunene emahlweni ka HOSI Xikwembu xa Israele lexi hanyaka, lexi xi ndzi siveleke ku ku vavisa, ndzi ri: Loko a wu nga hatlisanga u ndzi hlanganisa, mundzuku nimixo vavanuna va ka Nabala a va ta herisiwa hinkwavo, ku nga sali ni un'we wa vona.” 35Kavaloko Davhida a amukela leswi Abigayele a nga n'wi tisela swona, kutani a ku ka yena: “Tlhandlukela ekaya ka wena hi ku rhula; waswivo, ndzi amukerile xikombelo xa wena, ndzi ku tsetselela.”
36Abigayele a muka, a kuma Nabala a ri eku dyeni ka nkhuvo lowukulu emutini wa yena; nkhuvo wa kona a wu fana ni wa tihosi. Nabala a a titsakerile swinene, hikuva a a pyopyiwile ngopfu. Hikokwalaho, Abigayele a nga kalanga a bula na yena kumbe ku n'wi byela xa nchumu ku kondza ri xa. 37Nimpundzu wa kona, loko Nabala a xalamukile, Abigayele nsati wa yena a n'wi rungulela timhaka hinkwato; kutani Nabala a wa a titivala, a oma ni swirho. 38Endzhaku ka masiku yo lava ku ringana khume, HOSI Xikwembu xi tlhela xi ba Nabala nakambe, kutani a fa.
39Loko Davhida a twa leswaku Nabala ú lovile, a ku: “A ku nkhensiwe HOSI Xikwembu lexi yimeke na mina, emhakeni ya ku rhuketeriwa ka mina hi Nabala. HOSI Xikwembu xi ndzi siverile ku endla leswo biha, mina nandza wa xona, xi bile Nabala hi xoxe hikwalaho ka mintirho ya yena leyo biha.” Kutani Davhida a rhuma vanhu va ya gangisa Abigayele, leswaku a va nsati wa yena. 40Loko varhumiwa va Davhida va fika eka Abigayele eKarmele, va n'wi vulavurisa va ku: “Davhida ú hi rhumile eka wena, leswaku hi ta ku teka, u ta ya va nsati wa yena.” 41Abigayele a suka a yima, kutani a korhama mombo wa yena wu ko wu khumba ehansi, a ku: “Hiswona, ndzi nandza wa Davhida, ndzi tiyimisele ni ku mi hlambisa milenge, n'wina malandza ya yena.” 42Kutani a hatla a longa, a gada mbhongolo ya yena, kutani a famba ni varhumiwa va Davhida a ri karhi a heleketiwa hi tinxangwana ta yena ta ntlhanu, a ya va nsati wa Davhida.
43Davhida a a tekile na Ahinowama wa le Yizriele, kutani yena na Abigayele va va vasati va Davhida. 44Loko a ri Mikala nkata Davhida, tata wa yena Sawulo a a n'wi nyikile Palati n'wana Layixi wa le Galimi.
