I Samiele 23

₁Siku rin'wana Davhida a byeriwa leswaku Vafilista va le ku hlaseleni ka muti wa Keyila, va phangha ni swa le swivuyeni. ₂Hiloko Davhida a ya vutisa mhaka eka HOSI Xikwembu, a ku: “Xana ndzi nga ya ndzi ya hlasela Vafilista lava xana?” Kutani HOSI Xikwembu xi hlamula Davhida xi ku: “Ina, yana u ya va hlasela leswaku u ta lamulela muti wa Keyila.” ₃Kambe masocha ya Davhida ma ku ka yena: “Wa swi vona leswaku, hambi ku ri kwala tikweni ra Yuda, ho tshama hi ri eku chaveni; xana a hi nga tivangeli swo tlula leswi, loko hi ya lwa ni mavuthu ya Vafilista le Keyila, xana?” ₄Kutani Davhida a engeta a ya vutisa mhaka leyi eka HOSI Xikwembu, xona xi n'wi hlamula xi ku: “Rhelela, u ya eKeyila, hikuva ndzi ta nyiketa Vafilista emavokweni ya wena.” ₅Kutani Davhida ni masocha ya yena va ya emutini wa Keyila va ya lwa ni Vafilista. Kutani va ba Vafilista va va hlula ngopfu, va khayima tihomu ta vona va vuya na tona. Hi ndlela leyi, Davhida a va a lamulerile vaaki va muti wa Keyila.

₆Loko Abiyatara n'wana Ahimeleke a baleka ku ya hlangana na Davhida eKeyila, a a rhelerile a khomile nkwama wa vuhlolotwana lowu vuriwaka “efodi”.

₇Sawulo a twa leswaku Davhida ú yile eKeyila, kutani a ku: “Xikwembu xi nyiketile Davhida emavokweni ya mina, hikuva ú tipfalerile hi yexe hi ku ya nghena emutini lowu nga ni tinyangwa ni timbanti leti gogiwaka.” ₈Kavaloko Sawulo a rhamba vanhu va yena hinkwavo leswaku va hloma nyimpi, va rhelela va ya sivelela Davhida ni masocha ya yena eKeyila. ₉Davhida a a swi tiva leswaku Sawulo ú le ku lukeni ka mano layo biha yo lwa na yena, kutani a byela muprista Abiyatara a ku: “Tisa nkwama wa ‘efodi’ haleno.” ₁₀Kutani Davhida a khongela a ku: “We HOSI Xikwembu xa Israele, mina nandza wa wena ndzi twile leswaku hakunene Sawulo ú ni makungu yo ta herisa muti lowu wa Keyila hikwalaho ka mina. ₁₁Xana vaaki va Keyila va ta ndzi nyiketa emavokweni ya yena xana? Xana Sawulo ú ta rhelela a ta, hilaha mina nandza wa wena ndzi swi tweke hakona, xana? We HOSI Xikwembu xa Israele, mina nandza wa wena ndzi kombela leswaku u ndzi byela leswi nga swona.” HOSI Xikwembu xi hlamula xi ku: “Hakunene, Sawulo ú ta rhelela a ta.” ₁₂Davhida a vutisa nakambe a ku: “Xana vaaki va muti wa Keyila va ta ndzi nyiketa emavokweni ya Sawulo, swin'we ni masocha ya mina, xana?” HOSI Xikwembu xi hlamula xi ku: “Va ta mi nyiketa.” ₁₃Hiloko Davhida ni masocha ya yena ya kwalomu ka 600 va suka emutini wa Keyila hi ku hatlisa, va rhendzeleka-rhendzeleka na tiko. Loko mahungu ya leswaku Davhida ú balekile eKeyila ma fika etindleveni ta Sawulo, a tshika makungu ya yena yo ya n'wi lava le Keyila.

₁₄Davhida ú yile a ya tumbela emakocokocweni, emagangeni ya mananga ya le Zifi, a tshama kona. Masiku hinkwawo, Sawulo a a famba a lava Davhida, kambe Xikwembu a xi n'wi nyiketanga emavokweni ya yena. ₁₅Davhida a a swi vona leswaku Sawulo ú humile ku ta n'wi lava leswaku a ta n'wi dlaya. Hi nkarhi lowu, Davhida a a tshama eHorexe, emananga ya le Zifi.

₁₆Yonatani n'wana Sawulo a suka a ya eka Davhida le Horexe, a ya n'wi khongotela leswaku a tiyisela a tshemba Xikwembu. ₁₇Yonatani a ku ka Davhida: “U nga chavi; tata wa mina Sawulo a nga ka a nga ku khumbi. Wena u ta va hosi ya Israele, mina ndzi va xandla xa wena. Mhaka leyi, hambi a ri tata wa mina Sawulo wa yi tiva.” ₁₈Kutani, hi vumbirhi bya vona, va tiyisa xinakulobye xa vona emahlweni ka HOSI Xikwembu. Kutani Davhida a sala eHorexe, Yonatani yena a tlhelela ekaya.

₁₉Vaaki va muti wa Zifi va tlhandlukela eka Sawulo eGibeya, va fika va ku ka yena: “Hi twa leswaku Davhida ú tumberile emakocokocweni ya le Horexe exifundzheni xa ka hina, exintshabyanini xa Hakila lexi nga edzongeni ra Yeximoni. ₂₀Sweswi we hosi, leswi u hisekelaka ku n'wi khoma, rhelela u ta eka hina; kutani hina hi ta n'wi nyiketa emavokweni ya wena hosi.” ₂₁Sawulo a ku ka vona: “HOSI Xikwembu a xi mi katekise, hikuva mi ndzi twele ku vava, hi leswi swi ndzi humelelaka. ₂₂Fambani mi ya vutisisa swinene, mi kuma ntiyiso, ni ku vona laha a toloveleke ku fambela kona, ni leswaku ú voniwile hi mani kona; hikuva va ndzi byela leswaku Davhida loyi, a hi ku tlhariha ka yena! ₂₃Langutisisani, mi fungha tindhawu hinkwato leti a tumbelaka eka tona, mi vuya eka mina ni ntiyiso lowu heleleke. Kutani mina ndzi ta famba na n'wina; loko a ha ri kona kwala tikweni, ndzi ta n'wi lava ndzi ko ndzi n'wi kuma, hambileswi vanhu va Yuda va nga magidi-gidi.” ₂₄Kutani va suka va tlhelela eZifi, va rhangela Sawulo.

Davhida ni vanhu va yena a va ri emananga ya Mawoni, enkoveni lowu nga edzongeni ra Yeximoni. ₂₅Kutani Sawulo ni masocha ya yena va suka va ya n'wi lava, kambe vanhu van'wana va ya tivisa Davhida, kutani a rhelela a kongoma laha ku nga ni xintshabyana xa maribye, emananga ya Mawoni. Loko Sawulo a twa mhaka leyi, a ya kwale mananga ya Mawoni, a ya n'wi hlota. ₂₆Sawulo a a famba hi tlhelo rin'wana ra xintshabyana, Davhida ni vanhu va yena a va famba hi tlhelo lerin'wana. Davhida a a ringeta ku hatlisa swinene, leswaku a siya Sawulo. Kambe loko Sawulo ni vanhu va yena va ri kusuhi ni ku rhendzela Davhida ni vanhu va yena leswaku va ta va khoma, ₂₇ku humelela murhumiwa, a fika ka Sawulo a ku: “Hatlisa u vuya, hikuva Vafilista va nghenile etikweni.” ₂₈Hikokwalaho, Sawulo a tshika ku hlongorisa Davhida, a ya lwa ni Vafilista. Leswi hi swona swi nga endla leswaku ndhawu yoleyo yi vuriwa “Ribye-ra-Mahambano”. ₂₉Kutani Davhida a hundzela emahlweni, a ya tshama emakocokocweni ya Eni-Gedi.