I Samiele 13

₁Sawulo a a ri ni malembe ya 30 loko a sungula ku fuma, kutani a fuma malembe mambirhi etikweni ra Israele. ₂Sawulo a hlawula vavanuna va 3 000 exikarhi ka Vaisraele, vavanuna va 2 000 va va na yena emutini wa Mikamaxa ni le magangeni ya Betele, kutani va 1 000 va va na Yonatani emutini wa Gibeya wa Benjamini. Sawulo a tlherisa vanhu lava saleke, un'wana ni un'wana a ya ekaya ka yena. ₃Yonatani a hlasela vuthu ra Vafilista leri a ri govile emutini wa Geba, a ri hlula, kutani Vafilista va twa mhaka leyi. Hiloko Sawulo a ba mhalamhala etikweni hinkwaro ra Israele, ku endlela leswaku na vona Vaheveru va ta twa mhaka ya kona. ₄Hikokwalaho, Vaisraele hinkwavo va kuma marungula ya leswaku Sawulo ú hlaserile vuthu ra Vafilista a ri hlula, ni leswaku ku hlula loku ku pfuxile rivengo lerikulu exikarhi ka vona na Vafilista. Kutani tiko hinkwaro ri byeriwa ku ya emutini wa Giligala ri ya seketela Sawulo.

₅Kutani Vafilista va hlengeletana ku ya lwa ni Vaisraele. A va ri ni makalichi ya 3 000, ni vagadi va tihanci va 6 000, ni masocha layo tala kukota sava eribuweni ra lwandle. Kutani va hloma matlhari va ya gova eMikamaxa, hi tlhelo ra vuxa bya Beta-Avene. ₆Vavanuna va Israele va swi vona leswaku va le khombyeni, hikuva mavuthu ya vona a ma siveleriwile hi valala, kutani vaaki va tiko va ya tumbela emabakweni, ni le makheleni, ni le makocokocweni, ni le migodini, ni le swihlobyeni. ₇Van'wana va vona va pela Yordani va chavela etikweni ra Gadi ni ra Giliyadi. Loko a ri Sawulo yena a a ha ri eGiligala, kutani vanhu hinkwavo lava a va ri na yena, va rhurhumela hi ku chava.

₈Sawulo a yimela Samiele masiku ya 7 le Giligala, hikuva a va twananise sweswo, kambe loko Samiele a nga vonaki, vanhu va sungula ku hangalaka va tshika Sawulo. ₉Kavaloko Sawulo a lerisa vanhu a ku: “Ndzi tiseleni swifuwo swa gandzelo leri hisiwaka ni swa magandzelo ya xinakulobye!” Kutani Sawulo hi byakwe a humesa gandzelo leri hisiwaka. ₁₀Loko a ha ku heta ku hisa gandzelo rero, Samiele o ta ku, húmélèlò! Kutani Sawulo a huma a ya n'wi hlanganisa, a n'wi xeweta. ₁₁Samiele a n'wi vutisa a ku: “U endle yini xana?” Sawulo a hlamula a ku: “Ndzi vonile leswaku vanhu a va sungula ku hangalaka va ndzi tshika, ni leswaku wena a wu fikanga hi siku leri hi twananeke rona, kasi Vafilista a va hlengeletanile le Mikamaxa. ₁₂Hikokwalaho, ndzi anakanyile leswaku Vafilista va ta rhelela ku ta lwa na mina haleno Giligala, ndzi nga si kombela HOSI Xikwembu ku hi katekisa, kutani ndzi kanya mbilu ndzi humesa gandzelo leri hisiwaka leri.” ₁₃Kavaloko Samiele a ku ka Sawulo: “Phuphula ndziwena! A wu hlayisanga leswi HOSI Xikwembu xa wena xi ku leriseke swona. Loko onge u swi hlayisile, HOSI Xikwembu a xi ta tiyisa vuhosi bya wena ehenhla ka Vaisraele hilaha ku nga heriki. ₁₄Kambe sweswi vuhosi bya wena a byi nga ha yi emahlweni. HOSI Xikwembu xi tihlawulele munhu loyi xi n'wi tsakelaka, kutani xi n'wi vekile ku va mufambisi wa tiko ra xona, hikuva wena a wu hlayisanga leswi Xikwembu xi ku leriseke swona.” ₁₅Kavaloko Samiele a suka eGiligala a famba. Vanhu lavan'wana va landza Sawulo loko a ya kumana ni masocha ya yena. Va suka eGiligala, va tlhandluka va ya eGibeya wa Benjamini.

Sawulo a hlaya vavanuna lava a va sele na yena, a kuma leswaku a va ri kwalomu ka 600. ₁₆Kutani yena ni n'wana wa yena Yonatani, ni vavanuna lava a va sele na vona, va ya gova emutini wa Geba wa Benjamini. Kasi Vafilista a va dzimile mixaxa ya vona eMikamaxa. ₁₇Kutani Vafilista va humesa mintlawa minharhu ya masocha leswaku yi ya hlasela Vaisraele. Ntlawa wo sungula wu kongoma emutini wa Ofira etikweni ra Xuwala. ₁₈Ntlawa wa vumbirhi wu kongoma emutini wa Beta-Horoni; kutani ntlawa lowo hetelela wu kongoma emagangeni lama langutanaka ni Nkova wa Seboyimi (hileswaku: Nkova wa Timhisi), hi tlhelo ra mananga.

₁₉Enkarhini wolowo, vanhu lava tivaka ku fula tinsimbhi a va nga ha kumeki etikweni hinkwaro ra Israele, hikuva Vafilista a va vekile nawu wa leswaku Vaheveru va nga tshuki va tifulela mafumu kumbe matlhari. ₂₀Hikowalaho Vaisraele hinkwavo, loko va lava ku loteriwa swikomu, kumbe swihloka leswikulu ni leswitsongo, kumbe tihwevo, a va rhelela va ya loteriwa hi Vafilista. ₂₁A va humesa tindhivilichi timbirhi leti a ti vuriwa “pimi”, leswaku va loteriwa swikomu ni swihloka leswikulu, kasi a va humesa ndhivilichi yin'we ntsena ku loteriwa swihloka leswitsongo ni ku tontswiseriwa tinhonga ta vona to khayima swifuwo. ₂₂Hikokwalaho, loko nyimpi yi tshuka yi humelela, masocha ya Sawulo na Yonatani a ma nga ri na mafumu kumbe matlhari. A swo va na Sawulo na n'wana wa yena Yonatani ntsena.

₂₃Vafilista va rhumela ntlawa wa masocha wu ya rindza xiphandze xa le kusuhi na Mikamaxa.