I Tihosi 6

₁Endzhaku ka malembe ya 480 loko Vaisraele va humile etikweni ra Egipta, Solomoni a sungula ku aka yindlu ya HOSI Xikwembu. A ri ri lembe ra vumune ra ku fuma ka yena etikweni ra Vaisraele, hi n'hweti ya Zifi yi nga ya vumbirhi elembeni ra Xiyuda. ₂Yindlu ya Tempele leyi hosi Solomoni a yi akeleke HOSI Xikwembu, a yi lehile 30 m, yi anamile 10 m, ku ya henhla yi ri 15 m. ₃Rikupakupa ra le mahlweni ka xivandla lexo Hlawuleka xa Tempele a ri lehile 10 m, ri ringana ni ku anama ka Tempele, kutani a ri humile 5 m emahlweni ka Tempele. ₄Ekhumbini ra Tempele, Solomoni a boxa mafasitere lama anameke hi le ndzeni ku tlula ehandle ka wona. ₅Kutani a yimisa muako wa swithezi lowu khomanaka ni khumbi ra Tempele, wu rhendzela khumbi ra le handle ka xivandla lexo hlawuleka ni ra xivandla lexo hlawuleka xa le mpfungwe, a aka eka wona makamari yo rhendzela Tempele. ₆Makamari ya xithezi xa le hansi a ma anamile 2,50 m, ya le xikarhi 3 m, ni ya le henhla 3,50 m. Mhaka hileswaku makhumbi ya le handle ya Tempele a ma endliwile ma ri ni tinhla leti humelaka ehandle, leswaku timhandze leti rhwalaka swithezi ti seketela kunene etinhleni, ti nga ngheni ekhumbini ra Tempele.

₇Eku akeni ka Tempele, a ku tirhisiwa maribye lama taka ma vatliwile lomu ma ceriwaka kona. A va endlela leswaku ku nga twali mpfumawulo wa tinyundzu kumbe wa swivatla-maribye, kumbe wa xitirho xihi ni xihi xa nsimbhi, loko Tempele yi ri karhi yi akiwa.

₈Nyangwa yo nghena emakamarini ya xithezi xa le xikarhi a yi ri hi le tlhelo ra dzonga ra Tempele, kutani a ku ri ni swikhandziyo swo rhendzeleka swo khandziyela emakamarini ya xithezi xa le xikarhi ni xa le henhla. ₉Solomoni a akisa sweswo makhumbi ya Tempele a ma heta. Kutani a pfala lwangu ra yona hi le ndzeni hi timhandze ni mapulangi ya murhi wa kedari, swi endla mikhandlunyana. ₁₀A yimisa vuako bya swithezi lebyi rhendzelaka yindlu hinkwayo ya Tempele. Xithezi xin'wana ni xin'wana a xi lehile 2,50 m ku ya ehenhla, xi khomanisiwile ni yindlu hi timhandze ta murhi wa kedari.

₁₁Kutani rito ra HOSI Xikwembu ri ta eka Solomoni ri ku: ₁₂“Emhakeni ya yindlu leyi u yi akaka, tiva leswaku loko u hanya hi swiletelo swa mina, ni loko u yingisa swileriso swa mina, ni loko u hlayisa milawu ya mina hinkwayo emahanyelweni ya wena, ndzi ta hetisa leswi ndzi swi tshembiseke Davhida tata wa wena, hi tlhelo ra wena. ₁₃Ndzi ta tshama exikarhi ka Vaisraele, ndzi nga ka ndzi nga fularheli tiko ra mina ra Israele.”

₁₄Solomoni a akisa sweswo makhumbi ya Tempele a ma heta. ₁₅Kutani a pfala makhumbi lawa hi le ndzeni hi mapulangi ya murhi wa kedari, ku sukela ehansi ku ya fika etimhandzeni ta lwangu; ehansi a andlala mapulangi ya murhi wa kipresi. ₁₆Makhumbi ya xivandla xa le ndzeni ka Tempele, Solomoni a ma pfala hi mapulangi ya murhi wa kedari, ku ringana 10 m ku sukela ehansi ku ya fika etimhandzeni ta lwangu. Kona ndzeni, a lunghisa xivandla lexo hlawuleka xa le mpfungwe, xi nga lexo hlawuleka ngopfu. ₁₇Xivandla lexo hlawuleka lexi rhangelaka xa le mpfungwe, a xi lehile 20 m ku ya endzeni. ₁₈Emapulangwini ya kedari endzeni ka Tempele, a ku vatliwile swifaniso swa marhanga ni swa swiluva leswi balekeke; hinkwako endzeni a ko va murhi wa kedari ntsena, ku nga vonaki ni ribye ni rin'we. ₁₉Xivandla lexo hlawuleka xa le mpfungwe, endzeni swinene ka Tempele, Solomoni a xi lunghisela ku veka Areka ya Ntwanano wa HOSI Xikwembu eka xona. ₂₀Xivandla lexi xo hlawuleka xa le mpfungwe a xi lehile 10 m ku ya endzeni, xi anamile 10 m, ni ku ya ehenhla a xi ri 10 m. Solomoni a xi nameka nsuku lowo tenga, na yona alitari ya kedari a yi nameka nsuku. ₂₁A nameka nsuku lowo tenga ekhumbini ra Tempele hi le ndzeni, kutani a hingakanyisa tinketani ta nsuku emahlweni ka xivandla lexo hlawuleka xa le mpfungwe, [a xi nameka nsuku]. ₂₂A nameka nsuku eTempeleni hinkwayo ku kondza yi helela. Na yona alitari leyi a yi ri exivandleni lexo hlawuleka xa le mpfungwe, a yi nameka nsuku hinkwayo.

₂₃Solomoni a vatla tikerubu timbirhi ta murhi wa mitlhwari, a ti veka exivandleni lexo hlawuleka xa le mpfungwe; yin'wana ni yin'wana a yi ri 5 m ku ya ehenhla. ₂₄Ripapa rin'we ra kerubu leyo sungula a ri lehile 2,50 m, na lerin'wana a ri ri ni mpimo wolowo. Ku sukela emakumu ya ripapa rin'we ra kerubu ku ya fika emakumu ya ripapa lerin'wana, a swi endla 5 m. ₂₅Mpimo wa timpapa ta kerubu leya vumbirhi na wona a wu ri 5 m. Hi vumbirhi bya tona tikerubu leti a ti ri ni mpimo wun'we ni xivumbeko xin'we. ₂₆Kerubu yin'we a yi ri 5 m ku ya ehenhla, na yona leyin'wana a yi ri tano. ₂₇Solomoni a veka tikerubu exivandleni xa le ndzeni ka Tempele. Timpapa ta tona a ti pfulekile: Ripapa ra kerubu yin'we a ri khumbana na khumbi ra tlhelo rin'we, kutani ripapa ra kerubu leyin'wana a ri khumbana na khumbi ra tlhelo lerin'wana. Letin'wana timpapa a ti hlangana exikarhi ka xivandla xa le ndzeni ka Tempele. ₂₈Kutani tikerubu leti, Solomoni a ti nameka nsuku.

₂₉Emakhumbini hinkwawo ya swivandla swimbirhi leswo hlawuleka swa Tempele, Solomoni a vatla swifaniso swa tikerubu, a fanisa ni mirhi ya mincindzu ni swiluva leswi balekeke. ₃₀Naswona, swivandla leswimbirhi leswi swa Tempele, Solomoni a swi nameka nsuku ehansi.

₃₁Enyangweni ya xivandla lexo hlawuleka xa le mpfungwe, Solomoni a nghenisa timbanti leti vatliweke hi murhi wa mitlhwari. Rimba ra le henhla ni marimba ya le matlhelo a ma vatliwile ma ri ni tinhla ta ntlhanu. ₃₂A khavisa timbanti letimbirhi ta murhi wa mitlhwari hi swifaniso swo vatliwa swa tikerubu ni swa mincindzu, ni swa swiluva leswi balekeke, a swi nameka nsuku, a engeta a vekela nsuku lowo vevuka wonge xincekana eka tikerubu ni le mirhini ya mincindzu.

₃₃Solomoni a endlisa sweswo ni le nyangweni ya xivandla lexo hlawuleka: A nghenisa marimba ya murhi wa mitlhwari, ya tinhla ta mune. ₃₄Nyangwa leyi a yi ri ni timbanti timbirhi ta murhi wa kipresi; rivanti rin'wana ni rin'wana a ri ri ni swiphemu swimbirhi, ri kota ku petseriwa etlhelo hi le xikarhi. ₃₅Etimbantini leti, a vatla swifaniso swa tikerubu ni swa mincindzu ni swa swiluva leswi balekeke, a swi nameka nsuku wo vevuka wonge xincekana, wu nghena hinkwako lomu ku kovotliweke. ₃₆A biyela xivava xa le ndzeni ka Tempele hi tinxaxa tinharhu ta maribye lama vatliweke, a tlhandleka mintsandza ya murhi wa kedari.

₃₇Masungulo ya yindlu ya HOSI Xikwembu ma vekiwile hi lembe ra vumune ra ku fuma ka Solomoni, hi n'hweti ya Zifi. ₃₈Kutani hi lembe ra vu-11 ra ku fuma loku, hi n'hweti ya Bulu, yi nga ya vu-8 elembeni ra Xiyuda, Tempele yi hela hi matlhelo hinkwawo, hilaha makungu hinkwawo ya yona ma endliweke hakona eku sunguleni. Solomoni ú hetile malembe ya 7 a ri karhi a yi aka.