I Tihosi 3

₁Solomoni a endla vuxaka na Faro hosi ya le Egipta, a teka N'wa-Faro, a n'wi hlomisela emutini wa Davhida, ku kondza a heta ku tiakela yindlu ya yena ni ku aka yindlu ya HOSI Xikwembu, swin'we ni rirhangu ro biyelela Yerusalema. ₂Enkarhini wolowo HOSI Xikwembu a xi nga si akeriwa yindlu ya xona, hikokwalaho vanhu a va tolovele ku humesa magandzelo eswitsungeni leswo hlawuleka.

₃Solomoni a a rhandza HOSI Xikwembu, a hanya hi ku yingisa swiletelo swa tata wa yena Davhida. Hi tlhelo rin'wana, Solomoni a a tolovele ku humesa magandzelo ni ku hisa mirhi ya risuna eswitsungeni leswo hlawuleka. ₄Siku rin'wana hosi Solomoni a ya eGibiyoni ku ya humesa kona magandzelo, hikuva xitsunga lexi xo hlawuleka a xi tlula swin'wana hi ntikelo. (Solomoni ú humesile eka xona magandzelo yo hisiwa ya madzana-dzana.) ₅Kutani le Gibiyoni, HOSI Xikwembu xi tikomba eka Solomoni hi norho nivusiku. Xikwembu xi ku ka yena: “Kombela lexi u xi lavaka, kutani ndzi ta ku nyika xona!” ₆Solomoni a hlamula a ku: “U kombisile rirhandzu lerikulu eka tata wa mina Davhida nandza wa wena, hikuva tatana ú hanyile emahlweni ka wena hi ndlela yo tshembeka ni yo lulama, ni mbilu yo tenga. Kutani rirhandzu lerikulu leri, a ri welanga ehansi leswi u n'wi nyikeke n'wana, a nga mina loyi namuntlha ndzi tekaka vuhosi bya tatana. ₇Kutani we HOSI Xikwembu xanga, u vekile mina nandza wa wena ku va hosi exitshan'wini xa tatana Davhida. Kambe ndza ha ri lontsongo ngopfu, mafambisele ya tiko a ndzi ma tivi. ₈Mina nandza wa wena, ndzi le xikarhi ka tiko ra wena leri u ri hlawuleke; ntsengo wa rona i ntsandza-vahlayi, hikuva va tele ngopfu. ₉Hikokwalaho, mina nandza wa wena, ndzi kombela vutlhari ni ku twisisa, ndzi ta kota ku fambisa tiko leri ra wena hi ku hlawula leswinene eka leswo biha, hikuva tiko leri ra wena ra tika, ri nga fambisiwa hi mani xana?”

₁₀Xikombelo lexi xa Solomoni xi tsakisa ngopfu HOSI Xikwembu. ₁₁Kutani xi ku ka yena: “Leswi u tikombeleleke vutlhari ni ku twisisa leswaku u ta kota ku hlawula leswinene, ni leswi u nga tikombelelangiki ku hanya masiku yo tala, kumbe ku fuwa ngopfu, kumbe ku vona ku fa ka valala va wena, ₁₂yingisa: Ndzi ta endla leswi u swi kombelaka. Ndzi ta ku nyika vutlhari ni ku twisisa, leswaku u ta kota ku hlawula, u tlula hi vutlhari vanhu hinkwavo lava hanyeke u nga si va kona, ni lava nga ta velekiwa endzhaku ka wena. ₁₃Tlhandlakambirhi, na leswi u nga swi kombelangiki, ku fana ni ku fuwa ngopfu, kumbe ku xiximiwa ngopfu, ndzi ta ku nyika swona. Hikokwalaho, a ku nga vi na hosi yin'wana leyi nga ta fana na wena, evutomini bya wena hinkwabyo. ₁₄Kutani loko u famba hi tindlela ta mina, u ri karhi u hlayisa swiletelo swa mina ni milawu ya mina ku fana ni tata wa wena Davhida, ndzi ta engetela masiku ya ku hanya ka wena.”

₁₅Kavaloko Solomoni a phaphama, a vona leswaku a ku ri ku lorha. Kutani a tlhelela eYerusalema, a fika a yima emahlweni ka Areka ya Ntwanano wa HOSI, a tlangela hi ku humesa magandzelo ya xinakulobye yo hisiwa ni lawa ya dyiwaka, a endlela malandza ya yena hinkwawo enkhuvo.

₁₆Siku rin'wana, tinghwavava timbirhi ti ta entsindza, ti fika ti yima emahlweni ka hosi. ₁₇Yin'wana ya tona yi mangala yi ku: “Wena n'wini wanga, wansati loyi, ndzi tshama na yena endlwini yin'we. A hi ri kun'we endlwini siku ndzi velekeke n'wana. ₁₈Loko ku hundzile masiku manharhu endzhaku ka loko ndzi tintshunxile, na yena wansati loyi a veleka n'wana. A hi tshama hi ri hexe; a ku nga ri na munhu un'wana endlwini, ehandle ka hina vambirhi. ₁₉Nivusiku, xihlangi xa mufana xa wansati loyi xi fa, hikuva a a etlele hi xona. ₂₀Hiloko a pfuka exikarhi ka vusiku, a susa xihlangi xa mina xa mufana etsheveni ra mina, loko mina nandza wa wena ndza ha yile hi vurhongo, kutani a xi veka exifuveni xa yena, a teka xa yena lexi feke a xi lata exifuveni xa mina. ₂₁Hi vurhonga loko ndzi xalamuka ku mamisa n'wana wa mina, ndzi kuma leswaku ú file. Kambe loko ri xile, ndzi n'wi xiyisisa, ndzi kuma leswaku a xi nga ri xona xihlangi xa mina lexi ndzi xi velekeke.” ₂₂“E-e, a hi swona!” ku nghenelela wansati loyi un'wana, “xihlangi lexi hanyaka i xa mina, lexi feke i xa wena.” “Hayi! Xa wena hi lexi feke, xa mina hi lexi hanyaka”, ku hlamula wansati lowo sungula. Va kanetana hi ndlela yoleyo emahlweni ka hosi.

₂₃Hosi yi ehleketa, yi ku: “Wansati lowo sungula ú ri, xihlangi lexi hanyaka i xa yena, lexi xi feke i xa lowa vumbirhi. Kasi wansati lowa vumbirhi ú ri, e-e, lexi xi feke i xa lowo sungula, lexi hanyaka i xa yena.” ₂₄Hiloko hosi yi lerisa yi ku: “Ndzi tiseleni banga”, kutani banga ri tisiwa eka hosi. ₂₅“Pandzani xihlangi lexi hanyaka hi le xikarhi”, ku vula hosi, “mi nyika rihlanguti rin'we eka wansati lowo sungula, ni lerin'wana eka lowa vumbirhi.” ₂₆Mbilu ya mana wa xihlangi lexi hanyaka yi tlhavekela n'wana loyi wa yena; hiloko a ku ka hosi: “Yo, N'wini wanga! N'wi nyike xihlangi lexi hanyaka lexi. Va nga tshuki va xi dlaya.” Lowa vumbirhi a engeta ku nghenelela, a ku: “Xi nge vi xa wena, xi nge vi xa mina. Xi pandzeni!” ₂₇Hiloko hosi yi avanyisa mhaka yi ku: “Nyikani xihlangi lexi hanyaka eka wansati lowo sungula, mi nga tshuki mi xi dlaya, hikuva wansati loyi hi yena mana wa xona.” ₂₈Vanhu hinkwavo va Israele va twa hilaha hosi yi avanyiseke mhaka leyi hakona, kutani va chava Solomoni, hikuva a va swi vona leswaku ú ni vutlhari bya Xikwembu eku avanyiseni ka timhaka.