I Yohane 5

₁Un'wana ni un'wana loyi a pfumelaka leswaku Yesu hi yena Mesiya, ú tswariwile hi Xikwembu, kutani un'wana ni un'wana loyi a rhandzaka mutswari, ú rhandza ni mutswariwa wa kona. ₂Ndlela leyi hi tivaka ha yona leswaku hi rhandza vana va Xikwembu, hi loko hi rhandza Xikwembu ni ku yingisa milawu ya xona. ₃Hikuva ku rhandza Xikwembu, swi vula ku hlayisa milawu ya xona, naswona milawu leyi ya xona a yi tiki. ₄Xin'wana ni xin'wana lexi tswariweke hi Xikwembu, xi hlula misava, kutani ku hlula loku hlulaka misava i ku pfumela ka hina. ₅I mani loyi a hlulaka misava xana? Hi yena loyi a pfumelaka leswaku Yesu Kriste i N'wana wa Xikwembu!

₆Yesu Kriste hi yena loyi a teke eka hina hi mati ya nkhuvulo wa yena, ni ngati ya ku dlawa ka yena; ku nga ri hi mati ntsena, kambe hi mati ni ngati. Kutani Moya i mbhoni ya swona, hikuva Moya i ntiyiso. ₇Ku ni timbhoni tinharhu: ₈Moya, mati ni ngati; kutani hi vunharhu bya swona swa twanana. ₉Loko hi amukela vumbhoni bya vanhu, a hi tiveni leswaku vumbhoni bya Xikwembu i byikulu ku tlula sweswo, hikuva vumbhoni bya Xikwembu hi lebyi xi byi humeseke ehenhla ka N'wana wa xona. ₁₀Loyi a pfumelaka eka N'wana wa Xikwembu, vumbhoni byi le ka yena. Loyi a nga pfumeriki Xikwembu, ú xi endlile muhembi, hikuva a nga pfumelanga vumbhoni lebyi Xikwembu xi byi humeseke ehenhla ka N'wana wa xona. ₁₁Kutani vumbhoni bya kona hi lebyi: Hileswaku Xikwembu xi hi nyikile vutomi lebyi nga heriki, ni leswaku vutomi lebyi byi le ka N'wana wa xona. ₁₂Loyi a nga ni N'wana, ú ni vutomi; loyi a nga riki na N'wana wa Xikwembu, a nga na vutomi.

₁₃Timhaka leti, ndzi ti tsalele n'wina lava pfumelaka eka N'wana wa Xikwembu, mi ta tiva leswaku mi ni vutomi lebyi nga heriki. ₁₄Kutani ku tshemba loku hi nga na kona emahlweni ka Xikwembu, hileswaku loko hi kombela xilo xihi na xihi hilaha xi rhandzaka hakona, xa hi twa. ₁₅Kutani loko hi tiva leswaku xa hi twa eka hinkwaswo leswi hi swi kombelaka, ha tiva leswaku hi kumile leswi hi swi kombeleke eka xona.

₁₆Loko munhu a vona makwavo a ri karhi a endla xidyoho lexi nga yisiki eku feni, ú fanele ku khongela, kutani Xikwembu xi ta hanyisa makwavo loyi. Ndzi vulavula hi vanhu lava swidyoho swa vona swi nga yisiki eku feni. Kambe ku ni swidyoho leswi yisaka eku feni, kutani swona sweswo swi nge susiwi, hambi munhu a khongela. ₁₇Ku homboloka hinkwako i ku dyoha, kambe ku ni swidyoho leswi nga yisiki eku feni.

₁₈Ha swi tiva leswaku un'wana ni un'wana la tswariweke hi Xikwembu, a nga ha tshameli ku dyoha, hikuva ú hlayisiwa hi N'wana wa Xikwembu, kutani Lowo biha a nga n'wi khumbi. ₁₉Ha swi tiva leswaku hi va Xikwembu, ni leswaku misava hinkwayo yi le hansi ka matimba ya Lowo biha.

₂₀Naswona, ha swi tiva leswaku N'wana wa Xikwembu ú tile, ni leswaku ú hi nyikile ku twisisa, hi ta tiva yena loyi a nga wa ntiyiso; kutani hi hlangana ni Xikwembu lexi xa ntiyiso, loko hi hlangana ni N'wana wa xona Yesu Kriste. Hi xona hi xiviri xi nga Xikwembu xa ntiyiso, ni vutomi lebyi nga heriki.

₂₁Vana vanga, fularhelani swikwembu swa hava!