VARHOMA 1

₁Mina Pawulo, nandza wa Yesu Kriste, ndzi nga vitaniwa ku va muapostola, ndzi hlawuriweke ku tivisa Evhangeli, ₂leyi Xikwembu a xi yi tshembisile vanhu khale, hi vaprofeta va xona, ematsalweni layo kwetsima, ₃loko xi ringanisa hi n'wana wa xona, Yesu Kriste, Hosi ya hina, la nga huma erixakeni ra Davhida, hitlhelo ra nyama, ₄kambe a kombisiwa hi matimba, hi ku pfuka ka yena eku feni, leswaku i n'wana wa xona hitlhelo ra Moya lowo Kwetsima; ₅a nga yena loyi hi nyikiweke ha yena tintswalo ni vuapostola, leswaku exikarhi ka matiko hinkwawo, vanhu va yingisa hi ku pfumela vito ra yena, ₆valavo mi hlayiwaka exikarhi ka vona, n'wina lava vitaniweke hi Yesu Kriste;

₇Eka n'wina hinkwenu mi nga le Rhoma, varhandziwa va Xikwembu mi vitaneriweke ku kwetsima: tintswalo ni ku rhula a swi ve na n'wina swi huma eka Xikwembu, Tata wa hina, ni le ka Hosi Yesu Kriste!

₈Ndzi sungula hi ku khensa Xikwembu xa mina ha Yesu Kriste, hikwalaho ka n'wina hinkwenu, hikuva ku pfumela ka n'wina ku twarile ematikweni hinkwawo. ₉Hikuva Xikwembu lexi ndzi xi tirhelaka emoyeni wa mina eEvhangelini ya N'wana wa xona, hi yona mbhoni ya mina loko ndzi ku: A ndzi tshiki ku mi anakanya, ₁₀a ndzi tshiki ku kombela emikhongelweni ya mina leswaku, loko ku ri ku rhandza ka Xikwembu xi ndzi humesela riendzo leri katekeke ra ku ta eka n'wina, ₁₁hikuva ndzi navela ngopfu ku mi vona leswaku ndzi mi pfuna hi ku nyika kun'wana ka Moya, mi ta tiyisiwa hakona; ₁₂hileswaku loko ndzi ri eka n'wina, hi chavelelana hi ku pfumela loku hi nga na kona swin'we, n'wina na mina.

₁₃Kutani, vamakwerhu, a ndzi swi rhandzi loko mi nga swi tivi leswaku ndzi kanerile hakanyingi ku ta eka n'wina, ndzi ta kha mihandzu yin'wana exikarhi ka n'wina, kukota leswi ndzi swi endleke ematikweni man'wanyana; kambe ndzi hlulekile ku fika sweswi. ₁₄Ndzi ni nandzu eka Vagriki ni ka Vabarbara, eka lavo tlhariha ni ka lavo rivala. ₁₅Kutani sweswi, loko ndzi ri mina, ndzi tilunghisele ku vula Evhangeli, ni le ka n'wina lava nga eRhoma.

₁₆Kunene a ndzi na tingana ku vula Evhangeli, hikuva i matimba ya Xikwembu ya ku ponisa mani na mani la pfumelaka, ku sungula hi Muyuda, ku yisa eka Mugriki. ₁₇Hikuva ku hlavuteriwile eka yona, ku lulama ka Xikwembu, ku hume eku pfumeleni, ku yisa eku pfumeleni, kukotisa leswi tsariweke leswaku: “La lulameke u ta hanya hi ku pfumela.”

₁₈Hikuva vukari bya Xikwembu bya tikombisa hi le tilweni, ku ba xisandzu, ni ku homboloka hinkwako ka vanhu lava khotselaka ntiyiso eku hombolokeni; ₁₉hikuva leswi nga tiviwaka swa Xikwembu swi vonakisiwile erivaleni eka vona, hikuva Xikwembu xi va kombisile swona. ₂₀Hikuva leswi nga voniwiki swa Xikwembu, ma nga matimba ya xona lama nga heriki, ni vukwembu bya xona, swi vonake ngopfu, ka ha ri mpfhuka misava yi tumbuluka, loko ku tsundzukiwa mitirho ya xona, ku va leswaku va pfumala ku tilandzula. ₂₁Hikuva, hambi va tivile Xikwembu, a va xi dzunisanga leswaku i Xikwembu, naswona a va xi khensanga; kambe va hundzukile swahava emiehleketweni ya vona; ni timbilu ta vona leti pfumalaka vutlhari ti nyamisiwile. ₂₂Va ri va tlharihile, kasi va hundzuke va rihuhu; ₂₃kutani ku kwetsima ka Xikwembu lexi nga boriki, va ku hundzule xifaniso lexi fanisaka munhu la bolaka, ni tinyanyana, ni swiharhi swa mune wa milenge, ni swikokovi.

₂₄Hikwalaho-ke, Xikwembu xi va nyiketile eku naveleni ka timbilu ta vona ni le thyakeni; kutani va tionhile va ri vona emirini ya vona; ₂₅va nga valavo lava hundzuleke ntiyiso wa Xikwembu mavunwa, va gandzela, va va va tirhela leswi vumbiweke, a nga ri Muvumbi la vongiwaka hi masiku ni masiku. Amen!

₂₆Hikwalaho, Xikwembu xi va nyiketile eku naveleni loku nga ni tingana, hikuva exikarhi ka vona, vavasati va hundzurile mukhuva wa vona wa ntumbuluko, ku endla lowu nga lulamangiki. ₂₇Na vona vavanuna, va tshikile ku endla ni wansati hi mukhuva wa kona, kutani va hisiwile hi ku navelana, vavanuna va endla ni vavanunakulobye leswi yilaka ku vuriwa, kutani va tikumele hakelo leyi faneleke ku lahleka ka vona.

₂₈Kutani leswi va nga ka va nga ringetanga ku tiva Xikwembu, Xikwembu xi va nyiketile emoyeni lowu solekaka va ta endla leswi nga fanelangiki. ₂₉Va tele ku homboloka hinkwako, ni lunya, ni mona, ni vuciva, ni ku kanganyisa; va tele ku tshohoka, ni ku dlaya, ni ku kanetana, ni ku xisa, ni ku kucetela; ₃₀i vahlevi, i valumbeti, i vavengi va Xikwembu, i varhukani, i vatiarisi, i vatikurisi; lava pfuxaka swo biha, lava nga yingisiki vatswari va vona; ₃₁va hungukile, a va na nomu lowu tshembekaka, a va na rirhandzu, a va na tintswalo; ₃₂volavo, hambi va tivile ku lerisa ka Xikwembu leswaku lava endlaka swo biha leswo tano va lulameriwa hi rifu, a va endli leswo ntsena, kambe va engeta va yimela ni lava swi endlaka.