Ku wa ka Babilona.
1Endzhaku ka swona, ndzi vona ntsumi yin'wana leyi xikaka hi le tilweni, yi ri ni matimba lamakulu; kutani misava, yi voningiwa hi ku kwetsima ka yona. 2Kutani yi huwelela hi rito lera matimba, yi ku: “U wile, u wile, Babilona lonkulu, u hundzukile vuako bya mademona, ni khotso ra mimoya hinkwayo ya thyaka, ni vuako bya tinyanyana hinkwato leti nga tengangiki, leti nyenyiwaka. 3Hikuva matiko hinkwawo ma nwile vhinyo ya ku kariha ka vuoswi bya yena, kutani tihosi ta misava ti oswanile na yena; ni vaxavisi va misava va fuwile hi vukulu bya xuma xa yena.”
4Kutani ndzi twa rito rin'wana leri humaka etilweni, ri ku: “Sukani eka yena, n'wina va tiko ranga, leswaku mi nga tshuki mi nghena eku dyoheni ka yena, kutani mi nga ti weriwa hi makhombo ya yena. 5Hikuva swidyoho swa yena swi longolokile ku ya fika etilweni, kutani Xikwembu xi anakanyile ku homboloka ka yona. 6N'wi hakeleni kukotisa leswi a mi hakeleke; n'wi rihiseni kambirhi ku ringanisa mitirho ya yena; exinwelweni lexi a cheleke eka xona, n'wi cheleleni kambirhi. 7Mi n'wi xanisa, mi n'wi hlomukisa mbilu, mi n'wi ringanisela leswi a nga tidzunisa, ni leswi a nga titsakela ha swona. Hikuva u te embilwini ya yena: ‘Ndzi tshamile ndzi ri hosi, ndzi nga ri nsati wa noni, ndzi nga ka ndzi nga tivi nhlomulo’; 8hikwalaho makhombo ya yena ma ta humelela hi siku rin'we, rifu, ni nhlomulo ni ndlala, kutani u ta hisiwa hi ndzilo, hikuva Hosi leyi n'wi avanyisaka i Xikwembu xa matimba.”
9Kutani tihosi ta misava leti oswaneke na yena, leti hanyeke na yena eku titsakeleni, ti ta n'wi rilela, ti tiba swifuva loko ti vona musi wa ku tshwa ka yena, 10ti ri karhi ti yimile ekule hi ku chava ku xaniseka ka yena, ti ku: “Yo! Yo! Babilona, muti lowukulu, muti wa matimba; ku avanyisiwa ka wena ku humelerise ku yini hi nkarhi wun'we?”
11Ni vaxavisi va misava va rilela muti lowo, va wu vavisekela, hikuva mitirho ya vona a yi nga ha xaviwi hi munhu, 12mitirho ya nsuku, ni ya ntsopfu, ni ya maribye lama pfumalekaka, ni ya tiperela ni ya ntsembyana lowo saseka, ni ya xivunguvungu, ni ya silika, ni ya scarlet, ni mirhi hinkwayo leyi nun'hwelaka, ni ya swibya swa tinxakaxaka, leswi endliweke hi timhondzo ta tindlopfu, ni swibya hinkwaswo swa mirhi leya nkoka, ni swa koporo, ni swa nhumbu, ni swa mabulu, 13ni sinamoni, ni mirhi yo lunga, ni mirhi ya risuna, ni mirha, ni mirhi leyi hisiwaka, ni vhinyo, ni mafurha, ni mapa yo saseka, ni mavele, ni swifuwo, ni tinyimpfu, ni tihanci, ni tigolonyi, ni miri ni mimoya ya vanhu. 14“Mihandzu leyi mbilu ya wena yi yi tsakelaka, yi sukile eka wena ni swilo hinkwaswo leswo nandziha, ni leswo saseka swi sukele kule na wena, kutani u nga ka u nga ha swi kumi.” 15Vaxavisi va swona, lava fuweke ha yena, va ta yima ekule hi ku chava ku xaniseka ka yena, va ta rila hi ku hlomuka, va ku: “Yo! Yo! 16Muti lowukulu lowu ambaleke ntsembyana lowo vevuka, ni, xivunguvungu, ni scarlet, lowu ngi wu bombile hi nsuku, ni maribye lama pfumalekaka, ni tiperela; hikuva hi nkarhi wu ri wun'we xuma lexikulu swonghasi xi herisile ku yini!”
17Kutani vafambisi hinkwavo va mabyatso ni hinkwavo lava tlutelaka emutini lowo, ni lava fambaka hi lwandle, ni vaxavi hinkwavo va le lwandle va yimile ekule; 18kakuloko va vona musi wa ku tshwa ka wona, va huwelela, va ku: “Hi wihi muti lowu fanaka ni muti lowukulu lowu xana?” 19Kutani va tichela ntshuri etinhlokweni, va huwelela, va rila, va kolola, va ku: “Yo, yo, muti lowukulu, lowu, lava nga ni tingalava elwandle va nga fuwa hi rifuwo lerikulu ra wona, hi nkarhi wu ri wun'we, wu onhiwile! 20Tsakisisani hikwalaho ka wona, wena tilo, na n'wina vakwetsimi, ni vaapostola, ni vaprofeta, hikuva Xikwembu xi wu avanyisile hikwalaho ka n'wina.”
21Kutani ntsumi ya matimba yi teka ribye lerikulu leri fanaka ni tamba ra ku sila, yi ri hoxa elwandle, yi ku: “Ku ta hoxisiwa sweswo hi matimba eBabilona, muti lowukulu, kutani a wu nga ha kumiwi. 22Kutani rito ra lava yimbaka tiharipa, ni ra lava yimbaka timbila, ni tinanga, ni timhalamhala, a ri nga ha twakari eka wena; a ku nga ha kumiwi eka wena ni munhu la tirhaka ntirho wihi ni wihi, hambi wu ri mpfumawulo wa ribye ro sila, a wu nga ha twakari eka wena. 23Ku vonakala ka mavoningo a ku nga ha voningi eka wena, ni rito ra muteki ni ra mutekiwa, a ri nga ha twakari eka wena; hikuva vaxavisi lava nga eka wena a va ri vakulukumba va misava, hikuva matiko hinkwawo ma hambukisiwile hi madambi ya wena. 24Kutani ku kumiwile eka vona ngati ya vaprofeta, ni ya vakwetsimi, ni ya hinkwavo lava dlayiweke emisaveni.”
