1Kutani ndzi vona ntsumi yin'wana ya matimba leyi xikaka hi le tilweni, yi rhendzeriwe hi papa, yi ri ni nkwangulatilo enhlokweni; mombo wa yona wu fana ni dyambu, milenge ya yona yi kotisa timhandze ta ndzilo. 2Yi tamele evokweni ra yona e bukwanyana leyi phendliweke; yi yimisa nenge wa yona wa xinene elwandle ni lowa ximatsi emisaveni; 3kutani yi huwelela hi rito lera matimba, kukotisa nghala loko yi dzumadzuma; kuteloko yi huwelela, tindlati ta ntlhanu na timbirhi ti pfumisa marito ya tona. 4Kuteloko tindlati ta ntlhanu na timbirhi ti pfumisile marito ya tona, a ndzi lava ku tsala, kambe ndzi twa rito leri humaka etilweni, ri ku eka mina: “Lemela swilo leswi nga vuriwa hi tindlati leta ntlhanu na timbirhi, u nga swi tsari.” 5Kutani ntsumi leyi ndzi yi voneke yi yimile emisaveni ni lwandle, yi yimisa voko ra yona ra xinene etilweni, 6yi hlambanya hi la hanyaka hi masiku ni masiku, la nga vumba tilo ni leswi nga eka rona, ni misava ni leswi nga eka yona, ni lwandle ni leswi nga eka rona, leswaku nkarhi wu nga ka wu nga ha vi kona, 7kambe emasikwini ya rito ra ntsumi ya ntlhanu na mambirhi, loko yi ta yimba nanga hilaha xihundla xa Xikwembu xi nga ta hetiseka hilaha xi byeleke malandza ya xona ya vaprofeta hakona. 8Kutani rito leri ndzi ri tweke ri huma etilweni, ri engeta ri vulavula na mina, ri ku: “Yana u ya teka bukwanyana leyi phendliweke evokweni ra ntsumi leyi yimeke elwandle ni le misaveni.” 9Kavaloko ndzi ya eka ntsumi, ndzi ku eka yona: “Ndzi nyike bukwanyana.” Kutani yona yi ku eka mina: “Teka u dya; yi ta ku bavela endzeni, kambe enon'wini wa wena, yi ta nandziha kukota vulombe.” 10Kutani ndzi teka bukwanyana evokweni ra ntsumi, ndzi dya, kutani yi nandziha enon'wini wa mina kukotisa vulombe, kambe, kuteloko ndzi yi dyile, ku bava endzeni ka mina. 11Kutani yi ku eka mina: “U fanele ku tlhela u profeta ehenhla ka matiko, ni tinxaka, ni tindzimi, ni tihosi leto tala.”
