TIPISALEMA 90

₁Oho, Yehovha, a wu ri xichavelo xa hina etinxakeni ta tinxaka.

₂Loko tintshava ti nga si tumbuluka,

Loko u nga si vumba misava, ni swilo hinkwaswo,

Hi mikarhi ni mikarhi, u Xikwembu.

₃U tlherisa vanhu entshurini,

U ku: “Tlhelani, n'wina vana va vanhu!”

₄Hikuva khume ra madzana ya malembe emahlweni ka wena,

Ma fana ni siku ra tolo, loko ri hundzile, Ni lavelelo ya vusiku.

₅U va kukuta, va fana ni norho,

Nimixo va hluka kukota byanyi:

₆Nimixo, byi hluka byi rhumbuka,

Nimadyambu, byi tsemiwa, byi vuna.

₇Hikuva hi herisiwa hi vukari bya wena,

Ku hlundzuka ka wena ku hi chavisa.

₈U vekile emahlweni ka wena swivi swa hina,

Ni ku dyoha ka hina loku fihliweke ku le ku vonakaleni ka mombo wa wena.

₉Masiku hinkwawo ya hina ma hundza hi vukari bya wena;

Malembe ya hina ma nyumba kukotisa mpfumawulo.

₁₀Masiku ya ku hanyaka hina, ma ringana malembe ya 70,

Ni ka lava tiyeke, ma fika ka malembe ya 80;

Kutani ku tidzunisa loku va ku kumaka ka wona i ku vaviseka ni gome,

Hikuva ha hatla ku hundza, kambe hi tihahela!

₁₁I mani la tsundzukaka matimba ya vukari bya wena,

Ni ku hlundzuka ka wena hi ku chavisa loku ku fanelaka!

₁₂Hi dyondzise ku hlaya swinene masiku ya hina,

Leswaku timbilu ta hina ti tsundzukela evutlharini.

₁₃Vuya, Yehovha!

U ta hlwela ku yisa kwihi?

U va u tsetselela malandza ya wena!

₁₄Hi xurhise hi vunene bya wena, wa ha ri mixo,

Kutani hi ta tsaka, hi va hi tsakisisa hi masiku hinkwawo ya hina.

₁₅U hi tsakisa ku ringana masiku lawa u hi xaniseke ha wona,

Ni malembe lawa hi voneke khombo ha wona.

₁₆Ntirho wa wena a wu vonakarise ka malandza ya wena,

Ni ku kwetsima ka wena eka vana va vona!

₁₇Tintswalo ta Yehovha, Xikwembu xa hina, a ti ve ka hina!

Hi tiyisele ntirho wa mavoko ya hina,

Ina, tiyisa ntirho wa mavoko ya hina!