TIPISALEMA 85

₁Oho Yehovha, u katekisile tiko ra wena!

U vuyisile vakhomiwa va Yakobo,

₂U rivalele ku dyoha ka tiko ra wena,

U funengetile swidyoho swa vona hinkwaswo;

₃U miyetile vukari hinkwabyo bya wena,

U timile ndzilo wa mahlundzu ya wena.

₄Hi vuyise, Xikwembu xa ku hlayiseka ka hina!

U tshika ku hi hlundzukela!

₅Xana u ta hi holovela hi masiku xana?

U ta tiyisa vukari bya wena hi mikarhi ni mikarhi xana?

₆Xana u nge hi tlheriseri eku hanyeni xana?

Leswaku tiko ra wena ri ku tsakela?

₇Oho Yehovha, hi kombise vunene bya wena,

U hi nyika ku hlayiseka ka wena!

₈Ndzi ta yingisa leswi vuriwaka hi Yehovha Xikwembu;

Hikuva u vula ku rhula ka tiko ra yena, ni ka vahlawuriwa va yena;

Kambe va nga tshuki va ha vuyela eku hungukeni ka vona.

₉Kunene, ku hlayiseka ka yena ku le kusuhi ni lava n'wi chavaka,

Leswaku ku kwetsima ku ta aka etikweni ra hina.

₁₀Vunene ni ku lulama swi hlanganile,

Ku lulama ni ku rhula ku ntswontswanile;

₁₁Ku tshembeka ku ta mila emisaveni,

Ku lulama ka le henhla etilweni

ku ta languta ehansi.

₁₂Hakunene Yehovha u ta nyika nkateko wa yena;

Tiko ra hina ri ta humesa mihandzu ya rona.

₁₃Ku lulama ku ta famba emahlweni ka yena

Ku lulamisa ndlela hi mikondzo ya yena.