TIPISALEMA 81

₁Twarisani tinsimu ta n'wina eka Xikwembu lexi nga matimba ya hina,

Mi huwelela hi ku tsaka eka Xikwembu xa Yakobo!

₂Tlakusani tinsimu ta n'wina, mi ba mirumba,

Ni timbila leto nandziha, ni magubu!

₃Hi n'weti lowuntshwa, yimbani nanga,

Ni loko n'hweti wu be mahlampfu, hi siku ra nkhuvo wa hina!

₄Hikuva i nawu lowu nyikiweke Israele,

I ku lerisa ka Xikwembu xa Yakobo;

₅I vumbhoni lebyi tiyisiweke eka Yosefa,

Siku xi hlaselaka Egipta;

Laha ndzi nga twa ku vulavula loku ngi ndzi nga ku tivi.

₆Ndzi rhula nhundzu ekhatleni ra yena,

Mavoko ya yena ma tshika xirhundzu.

₇U ndzi khongele u ri emapfalweni, kutani ndzi ku ponisa,

Ndzi ku hlamule ndzi titumbetile eku pfumeni,

Kutani ndzi ku ringa ematini ya Meriba.

₈Yingisa tiko ra mina, ndzi ku hlamusela;

Oho Israele, loko swange u nga ndzi yingisa!

₉Ku nga tshuki ku va ni xikwembu ximbe eka wena,

U nga tshuki u khinsamela swikwembu swa matiko.

₁₀Hi mina Yehovha, Xikwembu xa wena,

la ku humeseke etikweni ra Egipta!

Ahlamisa nomu wa wena, ndzi ta wu tata.

₁₁“Kambe tiko ra mina a ri yingisanga rito ra mina,

Israele a nga ndzi yingisanga.

₁₂Hi laha ndzi va tshikeke eku tiariseni ka timbilu ta vona,

Va landzela switsundzuxo leswi nga swa vona ...

₁₃Oho! Loko ngi tiko ra mina ra ndzi yingisa,

Loko ngi Israele u famba etindleleni ta mina,

₁₄A ndzi ta hatlisa ku tsongahata valala va vona,

A ndzi ta hundzula voko ra mina eka vakaneti va vona;

₁₅Lava vengaka Yehovha, a va ta titsongahata emahlweni ka yena,

Nkarhi wa ku kateka ka vona a wu ta va lowu nga heriki,

₁₆A ndzi ta va phamela hi mavele lamanene,

Ndzi va xurhisa hi vulombe bya le ribyeni.”