Vaisraele va nyiketiwa, va khomiwa hi vamatiko.
Pisalema ya Asafa.
1Oho Xikwembu, va matiko va nghene endzhakeni ya wena,
Va nyamisile tempele ya wena leyi kwetsimaka,
Va endle Yerusalema, marhumbi.
2Va nyikete tinyanyana ta matilo mitsumbu ya malandza ya wena,
Ni swivandzana swa misava tinyama ta varhandziwa va wena.
3Va halate ngati ya vona tani hi mati
Matlhelo hinkwawo ya Yerusalema,
Kutani ku pfumaleka lava va lahlaka.
4Hi hundzukile xisandzu eka lava akisaneke na hina,
Ku tlanga, ni xihlekiso xa lava nga ematlhelweni.
5Yehovha, u ta tshika rini ku kariha,
Rilondo ra wena ri ta pfurha tani hi ndzilo hi masiku xana?
6Halatela vamatiko lava nga ku tiviki vukari bya wena,
Ni matiko hinkwawo lama nga khongeriki vito ra wena.
7Hikuva va dyile Yakobo,
Va onhile vuako bya yena.
8U nga tshuki u anakanya vudyohi bya vatata wa hina!
Tintswalo ta wena a ti hi tele hi ku hatlisa!
Hikuva hi va makhombo ngopfu.
9Oho Xikwembu xa ku hlayiseka ka hina, u hi pfuna,
Hikwalaho ka ku kwetsima ka vito ra wena,
U hi hlayisa, u hi rivalela vudyoho bya hina,
Hikwalaho ka vito ra wena!
10Matiko ma vulela yini ma ku:
“Xikwembu xa vona xi kwihi?”
Ku rihisa ka ngati ya malandza ya wena, leyi halatiweke,
A ku vonakale ematikweni emahlweni ya hina.
11Ku talelwa ka mbilu ya vakhomiwa a ku fike emahlweni ka wena,
U hlayisa lava averiweke ku fa, hi matimba ya voko ra wena!
12Hosi, u tlherisela eka ntlhanu na kambirhi exifuveni xa lava akisaneke na hina,
Xisandzu lexi va ku sandzeke ha xona!
13Kutani hina, tiko ra wena, ntlhambi lowu u wu risaka,
Hi ta ku khensa hi laha ku nga heriki,
Ni vatukulu va hina, va ta tama va vula ku dzuneka ka wena.
