TIPISALEMA 59

₁Xikwembu xanga!

Ndzi lwele eka lava ndzi vengaka!

Ndzi veke ekule ni valala va mina.

₂Ndzi lamulele eka lava endlaka leswo biha,

U ndzi kutsula eka vanhu va ngati!

₃Hikuva languta, va rhiyele moya wa mina mitlhamu;

Vanhu va matimba va ndzi etlelela;

Ku nga ri hikwalaho ka ku homboloka kumbe ka xidyoho xa mina, oho Yehovha!

₄Hambi ndzi nga ri na nandzu, va tsutsuma va hlomile;

Pfuka, u ta eka mina, u languta!

₅Wena Yehovha, Xikwembu xa tinyimpi, Xikwembu xa Israele!

Pfuka u laya matiko hinkwawo!

U nga tsetseleli na un'we wa timbabva leti.

₆Va vuya nimadyambu, va vukula kukota timbyana,

Va rhendzelekela muti.

₇Waswivo, milomu ya vona yi halata leswo biha,

Matlhari ma le milon'wini ya vona.

Hikuva va ri: “I mani la hi yingisaka?”

₈Kambe wena Yehovha, wa va hleka,

U hleka matiko hinkwawo.

₉Hikwalaho ka matimba ya vona, ndzi ta languta eka wena;

Hikuva Xikwembu i vuchavelo bya mina lebyi tlakukeke.

₁₀Xikwembu xanga xi ta ta ndzi hlanganisa hi tintswalo ta xona,

Xi ta tsakisa mahlo ya mina eku biweni ka valala va mina.

₁₁U nga va dlayi leswaku kumbe tiko ra mina ri swi rivala;

U va hangalasa hi matimba ya wena, u va wisela ehansi,

Wena Hosi, xitlhangu xa hina!

₁₂Loko ku hume rito emilon'wini ya vona, ku hume xidyoho.

A va phasiwe eku tikukumuxeni ka vona,

Hikwalaho ka tinhlambha ni mavunwa leswi va swi vulaka.

₁₃U va heta hi vukari bya wena, u va heta leswaku va nga ha vi kona!

A ku tiviwe, ni le makun'wini ya misava,

Leswaku Xikwembu xi fuma Yakobo.

₁₄Va vuya nimadyambu, va vukula kukota timbyana,

Va rhendzelekela muti.

₁₅Va yingayinga, va lava swakudya swa vona,

Kutani vusiku byi hundza, va nga si xurha.

₁₆Kambe mina ndzi ta yimbelela matimba ya wena;

Ndzi ta twarisa tintswalo ta wena wa ha ri mixo;

Hikuva u ve khokholo ra mina leri tlakukeke,

Ni vuchavelo hi siku ra mahlomulo ya mina.

₁₇Matimba ya mina! Ndzi ta ku twarisa,

Hikuva Xikwembu i khokholo ra mina leri tlakukeke,

Xikwembu lexi ndzi tsetselelaka.