Endzhutini wa timpapa ta Xikwembu.
Eka mufambisi wa vasimi. “U nga herisi.” Risimu ra Davhida, ra siku a nga tsutsuma a chava Sawulo, a nghena ebakweni.
1Ndzi twele vusiwana, Xikwembu, ndzi twele vusiwana!
Hikuva moya wanga wu chavele eka wena;
Ndzi chavele endzhutini wa timpapa ta wena;
Ku fika nkarhi lowu makhombo ma nga ta va ma hundzile.
2Ndzi huwelela eka Xikwembu lexi nge henhlahenhla,
Eka Xikwembu lexi tirhaka hikwalaho ka mina.
3Xi ta ndzi rhumela ku pfuna hi le tilweni, xi ndzi hlayisa,
Hambi ku sola loyi a lavaka ku ndzi mita.
Xikwembu xi ta rhumela tintswalo ta xona ni vunene bya xona.
4Moya wa mina wu le xikarhi ka tinghala;
Ndzi etlele exikarhi ka valala lava hlantaka ndzilo,
Exikarhi ka vanhu lava meno ya vona ma nga matlhari ni miseve,
Lava tindzimi ta vona ma nga mabanga layo kariha.
5Oho Xikwembu, titlakuse ehenhla ka matilo!
Ku kwetsima ka wena a ku ve ehenhla ka misava hinkwayo!
6A va rhiyile ntlhamu ehansi ka mikondzo ya mina,
Moya wa mina a wu korhamile;
A va cerile rindzi emahlweni ka mina:
Ku wele vona eka rona.
7Mbilu ya mina yi tiyile, oho Xikwembu!
Mbilu ya nga yi tiyile;
Ndzi ta yimbelela tinsimu ta ku vonga.
8Pfuka moya wanga; pfukani n'wina gubu ni haripa!
Ndzi ta pfuxa vurhonga bya mixo.
9Ndzi ta ku twarisa exikarhi ka tinxaka ta vanhu, we Hosi!
Ndzi ta ku yimbelela exikarhi ka matiko.
10Hikuva tintswalo ta wena ti kurile ti ya fika ematilweni,
Ni ku tshembeka ka wena emapapeni.
11Oho Xikwembu! Titlakuse henhla ka matilo!
Ku kwetsima ka wena a ku ve ehenhla ka misava hinkwayo.
