Munhu i hika ntsena la emisaveni.
Eka mufambisi wa vasimi. Eka Yedutuni. Pisalema ya Davhida.
1A ndzi ku: “Ndzi ta hitekela tindlela ta mina,
Leswaku ndzi nga ti tshuka ndzi dyoha hi ririmi ra nga;
Ndzi ta veka tomu enon'wini wa mina,
Enkarhini lowu lowo biha a nga ta va kona emahlweni ka mina.”
2Ndzi tshama ndzi ri mbheveve, ndzi timiyelela;
Ndzi titsona ku vulavula, ndzi vaviseka,
Kambe nhlomulo wa mina wu engetekile.
3Mbilu ya mina a yi hiseka endzeni ka mina,
Ndzilo wu tshiveriwe eku anakanyeni ka mina,
Ku va laha ririmi ranga ri vulavulaka:
4“Yehovha! Ndzi tivise makumu ya vutomi byanga,
Ni mpimo wa masiku ya mina,
Ndzi ta tiva leswaku ndzi mukhaluti ntsena.”
5Waswivo, u pimile masiku ya mina, ma ringana xandla ntsena,
Ni ku hanya ka mina a hi nchumu emahlweni ka wena.
Kunene munhu un'wana ni un'wana la yimaka i hika ntsena.
6Kunene munhu wa fambafamba kukotisa ndzhuti,
Va endla nkitsikitsi ku kuma swahava;
U hlengeleta rifuwo, kambe a nga tivi la nga ta dya rona.
7Sweswi, Hosi, ndzi nga langutela yini xana?
Ku tshemba ka mina ku le ka wena.
8Ndzi tshunxele eku dyoheni hinkwako ka mina!
U nga ndzi veki xisandzu eka xihunguki!
9Ndzi miyerile, ndzi nga ahlamisi nomu,
Hikuva hi wena la tirhaka.
10Tshika ku ndzi ba!
Ndzi herile hikwalaho ka matimba ya voko ra wena.
11Loko u laya munhu hikwalaho ka ku dyoha ka yena,
U herisa swo saseka swa yena tani hi tinsumba.
Kunene, munhu un'wana ni un'wana i hika ntsena.
12“Yehovha, yingisa xikhongelo xa mina, rhiyela ku huwelela ka mina ndleve!
U nga miyeli loko ndzi rila;
Hikuva ndzi muendzi eka wena,
Ndzi muluveri kukota vatata wa mina hinkwavo.
13Wa nga ndzi fularhela leswaku ndzi tlhela ndzi kuma ku tsaka,
Ndzi nga si tifambela, kutani ndzi nga ha vi kona.”
