Khombo ra loyi a fularheleke Xikwembu.
Eka mufambisi wa vasimi. Ya nandza wa Yehovha, ya Davhida.
1Timhaka to biha ti kona embilwini ya munhu lowo homboloka;
Ku chava Xikwembu a ku kona emahlweni ya yena.
2Hikuva u tidzunisa a ri yena,
Ku hetisa ku biha ka yena ni ku kombisa ku venga ka yena.
3Marito ya nomu wa yena i ku homboloka ni ku xisa;
U tshikile vutlhari ni ku endla leswinene.
4U anakanya swo homboloka emasangwini ya yena.
U famba hi ndlela leyi nga riki leyinene;
A nga fularheli leswo biha.
5Yehovha! Tintswalo ta wena tifika ematilweni,
Ku tshembeka ka wena ku fika emapapeni.
6Ku lulama ka wena ku fana ni tintshava ta Xikwembu;
Ku avanyisa ka wena i xidziva lexikulu;
Yehovha, u hlayisa vanhu ni swiharhi.
7Xikwembu, tintswalo ta wena ti rhandzeka swonghasi!
Vana va vanhu va chavela endzhutini wa timpapa ta wena.
8Va xurha hi mafurha ya yindlu ya wena,
Kutani u va nwisa enambyeni wa mati yo nandziha ya wena;
9Hikuva nseledyana ya vutomi yi na wena,
Kutani eku vonakaleni ka wena hi vona ku vonakala.
10Engeta tintswalo ta wena eka lava ku tivaka,
Ni ku lulama ka wena eka vanhu va timbilu to lulama!
11Milenge ya lava tikurisaka yi nga tshuki yi ndzi fikela,
Ni mavoko ya lavo biha ma nga tshuki ma ndzi hlongorisa!
12Vona, va wile ehansi lava endlaka swo biha;
Va wisiwile, va nge swi koti ku pfuka.
